Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 44: Rahabi Yer Mbamkerev

Kwaghôron u sha 44: Rahabi Yer Mbamkerev

KWAGH tser ior mban. Saa vea yevese vea yem kera keng, ga yô á wua ve. Ka mbamkerev mba Iserael, man kwase u á lu wasen ve la ka Rahabi. Rahabi tse ken iyou i i lu ikua a kpekpe u girgar u Yeriko ne. De se fa ityôkyaa i i ne ve kwagh a tser ior mban yô.

Mbaiserael ve wa iyol sha u peren Ifi u Yordan nyôron ken tar u Kanaan. Kpa cii man vea nyôr yô, Yosua tindi ior mbamkerev uhar. Á kaa a ve er: ‘Za za nenge nen tar la kua gar u Yeriko.’

Rahabi man mbamkerev Mbaiserael uhar

Mbamkerev mbara mba nyer ken Yeriko yô, ve za hen ya u Rahabi. Kpa orgen nan ôr tor u Yeriko er: ‘Mbaiserael ior ihiar ve va heen nyen tugh sha u vea va nenge tar ne mker yô.’ Ongo kwagh ne yô, tor la man tindi ior ve za hen Rahabi, ve gba kumbur a na er: ‘Ior mba ú lu a ve hen iyou you la, due a ve ken won!’ Kpa Rahabi yer ior mba shon sha haav mbu iyoughouv sha. Nahan a kaa er: ‘Nomsombaiorov mbara nyen ve va her a mo, kpa m fa henpe ve dugh man ve ve heen ga. Ve yem shighe u aôndoaimegh a lu haan la, cii i mase wuhen hunda gar ye. Aluer ne zenda ve ijime fefa yô, né kohol ve!’ Nahan man ior mbara gba zendan ve ijime.

Mba yemen yô, Rahabi unde sha haav mbu iyoughouv fefa. ‘M fa Yehova una na ne tar ne,’ a ôr a mbamkerev mbara nahan. ‘Gadia se ungwa er Yehova tôndo Zegemnger u Nyian sha ishigh yenegh zum u ne due ken Igipiti la, man er ne wua utor mba Shihon kua Ogo yô. Mo m er a ven dedoo, nahan yô bum nen a mo, nea lumun yô, ner ne kpaa ne er a mo dedoo. Yima nen terem kua ngôm, man anngôôv av mbanomso man mbakasev.’

Mbamkerev mbara ve bum a na er vea e̱r nahan, kpa saa Rahabi una er kwagh u genegh keng. ‘Ngohor kor u mou u nyian ne man zer sha ihula i iyou you,’ mbamkerev mbara kaa nahan, ‘man shi kohol mba wanndor a we cii ken iyou you. Man shighe u se cii se hide hen Yeriko sha u ngohol un yô, se nenge a kor u mou ne sha ihula i iyou you nahan se kera wua ma or ken iyou you ga.’ Mbamkerev mbara mba hidi hen Yosua yô, ve ôr un hanmakwagh u yange e̱r la cii.

Yosua 2:1-24; Mbaheberu 11:31.



Mbampin

  • Rahabi yange lu hana?
  • Iorov mba uhar mba ve lu ken foto heen ne ka unô, man yange ve za nyi ken Yeriko?
  • Tor u Yeriko kaa a Rahabi ér a̱ er nyi, man Rahabi na mlumun er nena?
  • Rahabi wase iorov mba uhar mban nena, man un di gema pine ve iwasen i nyi?
  • Mbamkerev mba uhar mban tôndozwa a Rahabi ér nyi?

Mbampin mbagenev

  • Ôr Yosua 2:1-24.

    Ityendezwa i Yehova er i nger ken Ekesodu 23:28 la yange kure sha shighe u Mbaiserael ta num sha Yeriko la nena? (Yos. 2:9-11)

  • Ôr Mbaheberu 11:31.

    Ikyav i Rahabi la tese mluainja u jighjigh u nan nena? (Rom. 1:17; Heb. 10:39; Yak. 2:25)