Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 48: Mbagibeon Mba Fankwagh

Kwaghôron u sha 48: Mbagibeon Mba Fankwagh

AGAR kpishi ken Kanaan hegen wa ago iyol sha u nôngon ityav a Iserael. Ve hen er vea fatyô u hemban. Kpa ior mba ken gar u Gibeon u a lu ikua la yô ve hen nahan ga. Ve na jighjigh er Aôndo ngu wasen Mbaiserael, man ve soo u nôngon a Aôndo ga. Nahan ú fa kwagh u Mbagibeon ve e̱r kpa?

Ve wa iyol sha u vea e̱r i lu inja er ve mba ior mba ijiir i caa kpishi nahan. Nahan ve mbagenev ve hua akondo a anden kua akôv a a ye tsegh kpishi yô. Ve wa ikyav sha ujaki vev ken aba a anden, shi ve tôô bredi mba uman kpugho-kpugho. Tsô ve za hen Yosua ve za kaa er: ‘Se yô se due ken tar ugen u caa je, sha ci u se ungwa kwagh u Yehova Aôndo wen, u hembanagee la. Se ungwa akaa a yange er ken tar u Igipiti la cii. Nahan mbatamen asev kaa a vese er se̱ tôô kwaghyan u se yaan sha gbenda yô nahan se̱ va hen a ven se̱ va kaa a ven ser: “Se mba ikpan yen. Yô ya nen ase ikuryan a vese ner ne kera nôngo ityav a vese ga.” Nenge nen ase dedoo er akondo a ase a ande sha ci u gôgô zende ne shi bredi wase kpaa a uma kpugho-kpugho yô.’

Yosua kua mbahemenev mbagenev mbara ve na Mbagibeon jighjigh. Nahan ve ya ikuryan a ve er vea kera nôngo ityav a ve ga. Kpa ayange nga karen atar yô ve mase kaven e̱r Mbagibeon ve lu ave ikua nahan.

‘Ka nyi yange ne kaa a vese ner ne due ken tar u caa je?’ Yosua pine ve nahan.

Mbagibeon mbara kaa a na er: ‘Yange se e̱r nahan sha ci u yange i ôr se er Yehova Aôndo wen tôndozwa er una na ne tar u Kanaan ne kpee. Nahan yô se lu cian tsung ser ne va wua se.’ Kpa Mbaiserael kura ityendezwa ve, man ve wua Mbagibeon ga. Kpa ve gema ve kôr ve ikpan.

Ishima vihi tor u Yerusalem kpishi sha er Mbagibeon ve ye ikyar a Iserael yô. Nahan a kaa a utor mbagenev unyiin er: ‘Va va wasem nen m nôngo ityav a Gibeon.’ Man ka kwagh u utor mbautaan mban ve e̱r kpaa je la. Yange Mbagibeon ve lu a kwaghfan sha er yange ve ya ikyar a Iserael, un shon u a ne utor mban u va nôngon ityav a ve nee? Se nenge ken hemen.

Yosua 9:1-27; 10:1-5.

Yosua kua Mbagibeon


Mbampin

  • Ka sha nyi gbenda ior i Gibeon ve kaha kposo a Mbakanaan mbagen mba ve lu ken agar a a lu ikyua laa?
  • Er i tese ken foto ne nahan, kanyi Mbagibeon ve ere, man er nan ve yange ve er kwagh nahana?
  • Ka ityendezwa i nyi Yosua man mbahemenev mba Iserael ve er a Mbagibeono, kpa ayange nga kar atar yô, ve va kav ér nyi?
  • Ator a ken agar agen nga ongo ér Mbagibeon ya ikyar a Iserael yô, ve er nyi?

Mbampin mbagenev

  • Ôr Yosua 9:1-27.

    Tindi u Yehova wa ikyurior i Iserael ér ve ‘tim mba ve tem ken tar la cii,’ kpa ve gema ve war Mbagibeon la tese aeren na a nyi? (Yos. 9:22, 24; Mat. 9:13; Aer. 10:34, 35; 2 Pet. 3:9)

    Mkur u Yosua kure ikyuryan na vea Mbagibeon la ka ikyav i dedoo hen Mbakristu nyian nena? (Yos. 9:18, 19; Mat. 5:37; Ef. 4:25)

  • Ôr Yosua 10:1-5.

    Zegeikpelaior i nyian ne i er kwagh er ka Mbagibeon nena, man í an ve vanger nena? (Yos. 10:4; Sek. 8:23; Mat. 25:35-40; Mpa. 12:17)