NENGE uimondon kua amondi mba vian mba ve lu menden sha gbough, shin aga ne. Ngun ka gbough ku Aron je ne. Uimondon man atam a ikon a vian ne yange mende sha gbough ku Aron ken tugh môm tseegh! De se nenge kwagh u yange na yô.

Mose ngu nan Aron gbough ku menden imondon

Mbaiserael zende ken taaikyôngo anshighe kar hegen. Ior mbagenev ken ave hen er doo u Mose ma á lu orhemen ve ga, shin Aron kpaa ma á lu pristi u tamen ga. Koraki ngu môm ken mba ve hen nahan la, kua Datan, Abiram man mbahemenev mba iorov 250. Mban cii ve va hen Mose ve va kaa a na er: ‘Ka sha ci u nyi ú kenden a iyolyou sha je er ú hemba se cii nahana?’

Mose kaa a Koraki kua ior mba dondon un mbara cii er: ‘Kper pepe yô tôô nen ugbande mba nanden kwaghhumandoon haa nen kwaghhumandoon shimi. Tsô va nen a min hen tabernakel u Yehova. Nahan se nenge or u Yehova una tsua la.’

Kper sev mbu aven yô Koraki kua ior mba dondon un mba 250 mbara ve va hen tabernakel. Ior mbagenev kpaa kpishi ve va sha u vea va ta ikyaa ken ave yô. Ishima vihi Yehova ker kpishi. ‘Due nen ken utenti mba aferaior ne kera yôô,’ Mose kaa nahan. ‘De benden nen ma kwagh ve ave ga.’ Ior ver ato, tsô ve ka̱r hen utenti mba Koraki, Datan man Abiram kera.

Tsô Mose kaa er: ‘Ka sha kwagh ne man né fa or u Yehova á tsough ye. Inya ia aver zwa ia mena ior mbaaferev mban.’

Er Mose kur kwaghôron ne yô, inya pav. Tenti u Koraki man akaa a yange lu a mi cii kua Datan man Abiram kua mba yange ve lu a ve imôngo mbara cii ve yem shin inya, man inya hide zua her cir ve. Er ior mba ongo mliam ma mba ve lu milen shin inya la yô, ve gba ngoron kaan er: ‘Yevese nen! Gadia se kpaa inya ia mena se!’

Koraki kua ior mba dondon un mba 250 mbara ve lu hen kpe u tabernakel heregh. Nahan Yehova tindi usu, man ve cii ve hia. Tsô Yehova kaa a Eleasar wan u Aron er a̱ tôô ugbande mba nanden kwaghhumandoon mba ior mbakpenev mbara a̱ var iyôv mbi paa paa mbi cirin atse a nanden nagh a mi. Kwagh u cirin atse a nanden nagh sha mi ne ka u una lu ikav hen Mbaiserael u ve̱ fa er dugh Aron kua ônov nav kera yô or môm ugen nana̱ de eren tom u pristi sha ci u Yehova ga.

Kpa Yehova soo u tesen waeng er ka Aron kua ônov nav un tsough er ve̱ lu upristi ye. Nahan a kaa a Mose er: ‘Kaa orhemen u hen hanma kwe u Iserael nana̱ va a gbough ku nan. Hen kwe u Levi yô, kaa Aron a̱ va a gbough nagh. Tsô ver igbough mbila cii ken tabernakel sha ishigh ki areki u ikuryan. Gbough ku or u M tsough mer nana̱ lu pristi la kua kpar uimondon.’

Tsô kper pepe Mose nengen yô, kpei, gbough ku Aron ku lu a uimondon man mbaamondi mba vian yugh yugh mba ve mende sha ku yô! Nahan hegen yô ú nenge er i hii ve Yehova yange na gbough ku Aron ku kpar uimondon kpa?

Numeri 16:1-49; 17:1-11; 26:10.



Mbampin

  • Ka unô yange ve hendan a tahav mbu Mose man Arono, man ve kaa a Mose ér nyi?
  • Mose kaa a Koraki kua ior mba 250 mba ve dondo un la ér ve̱ er nyi?
  • Mose kaa a Mbaiserael ér nyi, man yange kur kwaghôron na yô, nyi kwagh i ere?
  • Kanyi i er Koraki kua ior mba 250 mba ve dondo un laa?
  • Eleasar wan u Aron tôô agbande a nanden kwaghhumandoon a ior mbakpenev mbara er nyi a mini, man lu sha ci u nyi?
  • Hii nan ve Yehova er gbough ku Aron kpar uimondono? (Nenge foto)

Mbampin mbagenev

  • Ôr Numeri 16:1-49.

    Kanyi Koraki kua ior mba ve dondo un la ve ere, man hii nan ve kwagh u ve er la lu ieren i hemban Yehova ato? (Num. 16:9, 10, 18; Lev. 10:1, 2; Anz. 11:2)

    Ka mnenge u kpee u nyi yange Koraki man “mbahemen ior” mba 250 mbara ve lu a mini? (Num. 16:1-3; Anz. 15:33; Yes. 49:7)

  • Ôr Numeri 17:1-11 man 26:10.

    Uimondon mba gbough ku Aron kpar la tese ér nyi, man Yehova yange kaa ér i wa ku shin areki sha ci u nyi? (Num. 17:5, 8, 10)

    Ka kwagh u injaa u nyi se zough a mi ken ikyav i gbough ku Aron laa? (Num. 17:10; Aer. 20:28; Fil. 2:14; Heb. 13:17)