Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 42: Jaki Ôr Kwagh

Kwaghôron u sha 42: Jaki Ôr Kwagh

Ú VANDE ungwan jaki ôr kwagh vee? ‘Ei,’ alaghga u kaa nahan. ‘Ishôso ia fatyô u ôron kwagh ga.’ Kpa Bibilo i̱ ôr kwagh u jaki i yange i̱ er nahan yô. De se nenge er yange kwagh la er yô.

Ortyom

Mbaiserael wa iyol u nyôron ken tar u Kanaan. Balaki, tor u Moabi, ngu a mciem iyol sha Mbaiserael. Nahan a tindi hen or u lun a kwaghfan kpishi u i yilan er Balaam la er a̱ va wa Mbaiserael ifan. Balaki tôndozwa er una na Balaam inyaregh kpishi, nahan Balaam henda jaki na man kôr gbenda yemen sha u una za nenge a Balaki yô.

Yehova soo er Balaam a wa ior Nav ifan ga. Nahan a tindi ortyom a gôgô sanker er a̱ va tile sha gbenda sha u yangen Balaam. Balaam fatyô u nengen a ortyom la ga, kpa jaki yô i̱ nenge a na. Nahan jaki gba kômbon iyol ken kpekpe sha u ia goom kera ia kera a̱r hen ape ortyom a lu la ga yô, man ken masejime yô i̱ gba yaven sha gbenda tsô. Ishima vihi Balaam kpishi, man a gbidye jaki na sha aga.

Tsô Yehova er Balaam ungwa jaki na i̱ ôr kwagh a na. ‘M er u nyi ve u gbidyen mo?’ jaki pine nahan.

Balaam tema sha jaki

‘Ú erem m hingir er ibumeor nahan,’ Balaam kaa nahan. ‘Mea lu a sanker sha uwe yô ma m woo u a wua je!’

‘M vande eren a we nahan mayange kpa?’ jaki pine nahan.

Balaam kaa er: ‘Ei.’

Tsô Yehova bugh Balaam ashe a nenge a ortyom u tsuwa sanker kôr sha uwe tile sha gbenda la. Ortyom la kaa er: ‘Ka nyi ú gbidi jaki youwe? Mo m va sha u yangen we, sha er ú za wa Iserael ifan ga yô. Aluer jaki you ne ia palegh mo ga yô, ma m woo u a wua je, kpa ma m vihi jaki you iyol ga.’

Balaam kaa er: ‘M er isholibo. Gadia m fa er u til sha gbenda ga.’ Nahan ortyom de Balaam yem, man Balaam za sha u za nengen a Balaki. Nahan cii kpaa a nôngo her sha u wan Iserael ifan, kpa, u ma a er nahan la yô, Yehova gema un ishima tsô a na Iserael iveren kwa tar.

Numeri 21:21-35; 22:1-40; 23:1-30; 24:1-25.



Mbampin

  • Ka an nan lu Balaki, man er nan ve yange tindi ér Balaam a va?
  • Jaki i Balaam yav inya sha gbenda er nyi?
  • Balaam ungwa jaki shon lu kaan ér nyi?
  • Ortyom yange kaa a Balaam ér nyi?
  • Er Balaam nôngo ér una wa Iserael ifan yô, nyi kwagh i ere?

Mbampin mbagenev

  • Ôr Numeri 21: 21-35.

    Hii nan ve yange Iserael hemba Shihon, Tor u Mbaamor man Ogo, Tor u Bashana ityava? (Num. 21:21, 23, 33, 34)

  • Ôr Numeri 22:1-40.

    Balaam yange lu a nyi ken ishima zum u nôngo ér una wa Iserael ifan laa, man kwagh ne tese se nyi? (Num. 22:16, 17; Anz. 6:16, 18; 2 Pet. 2:15; Yuda 11)

  • Ôr Numeri 23:1-30.

    Balaam yange lam inja er ngu or u civir Yehova nahan kpa, ieren na tese ér ngu or u civir Aôndo ga nena? (Num. 23:3, 11-14; 1 Sam. 15:22)

  • Ôr Numeri 24:1-25.

    Kwaghôron u ken Bibilo ne taver jighjigh u se ne ser Yehova una kure awashima na la nena? (Num. 24:10; Yes. 54:17)