Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron sha 34: Inja Kwaghyan I He

Kwaghôron sha 34: Inja Kwaghyan I He

Ú FATYÔ u ôron kwagh u ior mban ve lu sangen hen inya heen ne kpa? Ngu er ka avure nahan. Ngu pupuu, man ngu ipe shi ngu paapaa. Kpa ka avure ga; ka kwagh u yan.

Mbaiserael mba kohol mana

Kuma hegen uwer môm nahan tseegh er yange Mbaiserael ve due ken Igipiti kera yô. Mba ken taaikyôngo hegen. Kwaghyan menden heen kpeghee tseegh, man sha ci u nahan yô ior gba hunan, kaan er: ‘Se tôm ser Yehova yange ma wua se ken Igipiti. Keera yô abunde kera kera kpa kwaghyan u dedoo u se soo la di tsô yô yange se lu a mi.’

Nahan Yehova kaa er: ‘Me er kwaghyan una nôô sha abeen una haa shin inya.’ Man ka kwagh u Yehova er kpaa je la. Sev mbu gen mbu aven yô Mbaiserael nenge kwagh u pupuu ne haa, tsô ve gba pinen ayolave er: ‘Ka nyi ne?’

Mose kaa er: ‘Ngun ka kwaghyan u Yehova á ne ne er ne̱ ya je ne.’ Ior yila un er MANA. Ngu ken zwa er kuese u i kaa un i we iyough nahan.

‘Ka u hanmaor nana̱ kohol un sha mye u nan,’ Mose kaa a ior nav nahan. Nahan hanma pepe yô lu kwagh u ior ve eren je ne. Tsô, oo ua̱ taan yô, mana u a shi hen inya la a sough.

Mose shi kaa er: ‘Or môm nana̱ de deen mana la a̱ luun her zan zan sev mbu aven ga.’ Kpa ior mbagenev ungwa ga. Ú fa kwagh u yange e̱r kpa? Sev mbua aven yô mana u i ver her la cii a gba azôô, shi a huma kpaa!

Nahan cii kpaa, iyange i môm i lu ken sati i̱ Yehova kaa a ior mbara er ve̱ kura mana u ve vanden kuran la kwa har yô. Ka iyange i sha ataratar je la. Man Yehova kaa er i̱ ver ugen a̱ tsa her sev mbu̱ av, sha ci u una haa ugen sha iyange i sha utaankaruhar la ga. Er ve ver mana la her zan zan iyange i sha utaankaruhar la yô, a kera gba azôô ga man shi á kera huma kpaa ga! Ngun kpa ka ivande i genegh!

Anyom a Mbaiserael tsa ken taaikyôngo la cii Yehova koso ve sha mana.

Ekesodu 16:1-36; Numeri 11:7-9; Yosua 5:10-12.



Mbampin

  • Kanyi kwagh ior mban ve lu sangen hen inya ken foto nee, man mba yer kwagh shon ér nyi?
  • Ka akaawan a nyi Mose yange na Mbaiserael sha er i gbe u vea sangen mana?
  • Yehova kaa a ior mbara ér ve er nyi sha iyange i sha ataratar laa, man lu sha ci u nyi
  • Yange a̱ ver mana la una tsa her zan zan kpernan u iyange i sha utaankaruhar la yô, Yehova a er nyi ivande?
  • Yehova yange koso ior nav sha mana kuma shighe nena?

Mbampin mbagenev

  • Ôr Ekesodu 16:1-36 man Numeri 11:7-9.

    Ekesodu 16:8 ôr er i gbe u se nan ior mba Aôndo a tsough a ver ér ve hemen ken tiônnongo u Kristu la icivir nena? (Heb. 13:17)

    Yange i umbur Mbaiserael ayange ayange ken taaikyôngo ér gba u vea suur sha Yehova nena? (Eks. 16:14-16, 35; Dut. 8:2, 3)

    Yesu yange tôô mana la kar sha nyi, man se zua a mtsera ken “kwaghyan u a dugh sha” la nena? (Yoh. 6:31-35, 40)

  • Ôr Yosua 5:10-12.

    Mbaiserael yange ve ya mana kuma anyom a me, kwagh ne lu ikyaren hen a ve nena, man kwagh ne tese se nyi kwagha? (Eks. 16:35; Num. 11:4-6; 1 Kor. 10:10, 11)