Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 36: Wanbua u Zenaria

Kwaghôron u sha 36: Wanbua u Zenaria

KPASH, kpash! Kanyi ior mban ve lu eren hegene? Mba eren msen hen wanbua! Er nan ve lu eren imba kwagh ne nahana?

Mose lun sha uwo shighe ze yum yô, ior mbara ve kaa er: ‘Se fa kwagh u a er Mose ga. Nahan yô de se er nen aôndo u una hemen se una due a vese ken tar ne kera yô.’

Mose gema awen a ahar la ta inya

‘Ka shami,’ Aron anngô u Mose kaa nahan. ‘Tsua nen myôm enev ma ken ato ma zenaria mara, vam nen a mi.’ Ior mba ve a mi yô, Aron sough ma man a er wanbua u zenaria a mi. Man ior ve kaa je er: ‘Ngun ka Aôndo wase je ne, u yange hemen se due a vese ken Igipiti kera ne!’ Tsô Mbaiserael er zege iniongo, man ve gba civir wanbua u zenaria la.

Yehova nengen kwagh ne yô, ishima vihi un kpishi. Nahan a kaa a Mose er: ‘Mough hungwa fefa. Gadia ior ou mba eren kwagh u bo kpishi je. Ve hungur a atindi a am shi mba guren inya hen wanbua u zenaria.’

Ior mba civir wanbua u zenaria

Tsô Mose hungwa sha uwo la fefa. Nahan va mgbôghom ikua yô, ka kwagh u a nenge a mi je ne. Ior lu wan atsam shi vinen amar ningir wanbua u zenaria la! Ishima vihi Mose tsung nahan a gema ikpande i ihiar i lun ipe a atindi shami la a haa kera, i hembe avur avur. Tsô a tôô wanbua u zenaria la a sough un. Shi a wua un hingir mwem.

Ior ne i er kwaghbo u vesen kpishi je. Nahan Mose kaa a mbagenev ken ave er ve̱ tôô usanker vev. ‘Aferaior a yange a civir wanbua u zenaria la cii vea kpe keng,’ kape Mose kaa la. Tsô ior mbara wua iorov 3,000 sha usanker! Kwagh ne tese er gba u se wa ikyo sha u se civir Yehova tseegh, shi se venda u civir mbaaôndo mbaaiev ga he?

Ekesodu 32:1-35.



Mbampin

  • Kanyi kwagh ior mban ve lu eren ken foto heene, man ka sha ci u nyi?
  • Er nan ve ishima yange i vihi Yehova, man Mose va nengen kwagh u Mbaiserael ve lu eren la yô, á er nyi?
  • Mose kaa a ior mbagen ken ve ér ve er nyi?
  • Kwaghôron ne tese se nyi?

Mbampin mbagenev

  • Ôr Ekesodu 32:1-35.

    Kwagh ne tese ér Yehova nengen kwagh u nungwan mcivir u aiegh sha mcivir u mimi la nena? (Eks. 32:4-6, 10; 1 Kor. 10:7, 11)

    Doo u Mbakristu vea er teghelee sha iemberyolough i ve tsough amba er atsam a wan shin amar a vinen nahan la nena? (Eks. 32:18, 19; Ef. 5:15, 16; 1 Yoh. 2:15-17)

    Tsombor u Levi yange ú ver ikyav i dedoo i̱ tilen sha kwagh u perapera dông nena? (Eks. 32:25-28; Ps. 18:25)