Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 53: Ityendezwa I Yefeta

Kwaghôron u sha 53: Ityendezwa I Yefeta
Wan u Yefeta u kwase

Ú VANDE eren ityendezwa i shighe u ken hemen yô i taver we u eren shaminii? Or u a lu ken foto heen ne yange er nahan, man ka kwagh u a ne ve a lu zunguluu yum je la. Or shon ka orjir u taver ishima u Iserael iti na er Yefeta.

Yefeta lu hen shighe u Mbaiserael ve kera civir Yehova ga la. Ve hide mba eren kwagh u a lu u bo yô. Nahan Yehova de er ior mba Amon ve er ve ican. Kwagh ne na Mbaiserael ve vaa ve yila Yehova: ‘Se e̱r isholibo hen awe. Wea lumun yô, yima se!’

Yefeta vea nomsombaiorov nav

Ior mban ve zungwe sha akaabo a ve er la. Ve tese mzungu ve sha u hiden shi civir Yehova heregh. Nahan Yehova kpaa shi wase ve.

Ior tsua Yefeta er a̱ nôngo ityav a mbaaferev Mbaamon mban. Yefeta soo kpishi er Yehova a̱ wase un ken ityav mbin. Nahan a er ityendezwa a Yehova er: ‘Aluer wea na Mbaamon sha ikev yam mimi je yô, or u hiihii u nana due hen ihinda i ya wam sha u va keghen mo gbenda zum u me hide dedoo la yô me nau.’

Yehova kegh ato ungwa ityendezwa i Yefeta la, man a wase un sha u a̱ hemba ityav yô. Yefeta ngur hiden ken ya yô, ú fa un shon u lu or u hiihii u duen va keghen un gbenda kpa? Ka wan na u kwase, u a lu wan na u môm môm la. ‘Kpe ahii, wan wam!’ Yefeta kaa nahan. ‘Ú vam a ishimavihin ve. Kpa m vande eren ityendezwa a Yehova, man me kera fatyô u hiden ijime ga.’

Er wan u Yefeta u kwase ungwa ityendezwa i ter na yô, hiihii la un kpaa ishima vihi un. Sha ci u ka u una undu ter na kua akar a na kpaa. Kpa ka u una lu eren Yehova tom ken ayange a uma na cii ken tabernakel na u ken Shilo la. Nahan a kaa a ter na er: ‘Aluer wea er ityendezwa a Yehova yô, kura i̱ keng je.’

Nahan wan u Yefeta u kwase yem ken Shilo, man a lu ker sha ayange a uma na cii sha u eren Yehova tom ken tabernakel na. Ayange anyiin ken hanma inyom yô kasev mba Iserael ve za nenge a na keregh, nahan ve zua a msaanyol imôngo. Ior soo wan u Yefeta u kwase la kpishi sha ci u lu ortom u Yehova u dedoo.

Mbaajiriv 10:6-18; 11:1-40.



Mbampin

  • Ka an nan lu Yefeta, man ka hanma shighe nahan yange lu?
  • Yefeta tôndozwa a Yehova ér nyi?
  • Kanyi yange i na ve ishima vihi Yefeta zum u á za hemba Mbaamon ityav lu hiden ken ya na laa?
  • Wan u Yefeta u kwase yange fe ér ter na er ityendezwa yô, á kaa ér nyi?
  • Hii nan ve ior soo wan u Yefeta u kwase la kpishi yumu?

Mbampin mbagenev

  • Ôr Mbaajiriv 10:6-18.

    Kwagh u i nger sha ihyembeato i Iserael la ka icintan hen a vese nena? (Mbaj. 10:6, 15, 16; Rom. 15:4; Mpa. 2:10)

  • Ôr Mbaajiriv 11:1-11, 29-40.

    Er nan ve se fe ser mne u Yefeta na “nagh ku nanden” a wan na u kwase la tese ér yange na nagh a uma u wan na la ga? (Mbaj. 11:31; Lev. 16:24; Dut. 18:10, 12)

    Ka sha nyi gbenda Yefeta na nagh a wan naa?

    Ka nyi se hen sha ityendezwa i Yefeta er a Yehova laa? (Mbaj. 11:35, 39; Orpa. 5:4, 5; Mat. 16:24)

    Wan u Yefeta u kwase la ver ikyav i dedoo sha ci u ikyaior i ken Kristu i i soo u eren tom u pasen kwagh hanma shighe la nena? (Mbaj. 11:36; Mat. 6:33; Fil. 3:8)