Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 38: Mbamkerev Mba 12

Kwaghôron u sha 38: Mbamkerev Mba 12
Mbamkerev mba ken Iserael

NENGE atam a ikon a ior mban ve tôô ne. Nenge er sumegh ku atam a wain ne ku kehe sha wono. Ka iorov uhar je ve tôô ku sha aga ye. Shi nenge utur man pomegraneti mban. Atam a ikon a doonashe ne a va hana? A va ken tar u Kanaan. Umbur, Kanaan ka ijiir i Aberaham, Isaka man Yakob yange ve lu je la. Kpa sha ci u ijen i yange i gba keregh la yô Yakob, kua tsombor na cii, ve mough ve yem ken Igipiti. Hegen, anyom kar kuma 216 nahan, Mose ngu hemen Mbaiserael hiden yemen a ve ken Kanaan. Ve va a̱r hen ijiir i genegh ken taaikyôngo i i yer er Kadeshi la.

Aferaior mba ken tar u Kanaan. Nahan Mose tindi ior mbamkerev 12, man a kaa a ve er: ‘Za nenge fa nen iyenge ior i i lu ker yô, shi vea̱ lu mbaageev kpaa. Nenge nen a̱ lu inya la ia doo u kahan sule yô. Man shi hide nen a atam a ikon a keregh keng.’

Er mbamkerev mbara mba hidi hen Kadeshi yô, ve kaa a Mose er: ‘Tar la ka u doon je zua ga.’ Man shi sha u tesen ikav yô, ve tese Mose atam a ikon a genegh a ker. Kpa mba 10 ken mbamkerev mbara ve kaa er: ‘Ior mba ve lu ken tar la ka ior mba gban akôr shi ka mbaageev kpaa. Vea wua se kpee je aluer se kaa ser se nyôr ken ú yô.’

Mciem gba Mbaiserael iyol shighe u ve ungwa kwagh ne yô. ‘Guda u yange ma se kpe ken Igipiti shin ken taaikyôngo heen je kpaa,’ ve kaa nahan. ‘A wua se cii ken uitya, shi a kôr kasev asev kua ônov asev ikpan uitya. De se tsua nen orhemen u he i de kera luun Mose ga, man se hide se yem nen ken Igipiti!’

Kpa mbamkerev mba uhar ve suur hen Yehova, man ve nôngo sha u vea sur asema a ior yô. Ati a ve yô ka Yosua man Kalebu. Ve kaa er: ‘De cie nen ga. Yehova ngu a vese. A lu se kwagh u ican u ngohol tar la ga.’ Kpa ior ve ungwa ga. Ve soo er vea wua Yosua man Kalebu je kpaa.

Kwagh ne na Yehova ishima vihin je gande, man a kaa a Mose er: ‘Or môm ken ior mban u nan kom anyom 20 shin nan hembe nahan u nana nyôr ken tar u Kanaan kpa nan ngu ga. Ve nenge uivande mba yange M e̱r ken tar u Igipiti kua mba ken taaikyôngo cii, nahan cii kpa ve suur hen amo ga. Nahan yô vea zende ken taaikyôngo anyom 40 zan zan u masetyô ken ave una kar kpen. Ka Yosua man Kalebu tseegh vea nyôr ken tar u Kanaan ye.’

Numeri 13:1-33; 14:1-38.



Mbampin

  • Kanyi ú lu a mi i ôron sha kwagh u sumegh ku atam a wain ku ku lu ken foto nee, man ka han i zough a ku?
  • Hii nan ve Mose yange tindi iorov 12 ér ve za gba mker ken tar u Kanaanaa?
  • Yange Mbamkerev mba puev hide va kaa a Mose ér nyi?
  • Mbamkerev uhar tese ér ve suur sha Yehova nena, man mbamkerev mba shon yô ka an man ana?
  • Er nan ve ishima i vihi Yehova, man á kaa a Mose ér nyi?

Mbampin mbagenev

  • Ôr Numeri 13:1-33.

    Ka unô yange i tsua ér ve za gba mker ken tar laa, man ka ian i civirigh i nyi ve zua a mini? (Num. 13:2, 3, 18-20)

    Hii nan ve mnenge u Yosua man Kalebu yange kaha kposo a mnenge u mbamkerev mbagenev mbara, man kwagh la tese se nyi? (Num. 13:28-30; Mat. 17:20; 2 Kor. 5:7)

  • Ôr Numeri 14:1-38.

    Ka icintan i nyi i doo u se kura sha kwagh u gban ahon sha ior mba ve til sha ityough ki Yehova shin tar laa? (Num. 14:2, 3, 27; Mat. 25:40, 45; 1 Kor. 10:10)

    Numeri 14:24 tese ér Yehova we hanma or u civir un ikyo nena? (Num. 14:24; 1 Utor 19:18; Anz. 15:3)