Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 67: Yehoshafati Na Yehova Jighjigh

Kwaghôron u sha 67: Yehoshafati Na Yehova Jighjigh

Ú FA ior mban man kwagh u ve lu eren kpa? Mba zan ityav, man ior mba ve lu ken hemen mbara mba wan atsam. Kpa alaghga ú pine wer: ‘Er nan mba ve lu wan atsam mbara ve lu a awange man udagi sha u nôngon ityav a min ga?’ De se nenge.

Mbaiserael mba zan ityav

Yehoshafati ngu tor sha tartor u ikwe ihiar i Iserael la. A tema tor hen shighe môm vea Tor Ahaba man Yesebel u tartor u ken ikwe 10 i sha imbusutarimese i Iserael la. Kpa Yehoshafati ka tor u dedoo, man ter na Asa kpaa yange lu tor u dedoo. Nahan ior mba ken tartor u ken imbusutariyan u ikwe ihiar mbara kpe ve iyol anyom ngee.

Kpa hegen yô kwagh e̱r u á ne ior mciem yô. Mbatyomov va kaa a Yehoshafati er: ‘Akumauitya a vesen a ken Moabi, Amon kua mba sha Uwo u Seir mba van sha u va tan num sha a we.’ Mbaiserael kpishi kohol ken Yerusalem sha u pinen iwasen hen Yehova. Ve za ken tempel, man ker la Yehoshafati er msen er: ‘Ku Yehova Aôndo wase, se fa kwagh u se er ga. Se mba aa tahav sha zege ikumuitya ne ga. Se mba veren ashe sha awe sha u ma u wase se yô.’

Yehova kegh ato, nahan a tindi môm ken mbatomov nav er a kaa a ior er: ‘Ityav mbin ka mbi yenev ga, kpa ka mbi Aôndo. A gba u ne nôngo kwagh ga. Ka u ne nenge a nenge tseegh, man ne nenge er Yehova una war ne yô.’

Nahan sev mbu aven yô Yehoshafati kaa a ior er: ‘Na nen jighjigh ken Yehova!’ Tsô a ver mba wan atsam ken hemen u mbautyaav nav, man e̱r ve lu yemen yô ve lu wan atsam wuese Yehova. Ú fa kwagh u a er shighe u ve zulum hen ijiir i uitya la kpa? Yehova na injughul hen atô u mbaihomov mbara nahan ve gba nôngon ityav wuan ayolave. Man shighe u Mbaiserael mba aren heregh yô, hanma orutya ken mbaihomov mbara cii nan lu kpenegh!

Yehoshafati yange lu a kwaghfan sha er yange na jighjigh ken Yehova ga he? Se kpaa se lu mba fankwagh aluer se na jighjigh ken a Na yô.

1 Utor 22:41-53; 2 Kroniku 20:1-30.


Mbampin

  • Yehoshafati ka ana, man lu uma hanma shighe?
  • Er nan ve mciem gba Mbaiserael iyolo, man ve mbagenev kpishi ve er nena?
  • Yehova ungwa msen u Yehoshafati er la nena?
  • Cii ve ityav mbira hii yô, Yehova na nyi kwagh i ere?
  • Kwagh u Yehoshafati la tese se nyi?

Mbampin mbagenev

  • Ôr 2 Kroniku 20:1-30.

    Yehoshafati yange tese kwagh u i gbe u mbatomov mba Aôndo vea er zum u kwagh a tser ve la nena? (2 Kron. 20:12; Ps. 25:15; 62:1)

    Er hanma shighe Yehova ngu a lu a gbenda u lamen a ior nav yô, ka nyi gbenda a lamen a ior nav nyiana? (2 Kron. 20:14, 15; Mat. 24:45-47; Yoh. 15:15)

    Shighe u Aôndo una va a “ityav mbi iyange i vesen i Aôndo, Uhembanagee” la, mlu wase una lu kwagh môm aa u Yehoshafati la nena? (2 Kron. 20:15, 17; 32:8; Mpa. 16:14, 16)

    Upania man mbamishen kpaa cii dondo ikyav i Mbalevi la, nahan mba suen tom u pasen kwagh ú i lu eren tar sha won cii ne nyian nena? (2 Kron. 20:19; Rom. 10:13-15; 2 Tim. 4:2)