Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 50: Kasev Uhar mba Taver Asema

Kwaghôron u sha 50: Kasev Uhar mba Taver Asema

SHIGHE u Mbaiserael ve gba ken kwaghbo yô, ve vaa ve yila Yehova. Yehova ungwa ve sha u nan ve mbahemenev mba taver asema sha u ve̱ wase ve yô. Bibilo i̱ yila mbahemenev mban er mbaajiriv. Yosua lu orjir u hiihii, man mbaajiriv mbagenev mba yange ve dondo yô ati a ve lu Oteniel, Ehudi man Shamgar. Kpa ior ihiar ken mba yange ve wase Iserael yô lu kasev ati a ve er Debora man Yael.

Debora ngu lamen a Baraki

Debora ka profeti u kwase. Yehova ngu a na un mkaanem sha akaa a ken hemen, nahan un di a ôr ior kwagh u Yehova a kaa yô. Debora shi ka orjir kpaa. Tem shin itinevilegh igen ken veghertar u iwoogh la, man ior ka ve va hen a na sha u va keren iwasen sha mbamzeiyol vev.

Hen shighe ne Yabin lu tor ken Kanaan. Lu a mbautyaav mbaanyinyav 900. Mbautyaav nav taver iyol kpishi nahan ve kighir Mbaiserael kpishi ve hingir ikpan i Yabin. Kurutya u mbautyaav mba Tor Yabin yô ka Shisera.

Iyange igen yô Debora tindi hen Orjir Baraki, man a kaa a na er: ‘Yehova kaa er: “Mough a ior 10,000 za unde sha Uwo u Tabor. Mo Me va a Shisera hen a we. Man Me na un sha ikev you ú hemba un ityav man mbautyaav nav cii.” ’

Baraki kaa a Debora er: ‘Me za aluer u lumun u zan a mo yô.’ Debora za vea na, kpa a kaa a Baraki er: ‘U zua a icivir sha ci u mhembe ne ga, sha ci u Yehova una na Shisera sha ikev i kwase.’ Man ka pe lu vough je la.

Baraki hungwa sha Uwo u Tabor sha u za kohol mbautyaav mba Shisera. Fese nahan man Yehova va a mngerem ma deemee, tsô mba ve ta num sha ave mbara kpishi ve kua. Kpa Shisera yô hungwa sha ikyekyeutya na yevese sha angahar.

Baraki man Yael man Shisera

Shighe karen kpeghee yô Shisera va a̱r hen tenti u Yael. A ngohol un a nyôr a na kimi, man a na un atumba a ma. Kwagh ne na mnyam kôr un, nahan ica gba ga tsô maa a gba mnyam. Tsô Yael tôô imande i tenti za mande iferor ne sha wase kar kôr shin inya. Shighe karen kpeghee, Baraki za ve yô, a tese un ikyom i Shisera! Nahan ú nenge er kwagh u yange Debora ôr la va er shami vough.

Ken masejime yô Tor Yabin kpaa i wua un, tsô Mbaiserael shi zua a bem anshighe kpeghee.

Mbaajiriv 2:14-22; 4:1-24; 5:1-31.



Mbampin

  • Ka unô ve lu mbaajirivi, man ati a ve mbagenev ér nyi?
  • Debora lu sha ian i injaa i nyi, man eren nyi tomo?
  • Zum u Tor Yabin man kurutya na Shisera lu anger Mbaiserael yô, Yehova kaa a Debora ér a̱ ôr Orjir Baraki nyi, man á kaa ér ka an nana zua a icivir sha mhembe laa?
  • Yael yange tese ér un ngu kwase u tseen ishima nena?
  • Tor Yabin yange kpen kera yô, nyi kwagh i ere?

Mbampin mbagenev

  • Ôr Mbaajiriv 2:14-22.

    Mbaiserael yange ve er nyi ve ishima vihi Yehova a ve, man kwagh ne tese se nyi? (Mbaj. 2:20; Anz. 3:1, 2; Esek. 18:21-23)

  • Ôr Mbaajiriv 4:1-24.

    Jighjigh u nan man ishima i tseen i Debora man Yael la tese kasev mba Kristu nyian nyi kwagha? (Mbaj. 4:4, 8, 9, 14, 21, 22; Anz. 31:30; 1 Kor. 16:13)

  • Ôr Mbaajiriv 5:1-31.

    A fatyô u tôôn icam i mhembe i Baraki man Debora ve wa la eren msen sha kwagh u ityav mbi Armagedon mbì mbí lu van la nena? (Mbaj. 5:3, 31; 1 Kron. 16:8-10; Mpa. 7:9, 10; 16:16; 19:19-21)