Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 68: Mbayevnomso Uhar Mba Ve Hide Ve Lu Uma La

Kwaghôron u sha 68: Mbayevnomso Uhar Mba Ve Hide Ve Lu Uma La

ALUER ú kpe nahan, a lu ngôu ken ishima nena aluer i hide i nder u yô? A saan un iyol kpishi! Kpa or u nan kpe nahan shi nana fatyô u hiden lun uma je kpa? Kwagh vande eren nahanaa?

Nenge or u á lu heen ne, man kwase ne kua wanakiriki ne kpaa. Or la ka profeti Eliya je la. Kwase la di ka kwasecôghol u ken gar u Sarefati, man wanakiriki la yô gema ka wan na. Ka shami, iyange igen yô wan la gba angev. Mbu yem hemen hemen zan zan ken masejime yô maa a kpe. Tsô Eliya kaa a kwase la er: ‘Gema wan la nam.’

Eliya vea kwasecôghol ugen kua wan na u a nder un shin ku la

Eliya kôr wan la unde a na sha kparyou u sha za gbir un sha gambe. Tsô á e̱r msen: ‘Aye Yehova, na sha er wan ne una hide una lu uma yô.’ Man wan la hii u ôôn! Tsô Eliya kôr un hungwa a na shin inya va kaa a ngô na er: ‘Nenge, wan wou ngu uma!’ Ka kwagh u á ne ve i saan ngô na iyol yum je la.

Profeti u Yehova ugen u á lu u vesen yum yô iti na er Elisha. Un wasen Eliya tom. Kpa ken hemen yô Yehova er tom a Elisha sha u eren uivande. Iyange igen yô Elisha za ken gar u Shunem, her ape kwase ugen er a na dedoo yô. Ken hemen yô kwase la mar wan u nomso.

Iyange igen pepe, shighe u wanakiriki la vese seer kera yô, a due a za kohol ter na ken sule ape a lu eren tom la. Fese nahan wannomso la ngor mliam kaa er: ‘Ityough ki nanden mo!’ Er i tôô un i yem a na ken ya kera yô, wannomso la maa kpe. Ngô na zungwe tsô! Hen shighe la je man a za kohol Elisha.

Elisha va nyer her yô, a za nyôr ken iyou ape i gbir wan u kpen la. A er msen hen Yehova, shi a yav sha ikyom la. Ica kera gba ga tsô iyol i wan la hii u tseen, man a yesem kwa taankaruhar. Saan ngô na iyol tsô shighe u a va nyôr ken iyou la man a nenge a wan na u nomso lu uma yô!

Ior kpishi, kpishi ve kpe. Kwagh ne na icombor ve kua akar a ve ijungwen kpishi. Se mba aa tahav mbu nderen ior shin mbakpenev ga. Kpa Yehova yô ngu á mi. Ken hemen yô se hen e̱r una va hide a ior umiliôn mba ve kpe mbara vea lu uma yô.

1 Utor 17:8-24; 2 Utor 4:8-37.


Mbampin

  • Ka unô ve lu ken foto heene, man kanyi i er wannomso u kiriki laa?
  • Eliya er msen sha ci u wan la ér nyi, man kur msen yô nyi kwagh i ere?
  • Iti i or u wasen Eliya tom la ér ana?
  • Hii nan ve yange í yila Elisha ér a va ken ya u kwase u ken Shunem laa?
  • Elisha yange er nyi, lu nyi i gema i er wan u kpe la?
  • Kwagh u Eliya man Elisha er la tese ér kanyi utaha nahan Yehova a lu a mini?

Mbampin mbagenev

  • Ôr 1 Utor 17:8-24.

    Yange i kar m-ongo u Eliya ungwan imo i Yehova la man jighjigh u nan na nena? (1 Utor 17:9; 19:1-4, 10)

    Hii nan ve jighjigh u nan u kwasecôghol u ken Sarefati la a dugh tseer tseere? (1 Utor 17:12-16; Luka 4:25, 26)

    Ka nena kwagh u kwasecôghol u ken tar u Sarefati la a tese mimi u mkaanem ma Yesu ma i nger ken Mateu 10:41, 42 laa? (1 Utor 17:10-12, 17, 23, 24)

  • Ôr 2 Utor 4:8-37.

    Kwagh u kwase u ken Shunem la tese se nyi sha kwagh u eren a mbavannya dedoo? (2 Utor 4:8; Luka 6:38; Rom. 12:13; 1 Yoh. 3:17)

    Ka sha nyi gbenda nahan se er erdoo a mbatomov mba Aôndo nyiana? (Aer. 20:35; 28:1, 2; Gal. 6:9, 10; Heb. 6:10)