Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 32: Atsan A 10

Kwaghôron u sha 32: Atsan A 10

KENGER ufoto mban. Hanmô yô tese ican i yange Yehova va a mi sha Igipiti yô. Ken foto u hiihii la u fatyô u nengen er Aron a lu gbidyen gbough nagh sha Ifi u Nil yô. Yange eren nahan yô, mngerem ma shin ifi la cii ma hingir awambe. Ishu kpe, man ifi cii hii u human.

I va a atsan sha Mbaigipiti

U dondon yô, Yehova na asôhô due shin Ifi u Nil. Á lu hanma ijiir cii—ken atse, shin atsenge a kaan kwagh, sha ugambe mbaiorov—hanma ijiir cii. Yange asôhô la nga kpen yô Mbaigipiti ve kohol á ve ta atihi atihi, man tar la cii ge̱r ihuma sha ci u á.

Tsô shi Aron gbidye gbough nagh inya, man ihuundu la i hingir inyarev mbi nyuman. Mban ka ankaam ma purugh ma cuku cuku mba nyuman. Inyarev mbi nyuman mbila lu ican i sha utar sha tar u Igipiti je la.

Atsan a genegh cii yange e̱r Mbaigipiti tseegh, e̱r Mbaiserael ga. Ican i sha unyiin yô lu akughô a yange iv ken ayou a Mbaigipiti cii la. Ican i sha utaan i̱ lu sha uzendenya. Abua man iyôngo kpishi kua ivo i Mbaigipiti cii yange í kpe.

U dondon yô, Mose man Aron ve kese mtwem ve tsenda ma sha ahumbe. Yange ve na atundu a hughum haa ior kua uzendenya kpaa. Ngun lu ican i sha ataratar je la.

Ngura been kera yô Mose kende uwegh nagh sha kwavaôndo, man Yehova tindi a idyuran man awombo. Lu nôôura u awombogh u hemban vihin u Igipiti zua a mi sha won cii je la.

Ican i sha anigheni i̱ lu zege ibeenegh ki ikomon. Lu i̱ i lu a̱ vande nengen a min ga shi i kera nenge a imba ikomon la ga hii shighe la je. Yange í ya hanmakwagh u awombo yange tim un ga la cii.

Ican i sha utaankarunyiin yô lu angôghime. Ayange atar cii zege ime cir tar la cii, kpa Mbaiserael yô ve lu a iwanger hen ape ve lu la.

U masejime yô, Aôndo kaa a ior nav er ve̱ shighe awambe a wanivo shin waniyôngo sha ikpandehunda ve. Tsô ortyom u Aôndo zende kar ken tar u Igipiti. Ortyom la una nengen a awambe yô, a kera wua ma or hen ya la ga. Kpa ken uya mba i shighe awambe sha ikpandehunda ga cii yô, ortyom u Aôndo wua ônovmbauindav mba or kua zendenya cii. Ngun ne lu ican i sha 10 je la.

Ican i masejime ne i eren yô, Farao kaa a Mbaiserael er ve̱ yem. Ior mba Aôndo yange ve vande wan ago iyol sha u yemen, man hen tugh mbura je ve hii zende ve u duen ken Igipiti kera.

Ekesodu ityouv 7 zan zan 12.



Mbampin

  • Nenge ufoto mba ve lu heen ne, nahan pase atsan a atar a hiihii a Yehova yange va a mi sha Igipiti la.
  • Atsan a atar a hiihii la yange lu kposo a atsan agen la cii nena?
  • Ican i sha unyiin man i̱ sha utaan man i̱ sha ataratar la lu nyi?
  • Pase ican i sha utaankaruhar man i̱ sha anigheni man i̱ sha utaankarunyiin la.
  • Yehova yange kaa a Mbaiserael ér ve er nyi cii ve una va a ican i sha pue laa?
  • Ican i sha pue la lu nyi, man yange mba ve a i̱ kera yô, nyi kwagh i ere?

Mbampin mbagenev

  • Ôr Ekesodu 7:19-8:23.

    Er mbaahiriv mba Igipiti mbara yange ve er atsan ahar a hiihii la vough er Yehova va a mi sha Igipiti nahan kpa, i kighir ve ve lumun nyi zum u i va a ican i sha utar laa? (Eks. 8:18, 19; Mat. 12:24-28)

    Ican i sha unyiin la tese tahav mbu Yehova a lu a mi mbu kuran ior nav la nena, man er mbacivir Aôndo ve fe kwagh ne nahan, ka ve ken ishima nena er ve tagher ishigh a “zegecan” u i tsengeôron laa? (Eks. 8:22, 23; Mpa. 7:13, 14; 2 Kron. 16:9)

  • Ôr Ekesodu 8:24; 9:3, 6, 10, 11, 14, 16, 23-25; man Ekesodu 10:13-15, 21-23.

    Atsan a pue la pon iniongo ihiar i nyi, man kwagh ne benda a mnenge u se nengen iniongo i ihiar la nyian nena? (Eks. 8:10, 18, 19; 9:14)

    Ekesodu 9:16 wase se u kaven er i hii ve Yehova a de Satan a lu her zan zan nyian ne nena? (Rom. 9:21, 22)

  • Ôr Ekesodu 12:21-32.

    Paseka yange yima ior kpishi nena, man Paseka la tile sha ityough ki nyi? (Eks. 12:21-23; Yoh. 1:29; Rom. 5:18, 19, 21; 1 Kor. 5:7)