Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 49: Iyange Tile Gigh Gigh

Kwaghôron u sha 49: Iyange Tile Gigh Gigh

KENGER Yosua. Ngu kaan er: ‘We iyange, tile gigh gigh!’ Man iyange i tile gigh gigh je. I̱ tile sha hen atô u abeen zan zan sev jimin. Yehova na kwagh ne e̱r! Kpa de se nenge er i hii ve Yosua a soo er iyange i za hemen u tan yô.

Iyange

Er utor mbaiferev mbautaan mba ken tar u Kanaan mbara mba hiin ityav a Mbagibeon yô, Mbagibeon tindi or er nana̱ kaa Yosua yô a̱ va wase ve. ‘Va hen a vese fefa!’ a kaa nahan. ‘Yima se! Gadia utor mba ve tem ken tar u iwoogh mbara cii kohol sha a vese sha u nôngon ityav a ikpan you.’

Fese je man Yosua kua mbautyaav nav cii ve mough ve gba yemen. Ve tsa yemen tugh kaka. Mba va aren hen Gibeon yô, mbautyaav mba utor mbautaan mbara cia tsô man ve gba yevese. Tsô Yehova ta ve uzegembaawombov mba ve due sha yô, nahan mbautyaav mba ve kpe sha ikyev i uzegembaawombov la ve hemba mba yange mbautyaav mba Yosua wua la iyenge.

Yosua

Yosua nenge er shi kpeghee tsô iyange ia mile. Ime ia waan yô, mbautyaav mba utor mbaiferev mbautaan mbara vea war. Ka nahan man Yosua er msen hen Yehova kaa er: ‘We iyange, tile gigh gigh!’ ye. Man er iyange i za hemen u tan yô, Mbaiserael ve fatyô u hemban ityav mbila vindi vindi.

Utor mbaiferev mbagenev mba kpishi ken Kanaan mba ve kôr ior mba Aôndo ihom yô. Tôô Yosua man ikwe utya na shighe kuma er anyom ataratar nahan u hemban utor 31 ityav ken tar la. Kwagh ne eren nahan yô, Yosua nenge er i pav tar u Kanaan i na avegher hen icombor i i lu a̱ zua a ijiir i teman ga yô.

Anyom nga karen kpishi yô, Yosua mase kpen sha anyom 110. Shighe u un man akar a na lu uma la cii, ior ungwan imo i Yehova. Kpa ior mba dedoo mban mba kpen kera yô, ior shi hii u eren akaabo shi nyôron ken mbamzeiyol. Ka shighe u sar ve u ma ve zough a iwasen hen Aôndo jim je ne.

Yosua 10:6-15; 12:7-24; 14:1-5; Mbaajiriv 2:8-13.



Mbampin

  • Yosua ngu kaan ér nyi ken foto nee, man ka sha ci u nyi?
  • Yehova yange wase Yosua kua mbautyaav nav nena?
  • Ka ator a me a a lu ihyom a Iserael Yosua yange hemba á ityava, man yange tôô shighe kuma nena?
  • Ka sha ci u nyi Yosua yange pav tar u Kanaan kere?
  • Yosua lu anyom a me ve kpe, man yange kpen kera yô lu nyi i er Mbaiseraele?

Mbampin mbagenev

  • Ôr Yosua 10:6-15.

    Er se fe se Yehova yange er iyange i tile gigh gigh sha ci u Mbaiserael nahan, ka vangertiôr u nyi se lu a mi nyiana? (Yos. 10:8, 10, 12, 13; Ps. 18:3; Anz. 18:10)

  • Ôr Yosua 12:7-24.

    Ka an jim yange nan na ve í hemba ator 31 ken Kanaan ityava, man kwagh ne ngu se a inja nyian nena? (Yos. 12:7; 24:11-13; Dut. 31:8; Luka 21:9, 25-28)

  • Ôr Yosua 14:1-5.

    Yange i pav tar la i kar icombor i Iserael nena, man kwagh ne tese nyi sha kwagh u karen dyako ken Paradiso? (Yos. 14:2; Yes. 65:21; Esek. 47:21-23; 1 Kor. 14:33)

  • Ôr Mbaajiriv 2:8-13.

    Ka unô nyian ve hendan a ior mba vendan mimi er Yosua kpa hendan a ve ken Iserael nahana? (Mbaj. 2:8, 10, 11; Mat. 24:45-47; 2 Tes. 2:3-6; Titu 1:7-9; Mpa. 1:1; 2:1, 2)