Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron sha u 52: Gidion man Ior Nav 300

Kwaghôron sha u 52: Gidion man Ior Nav 300

Ú NENGE kwagh u a lu zan hemen heen ne kpa? Mban cii ka ior mbautyaav mba Iserael. Ior mba ve ngurum mbara mba man mngerem. Orjir Gidion ka un a til ikua a ve ye. Ngu nengen er ve lu man mngerem yô.

Kenger ase dedoo igbenda kposo kposo i ior mban ve lu man mngerem la. Mbagenev mba wan zwa shin mnger jim jim. Kpa môm ken a ve ngu kesen mngerem sha ave na man, sha er una nengen kwagh u á lu zan hemen ikua a na yô. Kwagh ne ka kwagh u vesen je, sha ci u Yehova yange kaa a Gidion er a̱ tsua ior mba vea lu kenger kera shighe u ve lu man mngerem la tseegh. Mba vea shi la cii yô, Aôndo kaa er, i̱ zenda ve ve̱ yem ken uya vev. De se nenge ityôkyaa.

Mbaiserael shi mba ken zege mzeiyol hegen. Ityôkyaa yô ve ungwa imo i Yehova ga. Ior mba Midian hemba ve tahav nahan mba nan ve ican kpishi. Nahan Mbaiserael vaa yila Yehova er a̱ wase ve, man Yehova ungwa mliam vem.

Yehova kaa a Gidion er a̱ kohol mbautyaav, nahan Gidion kohol akumautya iorov 32,000 ijiir i môm. Kpa mbautyaav mba ve lu van num sha Iserael la lu iorov 135,000. Nahan cii kpaa Yehova kaa a Gidion er: ‘U ngu a ior ngee yum.’ Ka sha ci u nyi yange Yehova ôr nahana?

Ka sha ci u aluer Iserael hemba ityav mbila yô, alaghga vea lu henen er ve hemba ka sha tahav vev. Alaghga vea hen er yange lu kpee u vea zua a iwasen i Yehova sha u hemban ga. Nahan Yehova kaa a Gidion er: ‘Kaa a ior mba ve lu a mciem iyol mbara cii ve yem ken uya vev.’ Gidion ôron kwagh ne yô, iorov 22,000 ken akumautya na yem ken uya vev. Nahan a shi di a akumautya iyenge 10,000 tseegh mba vea nôngo ityav a akumautya a 135,000 la yô.

Gidion ngu karen ior nav una nenge

Kpa, kegh ato! Yehova kaa er: ‘Ior mba u shi a mi heregh ne kpa ve ngee yum.’ Nahan a kaa a Gidion er a̱ ôr ior ve̱ ma mngerem hen ihongo ne nahan a̱ zenda mba vea gba zwa vea ma mngerem la cii ve yem ken uya vev. ‘Me nau mhembe sha ikev i ior mba 300 mba ve lu̱ kenger kera shighe u ve̱ lu man mngerem la,’ Yehova tôndozwa nahan.

Tsô shighe va kuma u nôngon ityav. Gidion ver ior nav mba 300 mbara akum atar. A na hanmô ve korough ku tôngon, man gber u gbilinigh a akaghausu a yeghen kimi. Ka va kom ken atôutu yô, ve cii ve kohol ken akôngoafoogh a akumautya a ve lu van ityav sha a ve la. Tsô, hen shighe môm, ve cii ve tôngo ikor ve shi ve hembe ugber vev mbara, man ve ger amo er: ‘Sanker u Yehova man u Gidion!’ Tsô akumautya a ve gba iyongo a ve la mba nderen yô, cimin ve kpishi shi cier ve iyol kpaa. Ve cii ve gba yevese, man Mbaiserael hemba ityav.

Mbaajiriv ityouv 6 zan zan 8.



Mbampin

  • Mbaiserael yange ve gba ken akaabo kpishi nena, man lu sha ci u nyi?
  • Hiin nan ve Yehova yange kaa a Gidion ér ngu a ior ken ikyumutya na ngee yumu?
  • Gidion kaa a ior mba ve lu cian la ér ve yem ken uya vev nahan, iorov shi her ume?
  • Nenge foto ne nahan pase er Yehova yange pande iyenge i ikyumutya i Gidion ve mase shin iorov 300 tseegh la.
  • Gidion kohol iorov nav mba 300 mbara nena, man Mbaiserael ve er nan ve ve hemba ityava?

Mbampin mbagenev

  • Ôr Mbaajiriv 6:36-40.

    Gidion yange wa ikyo u eren sha ishima i Yehova nena?

    Se nyian se ker se fa ishima i Yehova nena? (Anz. 2:3-6; Mat. 7:7-11; 2 Tim. 3:16, 17)

  • Ôr Mbaajiriv 7:1-25.

    Kanyi se hen sha kwagh u iorov 300 mba ve lu tsevaa, ve lu er mbagenev mba ve lu tsevaa ga laa? (Mbaj. 7:3, 6; Rom. 13:11, 12; Ef. 5:15-17)

    Vough er iorov mba 300 mbara yange ve hen kwagh sha u nengen ken Gidion nahan, se kpa sé hen kwagh sha u nengen ken Gidion u Tamen, Yesu Kristu nena? (Mbaj. 7:17; Mat. 11:29, 30; 28:19, 20; 1 Pet. 2:21)

    Ka nena Mbaajiriv 7:21 a wase se sha er nyityô iaven i se lu sha mi ken nongo u Yehova yô, i̱ kuma se? (Mbaj. 7:21; 1 Kor. 4:2; 12:14-18; Yak. 4:10)

  • Ôr Mbaajiriv 8:1-3.

    Gbenda u Gidion sôr ayôôso a a va hen atô na man ior mba Eferaim la tese ér gba u se er nyi shighe u kwagh a zough se a anmgbian u nomso shin u kwase laa? (Anz. 15:1; Mat. 5:23, 24; Luka 9:48)