Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 41: Iyô I Togula

Kwaghôron u sha 41: Iyô I Togula
Mose man iyô i togula

KWAGH la ngu inja er iyô i mimi i í hambe i̱ sha ityô ne nahanaa? Ka i mimi ga. Iyô ne i e̱r i̱ sha togula. Yehova yange kaa a Mose er a̱ er i a̱ hambe sha ityô a tim sha sha er ior vea kenger shami vea lu uma yô. Kpa iyô igen i i lu hen inya ne ka i mimi. Í vande nyuman ior nahan í na ve angev. Ú fa ityôkyaa kpa?

Ka sha ci u Mbaiserael yange ve lam daeng sha iyol i Aôndo man Mose. Ve er ayôôso ve kaa er: ‘Ka nyi ne dugh a vese ken Igipiti ne ve a vese ner se̱ va kpe ken taaikyôngo nahana? Kwaghyan kpaa ngu heen ga mngerem kpaa ma ga. Man mana ne kpaa a due se ishima.’

Kpa mana la ka kwaghyan u dedoo. Ka sha ivande je Yehova lu na ve un ye. Man shi lu sha ivande kpaa a na ve mngerem ye. Kpa ior mban mba a ishughun sha gbenda u Aôndo a nengen sha a ve ne ga. Nahan Yehova tindi iyô i lun aa megh ku bough sha u tsahan Mbaiserael. Iyô la nyuma ve, man mbakpishiv ken a ve kpe.

Iyô ngi nyiman Mbaiserael

Ken masejime yô ior mbara za hen Mose za kaa er: ‘Se e̱r isholibo, er se lam daeng sha iyol i Yehova man we kpaa yô. Hegen yô sôn Yehova a̱ kura iyô ne kera.’

Nahan Mose er msen sha ci u ior. Man Yehova kaa a Mose er a̱ er iyô i togula ne. A kaa er a̱ kperegh i̱ sha ityô a̱ tim sha, man hanmaor u i̱ nyom nan yô na̱na̱ kenger sha i̱. Mose er vough er Aôndo kaa un nahan. Man ior mba yange iyô la ia nyuma ve man vea kenger sha iyô i togula la yô man ve war je.

Kwagh ngu u se hen sha kwagh ne yô. Se cii, se mba er Mbaiserael mba yange iyô i nyuma ve la nahan, sha gbenda u genegh. Se cii se mba ken mlu u kuugh. Kenger hanma vegher, tsô ú nenge er ior ka ve bee ayol, ve gba angev, man ve kpe yô. Kwagh ne ka nahan sha ci u or man kwase mba hiihii mbara, Adam man Ifa, yange ve gema ijime a Yehova, man se cii se mba ônov vev. Kpa Yehova er gbenda sha er se fatyô u lun uma gbem sha won yô.

Yehova yange tindi Wan na, Yesu Kristu, shin tar. Yange i mande Yesu sha kon, sha ci u ior kpishi yange ve hen er un ka iferor. Kpa Yehova lu na Yesu sha u a̱ yima se yô. Aluer se ver ashe sha a na yô, aluer se dondo un yô, nahan se fatyô u zuan a uma u tsôron. Kpa se hen kwagh ne se seer ken hemen.

Numeri 21:4-9; Yohane 3:14, 15.



Mbampin

  • Kanyi i kamber sha ityô ken foto nee, man hii nan ve Yehova yange kaa a Mose ér a̱ er i̱ a̱ hambe sha ityô?
  • Mbaiseral ve lu a ishughun sha akaa a Aôndo er sha ci ve la ga nena?
  • Er Yehova haa iyô i lun a megh ku bough lu nyuman Mbaiserael yô, ve va kaa a Mose ér nyi?
  • Hii nan ve Yehova kaa a Mose ér a̱ er iyô i togula?
  • Kanyi se hen ken kwaghôron nee?

Mbampin mbagenev

  • Ôr Numeri 21:4-9.

    Ahon a Mbaiserael gba sha kwaghyan u Yehova na ve la a ta se icin i nyi? (Num. 21:5, 6; Rom. 2:4)

    Uderimbaanyomov mba kar imôngo yô, Mbaiserael er nyi a iyô i togula laa, man Tor Hesekia er nyi sha kwagh laa?

  • Ôr Yohane 3:14, 15

    Mhambe u i hambe iyô i togula sha ityô la tese m-mande u i va mande Yesu la vough nena? (Gal. 3:13; 1 Pet. 2:24