Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 45: U Peren Ifi u Yordan

Kwaghôron u sha 45: U Peren Ifi u Yordan

NENGE! Mbaiserael mba peren Ifi u Yordan! Kpa mngerem mara ma hana? Sha ci u ura ka u nôô kpishi sha shighe ne ken inyom, ifi la kpaa iv a mngerem poo je ica ngi a̱ gba ga. Kpa hegen mngerem mara cii ma yem! Man Mbaiserael mba peren vegher la sha taregh inyaagh u ombor vough er yange ve per Zegemnger u Nyian la nahan! Mngerem mara cii ma za hana? De se nenge.

Mbaiserael mba peren ifi u Yordan

Er shighe va kom u Mbaiserael vea per Ifi u Yordan yô, ka kwagh u Yehova ôr Yosua er a̱ kaa ior ne: ‘Upristi ve tôô areki u ikuryan ve yemen ken hemen wase. Vea hungwan angahar a ve shin Ifi u Yordan yô, man mngerem maa de u kuan je.’

Nahan man upristi ve tôô areki u ikuryan, ve gba yemen a mi ken hemen u ior. Mba va aren hen Yordan yô, upristi gba hungwan shin mnger. Ma kuan taveraa shi ma za̱ shimi kpaa. Kpa er angahar a ve nga benden a mngerem je tsô, mngerem mara de u kuan! Ka ivande je! Vegher u sha ityough ki ifi la Yehova tôndo mngerem. Nahan, ica kera gba ga tsô man mngerem kera lu shin ifi ga!

Upristi mba ve tôô areki u ikuryan la ve za tile hen atô u ifi jighjigh. Ú nenge a ve ken foto ne kpa? Er ve tile heela nahan, Mbaiserael cica per Ifi u Yordan sha tareghnyaagh u ombor!

Hanmaor nan hongo nan dugh vegher la yô, Yehova ôr Yosua er a̱ kaa iorov 12 mbaageev er: ‘Hungwa za nen hen atô u ifi hen ape upristi ve til a areki u ikuryan la. Tôô nen awen 12, nahan kohol nen á ijiir i môm hen ape ne haa afo hen tugh mbu nyian ne. Nahan, ken hemen yô, ônov enev vea pinen ne ikav i awen ne yô, ôr nen ve ner mngerem yange ma de u kuan shighe u areki u Yehova per Yordan la. Awen ne aa umbur ne ivande ne!’ Yosua shi ver awen 12 hen ijiir i yange upristi mbara ve tile hen atô u ifi la.

Yosua

Ken masejime yô Yosua kaa a upristi mba yange ve tôô areki u ikuryan la er: ‘Due nen shin Yordan kera hegen.’ Mba dugh kera yô, ifi shi hide hii u kuan her je.

Yosua 3:1-17; 4:1-18.



Mbampin

  • Kanyi ivande Yehova yange er sha er Mbaiserael vea per Ifi u Yordan laa?
  • Ka jighjigh u nyi yange gba u Mbaiserael vea lu a mi ve vea per Ifi u Yordana?
  • Hii nan ve Yehova yange kaa a Yosua ér a kohol awen a vesen 12 shin tareghnyaagh u ifi laa?
  • Upristi mbara mba dugh shin Yordan kera yô, nyi i ere?

Mbampin mbagenev

  • Ôr Yosua 3:1-17.

    Er kwagh u se hen ne a tese nahan, gba u se er nyi ve se zua a iwasen man iveren hen Yehova? (Yos. 3:13, 15; Anz. 3:5; Yak. 2:22, 26)

    Ifi u Yordan yange lu nena hen shighe u Mbaiserael per un nyôr ken Tar u Ityendezwa la man kwagh la yange kende a iti i Yehova sha nena? (Yos. 3:15; 4:18; Ps. 66:5-7)

  • Ôr Yosua 4:1-18.

    Awen a 12 a yange i tôô shin Yordan i za tim ken Gilgal la lu ikyav i nyi? (Yos. 4:4-7)