Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 66: Yesebel—Torkwase u Ifer

Kwaghôron u sha 66: Yesebel—Torkwase u Ifer

TOR Yerobiam kpen kera yô, hanma tor u nan hemen ikwe 10 i tartor u sha imbusutarimese i Iserael la cii nan lu u bo. Tor Ahaba lu tor u hemban vihin ken ave cii. Ú fa ityôkyaa kpa? Ityôkyaa i vesen yô lu kwase na, Yesebel Torkwase u ifer.

Yesebel lu kwase u ken Iserael ga. Un lu wan u tor u Sidon. Un civir aôndo u aiegh u i yer er Baal la, man a na Ahaba kua Mbaiserael kpishi sha u ve kpaa civir Baal. Yesebel kôr Yehova ihom man a wua uprofeti nav kpishi. Mbagenev yô gba u vea za yer ken ubar sha er una wua ve ga yô. Aluer Yesebel soo makwagh yô, una fatyô u wuan or je kpaa sha er una zua a min keng yô.

Iyange igen yô Tor Ahaba lu zunguluu kpishi. Nahan Yesebel pine un er: ‘Ka nyi i ne ve u lu zunguluu nyian yum nahana?’

‘Ka sha ci u kwagh u Naboti a ôr a mo la,’ Ahaba kaa nahan. ‘M soo mer me yam sule u ikon i wain na. Kpa a kaa a mo er una nam ga.’

Yesebel kaa er: ‘Ishima i de zeu iyol ga. Me ngohol ú me nau.’

Nahan Yesebel nger uwashika hen atiator a a̱ lu hen gar u Naboti kpaa lu la. ‘Ker nen agbilinaior a̱ wa Naboti kwagh iyol er a tuhwa Aôndo kua tor kpaa,’ a kaa ve nahan. ‘Tsô kôr nen Naboti due nen a na ken akôngo a gar nahan ta nen un awen a kpe kera.’

Fese je er Yesebel ongo er Naboti kpe yô, a kaa a Ahaba er: ‘Hegen yô mough ase za tôô sule u wain na la.’ Ú lumun wer doo u i tsaha Yesebel sha er á er zege kwaghbo ne gaa?

Torkwase Yesebel

Nahan, shighe va kom yô, Yehova tindi or u i yilan er Yehu la sha u a̱ va tsaha un yô. Er Yesebel ungwa er Yehu ngu van yô, a shighe akaa a mondon sha ashe shi a wuha iyol sha er una dooashe yô. Kpa shighe u Yehu va man va nenge a Yesebel sha ihula yô, a yila ior mba ken ya u tor la a kaa er: ‘Daa un ta nen shin inya!’ Ior mbara ve er nahan, vough er u nenge ken foto ne nahan. Ve mgbegha un gba shin inya, man a kpe. Ngun ka mkur u Yesebel Torkwase u ifer je ne.

1 Utor 16:29-33; 18:1-4; 21:1-16; 2 Utor 9:30-37.



Mbampin

  • Ka an nan lu Yesebel?
  • Er nan ve ishima vihi Tor Ahaba iyange igene?
  • Yesebel yange er nyi sha er una ngohol sule u ikyon i wain u Naboti la una na nom na Ahaba?
  • Ka an Yehova yange tindi ér nana za tsaha Yesebel?
  • Er ú nenge ken foto ne nahan, Yehu yange ve hen ya u tor ape Yesebel lu la yô, nyi kwagh i ere?

Mbampin mbagenev

  • Ôr 1 Utor 16: 29-33 man 18:3, 4.

    Tar u Iserael yange u vihi sha shighe u Tor Ahaba la nena? (1 Utor 14:9)

  • Ôr 1 Utor 21:1-16.

    Naboti yange lu a ishimataver shi tese mtil sha mimi na hen Yehova nena? (1 Utor 21:1-3; Lev. 25:23-28)

    Se nenge ikyav i Ahaba la nahan, zum u or nan ve se ahenge yô, doo u se er nena? (1 Utor 21:4; Rom. 5:3-5)

  • Ôr 2 Utor 9:30-37.

    Ishimatseen i Yehu lu a mi sha u eren ishima i Yehova la tese se nyi? (2 Utor 9:4-10; 2 Kor. 9:1, 2; 2 Tim. 4:2)