Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 43: Yosua Hingir Orhemen

Kwaghôron u sha 43: Yosua Hingir Orhemen

MOSE soo er una nyôr ken tar u Kanaan vea Mbaiserael. Nahan a sôn er: ‘De m per Ifi u Yordan, Yehova, m za nenge tar u dedoo la.’ Kpa Yehova kaa er: ‘Kuma nahan! De kera shi er kwagh a mo sha kwagh ne ga!’ Ú fa er i hii ve Yehova yange kaa nahan kpa?

Ka sha ci u kwagh u yange er shighe u Mose gbidye vande la. Umbur, un man Aron yange ve na Yehova icivir ga. Yange ve ôr ior er ka Yehova á lu van ve a mngerem ken vande la ga. Sha ityôkyaa ne yô Yehova kaa er una de ve er ve̱ nyôr ken tar u Kanaan ga.

Nahan er Aron kpe iwer ngi karen kpeghee yô, Yehova kaa a Mose er: ‘Kôr Yosua, tile a na sha ishigh ki Eleasar u a lu pristi la man sha ishigh ki ior cii. Man sha ishigh vegh cii, ôr ior cii wer Yosua ka orhemen ve u he.’ Mose e̱r kwagh u Yehova kaa un la nahan vough, er u nenge ken foto ne nahan.

Mose ngu yôôn ér Yosua hingir orhemen

Tsô Yehova kaa a Yosua er: ‘Taver ishima, de cie ga. Ka we ú yem a Mbaiserael ken tar u Kanaan u M bum a ve sha u nan ve la ye, man Me lu a we kpaa.’

Ken hemen yô Yehova kaa a Mose er a̱ unde sha ityough ki Uwo u Nebo u ken tar u Moabi la. Shaala la Mose una fatyô u nengen Ifi u Yordan vegher la man shi gbulumaa u tar u Kanaan u doonashe la. Yehova kaa er: ‘Ngun ka tar u M bum mer me na ônov mba Aberaham, Isaka man Yakob je ne. M deu mer nenge a ú, kpa Me deu mer nyôr ken ú ga.’

Ka sha ityough ki Uwo u Nebo shaala la man Mose kpe ye. Yange lu anyom 120 hen shighe la. Lu gbang gbang heregh, man shi ashe a na kpaa nengen heregh dedoo. Ishima vihi ior keregh kpishi nahan ve vaa sha ci u Mose kpe yum. Kpa saan ve iyol sha er Yosua a lu orhemen ve u he yô.

Numeri 27:12-23; Duteronomi 3:23-29; 31:1-8, 14-23; 32:45-52; 34:1-12.



Mbampin

  • Iorov mba uhar mba ve til vea Mose ken foto heen ne ka an man ana?
  • Yehova kaa a Yosua ér nyi?
  • Hii nan ve Mose yange unde sha ityough ki Uwo u Nebo, man Yehova kaa a na ér nyi?
  • Mose yange tsa anyom a me ve kpe?
  • Hii nan ve ishima yange i vihi Mbaiseraele, kpa gema saan ve iyol sha ci u nyi?

Mbampin mbagenev

  • Ôr Numeri 27:12-23.

    Ka ityôm i vesen i nyi Yehova yange na Yosua, man Yehova we ior Nav ikyo nyian nena? (Num. 27:15-19; Aer. 20:28; Heb. 13:7)

  • Ôr Duteronomi 3:23-29.

    Hii nan ve Yehova yange de ér Mose man Aron ve per ve nyôr ken tar u ityendezwa la ga, man kwagh ne tese se nyi? (Dut. 3:25-27; Num. 20:12, 13)

  • Ôr Duteronomi 31:1-8, 14-23.

    Mkaanem ma Mose ôr a Mbaiserael cii ve mase kpen la tese ér á ngohol tsaha u Yehova na un la a iyol hiden ijime nena? (Dut. 31:6-8, 23)

  • Ôr Duteronomi 32:45-52.

    Doo u Mkaanem ma Aôndo maa bende a uuma asev nena? (Dut. 32:47; Lev. 18:5; Heb. 4:12)

  • Ôr Duteronomi 34:1-12.

    Shin er ma shighe môm kpa Mose nenge a Yehova kpôô kpôô ga nahan kpa, Duteronomi 34:10 ôr nyi sha kwagh u ikyaryan na vea Yehova? (Dut. 34:10; Eks. 33:11, 20; Num. 12:8)