Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 35: Yehova Na Atindi A Na

Kwaghôron u sha 35: Yehova Na Atindi A Na

ER VE due ken Igipiti kera iwer kar ihiar yô, Mbaiserael va a̱r hen Uwo u Senai, ú i yer kpaa er Horebi la. Ka ijiir shon i môm i Yehova yange vande ôron kwagh a Mose ken atô u ageva u usu je ne. Ior haa afo heen man ve mem kpeghee.

Er ior ve lu memen shin pev yô, Mose unde sha uwo la. Sha ityough ki woogh shaala la, Yehova kaa a Mose er Un soo er Mbaiserael ve̱ ungwan Un shi ve̱ hingir uicighan mbaiorov Nav. Mose hongo shin inya yô, a ôr Mbaiserael kwagh u Yehova kaa la. Man ior mbara cii ve kaa er vea ungwan imo i Yehova, sha ci u ve soo u lun ior nav.

Hen shighe ne man Yehova er kwagh u kpilighyol. A er ityough ki woogh ki due mnyim, shi a na idyuran i taveraa. Shi a ôr kwagh a ior er: ‘Ka mo Yehova Aôndo wen u yange m due a ven ken Igipiti kera yô.’ Tsô man a wa tindi er: ‘De kera civir nen mbaaôndo mbagenev ga saa mo.’

Ikpande i awen ihiar

Aôndo shi na Mbaiserael atindiakaa agenegh ataankaranyiin, shin atindi. Mciem gba ior mbara iyol kpishi. Ve kaa a Mose er: ‘We ôr kwagh a vese, sha ci u se mba cian ser aluer Aôndo je ôr kwagh a vese yô alaghga se kpe.’

Ken hemen yô Yehova kaa a Mose er: ‘Va hen a mo sha uwo. Me nau ikpande i awen ihiar i lun ipe i M nger atindi a M soo mer ior mban ve kura la yô.’ Nahan Mose shi hide unde sha uwo. Ayange man aime 40 cii a lu shami heregh.

Aôndo ngu á atindi kpishi, kpishi sha ci u ior nav. Mose nger atindi ne cii. Aôndo shi na Mose ikpande i ihiar í lun ipe la. Sha í, Aôndo iyolna nger atindi a 10 a yange ôr hen ior mbara cii la. Ka i yila á er Atindiakaa a Pue.

Mose ngu sha uwo u Sinai

Atindiakaa a Pue la ka atindi a hange hange. Kpa kape atindi agenegh a Aôndo a ne Mbaiserael kpishi la kpaa á lu je la. Môm ken atindi ne yô er: ‘Yehova Aôndo wou a̱ doo u ishima a ishima you cii, a uma wou cii, a mfe wou cii man a agee ou cii.’ Man ugen yô er: ‘Or u nan we ndor a we yô nana̱ doo u ishima er we iyolyou nahan.’ Wan u Aôndo, Yesu Kristu, yange kaa er angan ka atindi ahar a tamen a Yehova yange na ior nav Iserael je ne. Ken hemen yô se hen akaa kpishi sha kwagh u Wan u Aôndo man atesen a na.

Ekesodu 19:1-25; 20:1-21; 24:12-18; 31:18; Duteronomi 6:4-6; Levitiku 19:18; Mateu 22:36-40.



Mbampin

  • Mbaiserael due ken Igipiti iwer ngi kar ihiar yô, ve za haa afo hana?
  • Yehova yange kaa ér un soo ér Mbaiserael ve er nyi, man ve na mlumun ér nyi?
  • Yehova yange na Mose awen a lun ipe a ahar ér nena?
  • Dugh atindi a pue a yange i na Mbaiserael la kera yô, ka atindi agen a nyi Yehova shi na ve?
  • Ka atindi ahar a nyi Yesu yange kaa ér ka a vesene?

Mbampin mbagenev

  • Ôr Ekesodu 19:1-25; 20:1-21; 24:12-18; man 31:18.

    Mkaanem ma i nger ken Ekesodu 19:8 la wase se u kaven kwagh u a lu iyoltseghan i Orkristu la nena? (Mat. 16:24; 1 Pet. 4:1-3)

  • Ôr Duteronomi 6:4-6; Levitiku 19:18; man Mateu 22:36-40.

    Mbakristu ka ve tese ér Aôndo doo ve ishima kua orwanndor a ve nena? (Mar. 6:34; Aer. 4:20; Rom. 15:2)