Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 70: Yona man Zege Ishu

Kwaghôron u sha 70: Yona man Zege Ishu

NENGE or u á lu shin mnger ne. Ngu ken zege mzeiyol, shin ngu ga? Ishu la ngi nôngon u menan un! Ú fa or ne kpa? Iti na er Yona. De se nenge er i hii ve yange gba ken zege mzeiyol ne yô.

Yona ka profeti u Yehova. Profeti Elisha yange kpe ica i gba ga tsô Yehova kaa a Yona er: ‘Za ken zegegar u Ninive la. Isholibo i ior mbara i vese kpishi, nahan m soo mer za lam a ve sha kwagh la.’

Yona man zege ishu

Kpa Yona soo u zan ga. Nahan a nyôr tso u a lu yemen ken vegher ugen kposo a Ninive yô. Doo Yehova e̱r Yona á lu yevese ne ga. Nahan A va a zegeahumbe. Á taver kpishi je yô nga nôngon u urun tso la. Mbatsoov mbara mba a mciem iyol kpishi, nahan ve ta akenge ve yila mbaaôndo vev sha u ve̱ va wase ve yô.

Ken masejime yô Yona kaa a ve er: ‘Mo m civir Yehova, Aôndo u a gbe sha man tar la. Man m ngu yevese sha er me e̱r kwagh u Yehova á nem la ga yô.’ Nahan mbatsoov mbara pine un er: ‘Ka nyi se er a we sha u yangen zege ahumbe nee?’

‘Gbihim nen shin zegemnger, tsô zegemnger una tile viing,’ Yona kaa nahan. Mbatsoov mbara soo u eren nahan ga cii, kpa er zege ahumbe la lu hemban seer a seer yô ken masejime ve dugh Yona ve gbihi shimi. Fese je maa zegeahumbe la tile, man zegemnger kpaa tile viing.

Er Yona mire shin mnger yem shin atô yô, zegeishu la maa mena un. Kpa a kpe ga. Ayange atar man aime atar cii ngu ken iyav mbu ishu la. Yona zungwe kpishi sha er un ungwa imo i Yehova un yem ken Ninive ga yô. Nahan ú fa kwagh u a er kpa?

Yona e̱r msen hen Yehova sha u a̱ wase un yô. Tsô Yehova er ishu la i za sua Yona sha taregh inyaagh. Kwagh la been kera yô Yona maa za ken Ninive. Kwagh ne tese se er í lu hange hange sha u se er hanmakwagh u Yehova á kaa er se er ga he?

Takerada ú Bibilo ú Yona.



Mbampin

  • Yona ka ana, man Yehova kaa a na ér a̱ er nyi?
  • Er Yona soo u zan ape Yehova tindi un la ga yô, á er nena?
  • Yona yange kaa a mbatsoov mbara ér ve er nyi ve zege ahumbe la una tilee?
  • Er ú nenge ken foto ne nahan, Yona mir shin atô mnger yô, nyi i ere?
  • Yona tsa shin iyav mbu zege ishu la kuma shighe nena, man lu eren nyi ken iyav mbu ii?
  • Yona yange dugh ken iyav mbu zege ishu la kera yô, á yem hana, man kwagh ne tese se nyi?

Mbampin mbagenev

  • Ôr Yona 1:1-17.

    Ikyav tese ér Yona yange nenge tom u i na un u za pasen ior i Nineve kwagh la nena? (Yona 1:2, 3; Anz. 3:7; Orpa. 8:12)

  • Ôr Yona 2:1, 10.

    Kwagh u Yona la na se vangertiôr ér Yehova una ungwa mbamsen asev nena? (Ps. 22:24; 34:6; 1 Yoh. 5:14)

  • Ôr Yona 3:1-10.

    Yehova yange tindi Yona sha kwa u hiihii la Yona venda, kpa de ga va hide shi tindi un sha kwa har, kwagh ne na se ishimataver i nyi? (Ps. 103:14; 1 Pet. 5:10)

    Kwagh u Yona la tese se nyi sha kwagh u sangen a sange ior mba se pase ve kwagh hen haregh wase? (Yona 3:6-9; Orpa. 11:6; Aer. 13:48)