Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 71: Aôndo Er Ityendezwa I Paradiso

Kwaghôron u sha 71: Aôndo Er Ityendezwa I Paradiso

NGUN ka foto u paradiso imba i̱ alaghga yange Aôndo tese profeti na Yesaia je ne. Yesaia lu sha won shighe u Yona kpe ica i lu a gba ga la.

Ior mba ken Paradiso

Inja i paradiso er “sule” shin “ijiir i memen.” Kwagh ne umbur we ma kwagh u se vande nengen a min ken takerada ne yôô? Ngú vough e̱r sule u doonashe u yange Yehova Aôndo er sha ci u Adam man Ifa la nahan, shin u bee ú ga? Kpa tar cica cii ua tsa sha won ua hingir paradiso je kpa?

Yehova yange kaa a profeti na Yesaia er a̱ nger kwagh u mve u paradiso u he u sha ci u ior mba Aôndo la. Yange kaa er: ‘Ugbaseela man iyôngo vea tema imôngo ken bem. Agumabua kua ônov mba begha vea ya toho ijiir i môm, man mbayev mbakiriki vea nenge sha a ve. Wanikundan je kpaa kwagh a er nan shighe u nana numbe a iyô i lun aa megh la ga.’

‘Kwagh ne una fatyô u eren mayange ga,’ kape ior kpishi vea kaa la. ‘Mzeiyol ka a lu sha tar hanma shighe cii, man shi una za hemen u lun gbem.’ Kpa hen ase shami yôô: Ka nyi imba ya yange Aôndo na Adam man Ifa?

Aôndo yange ver Adam man Ifa ken paradiso. Ka er yange ve hemba Aôndo ato la tseegh yange ya u doonashe la kar ve, ve bee ayol man shi ve kpe kpaa ye. Aôndo tôndozwa er una na ior mba ve lu a dooshima sha a na yô akaa shon a yange Adam man Ifa ve ta kera la.

Ken paradiso u he u á lú van la yô kwagh môm una vihi or iyol shin una tim kpaa ga. Bem u vough una lu. Ior cii vea lu ken mkpeiyol shi vea lu saan saan kpaa. A lu di vough e̱r Aôndo yange soo er i̱ lu sha hiihii la nahan. Kpa se va hen ken hemen er Aôndo una va er kwagh ne yô.

Yesaia 11:6-9; Mpase 21:3, 4.



Mbampin

  • Yesaia lu ana, man yange lu sha won hanma shighe, man Yehova yange tesen un nyi?
  • Inja i ishemberti i “paradiso” la ér nyi, man kwagh la umbur we nyi?
  • Yehova kaa a Yesaia ér a̱ nger nyi sha kwagh u Paradiso u he laa?
  • Hii nan ve ya u doon ashe u Adam man Ifa la saa?
  • Yehova er ityendezwa ér una er nyi sha ci u mba un doo ve ishima laa?

Mbampin mbagenev

  • Ôr Yesaia 11:6-9.

    Mkaanem ma Aôndo tese bem u una lu hen atô u inyam man uumace ken tar u he la nena? (Ps. 148:10, 13; Yes. 65:25; Esek. 34:25)

    Ka m-iv u ken jijingi u nyi mkaanem ma Yesaia ma lu ivin sha ior mba Yehova nyiana? (Rom. 12:2; Ef. 4:23, 24)

    Ka an i gbe u a na nan icivir sha mgem u i lu geman mbamlu mba ior hegen, man er a va gema ve ken tar u he laa? (Yes. 48:17, 18; Gal. 5:22, 23; Fil. 4:7)

  • Ôr Mpase 21:3, 4

    Ruamabera tese ér, u Aôndo teman a uumace la ka sha injakwagh, una tema a ve kpôghôô ga nena? (Lev. 26:11, 12; 2 Kron. 6:18; Yes. 66:1; Mpa. 21:2, 3, 22-24)

    Ka mliam man ican i nyi a va kar a mi kera? (Luka 8:49-52; Rom. 8:21, 22; Mpa. 21:4)