SOLOMON ngu anyom pue-kar shighe u á hingir tor la. Yehova doo un ishima, man a dondo kwaghwan u dedoo u ter na Davidi yange na un la. Doo Yehova a Solomon, man sha ci u nahan yô ken tugh mbu gen yô a kaa a na ken mnya er: ‘Solomon, kanyi ú soo wer m nau we?’

Sha kwagh ne yô Solomon na mlumun er: ‘Yehova Aôndo wam, m ngu iyev kpishi man m ngu a mfe u hemen ga. Nahan yô nam mfe u hemen ior ou sha gbenda u u lu shami yô.’

Doo Yehova ken ishima sha kwagh u Solomon a pin un la. Nahan A kaa er: ‘Sha ci u ú pin sha u zuan a mfe man ú pin sha u zuan a mtse sha won ga shin inyaregh kpaa ga yô, me nau mfe u una hemba hanmaor u nan vande lun shin tar ne cii. Kpa shi me nau kwagh u ú pin ga la kpaa, inyaregh kua icivir kpaa.’

Shighe kpeghee ken hemen yô kasev uhar va hen Solomon a mzeiyol u taver kpishi. ‘Kwase ne vea mo se mba tse hen iyou môm,’ u môm ken a ve pase nahan. ‘M mar wannomso, man ayange nga kar ahar yô un kpaa mar wanikundan u nomso. Tsô hen tugh mbu gen yô wanikundan na la kpe. Kpa er m lu yaven yô, a gbir wan na u kpen la ikua a mo man a tôô wanikundan wam la. Shighe u m va nder m kenger wan la yô, m nenge e̱r lu u wam ga yô.’

Sha kwagh ne yô kwase ugen la kaa er: ‘Ei! Wan u uma la ka u wam, man u kpen la ka u na!’ Kwase u hiihii la na mlumun er: ‘Ei! Wan u kpen la ka u wou, man u uma la ka u wam!’ Kape kasev mbara ve lu gban anyiman je ne. Tsô Solomon una e̱r nena?

A tindi er i̱ za va a sanker, man, mba ve a mi yô, a kaa er: ‘Pav wanikundan u uma la avegher ahar, nahan na hanma kwase vegher na.’

‘Ei!’ kape ngô na jim jim la ngor la. ‘Wea lumun yô de woo wan la ga. Gba nan un tsô!’ Kpa kwase ugen la kaa er: ‘De ne mô wase ga; za hemen pav un avegher ahar.’

Tor Solomon ngu sôron mzeyol u vesen ugen

Ken masejime yô Solomon ôr kwagh kaa er: ‘De woo wan la ga! Gema un na kwase u hiihii la. Ka un á lu ngô na jim ye.’ Solomon fa kwagh ne sha ci u ngô na jim la ngu a dooshima sha wan na je yô a lumun sha u i̱ na kwase ugen la sha er á wua un ga yô. Er ior ungwa e̱r Solomon sôr mzeiyol ne yô, saan ve iyol kpishi sha er ve lu a imba tor u lun a kwaghfan nahan la yô.

Sha shighe u hemen u Solomon la, Aôndo ver ior dedoo sha u nan sha er inya ia mende alakema man shair, atam a wain kua tur man akaayan agen kpaa yô. Ior zer akondo a dedoo man shi ve tsa ken ayou a dedoo kpaa. Hanmakwagh u dedoo yô dumbur sha ci u hanmaor.

1 Utor 3:3-28; 4:29-34.



Mbampin

  • Yehova yange pine Solomon ér nyi, man Solomon di gema na mlumun ér nyi?
  • Kwagh u Solomon pine la doo Yehova, nahan á tôndo zwa ér una na un nyi?
  • Ka mzeyol u taver u nyi kasev uhar va a mi hen Solomon?
  • Er ú nenge ken foto ne nahan, Solomon yange sôr mzeyol la nena?
  • Hemen u Solomon yange u lu nena, man ka sha ci u nyi?

Mbampin mbagenev

  • Ôr 1 Utor 3:3-28.

    Kanyi mba i ne ve ityom i eren ken nongoior u Yehova nyian vea hen ken mkaanem ma Solomon ôr a ishima i môm í nger ken 1 Utor 3:7 laa? (Ps. 119:105; Anz. 3:5, 6)

    Kwagh u Solomon sôn la ka ikyav i dedoo i akaa a injaa a i doo u se er msen se sôn la nena? (1 Utor 3:9, 11; Anz. 30:8, 9; 1 Yoh. 5:14)

    Gbenda u Solomon kure ayôôso a kasev mba uhar la na se vangertiôr u nyi sha kwagh u hemen u Solomon u Tamen, Yesu Kristu una va hemen ken hemen laa? (1 Utor 3:28; Yes. 9:6, 7; 11:2-4)

  • Ôr 1 Utor 4:29-34.

    Yehova yange ungwa msen u Solomon sôn ishima i ungwan kwagh la nena? (1 Utor 4:29)

    Er ior lu keren ér vea ungwa kwaghfan u Solomon nahan, ka ieren i nyi nahan i doo u se lu a mi sha mhen u se henen Mkaanem ma Aôndo laa? (1 Utor 4:29, 30, 4:34-5:1; Yoh. 17:3, 4; 2 Tim. 3:16)