Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 30: Ageva u Usu

Kwaghôron u sha 30: Ageva u Usu

MOSE yange va zan zan je va a̱r hen uwo u Horebi sha u keren toho sha ci u iyôngo na. Heen ne a nenge a ageva lu yeghen usu, kpa lu hian ga!

Mose ngu hen ageva u yeghen usu

‘Kwagh ne kpilighyol tsôô,’ Mose hen ken ishima na nahan. ‘De m za ikua m za nenge dedoo yôô.’ Ze yô, imo due ken atô u ageva la, kaa er: ‘De kporom heen ga. Tsua akôv shin angahar a ou kera, gadia ijiir i u til her ne ka icighanjiir je.’ Lu Aôndo je lu lamen sha zwa u ortyom ye, nahan Mose cir ishigh inya.

Tsô Aôndo kaa er: ‘M nenge a ican i ior av ve lu yan ken Igipiti la. Nahan m sen sha u me va yima ve, man ka we me tindi sha er ú za hemen ve ú due a ior av ken Igipiti kera ye.’ Lu u Yehova una va a ior nav ken tar u doonashe u Kanaan la.

Kpa Mose kaa er: ‘Mo m ngu ma or ga. A er nan ve me fatyô u eren imba kwagh ne nahana? Kpa aluer m za ye. Mbaiserael vea pinem er: “Ka an nan tindi we?” Tsô me kaa a ve mer nyi?’

Aôndo kaa a na er: ‘Ka kwagh u ú ôr ve ne, “YEHOVA Aôndo u Aberaham, Aôndo u Isaka man Aôndo u Yakob tindim hen a ven.” ’ Shi Yehova seer er: ‘Ngun ka iti yam gbem sha won.’

Mose kaa er: ‘Kpa aluer vea nam jighjigh shighe u me kaa ve mer u tindim la ga ye.’

Aôndo pine un er: ‘Ka nyi ú lu a mi sha uwe laa?’

Mose kaa er: ‘Ka gbough.’

Aôndo kaa er: ‘Kende ku hen inya.’ Tsô Mose eren nahan yô, gbough kura ku hingir iyô. Tsô Yehova shi tese Mose ivande igenegh. A kaa er: ‘Wa uwegh ou ken ikondo you.’ Mose er nahan, man dughun uwegh nagh kera yô, ku kungu segh segh er awombo nahan! Uwegh kura ku lu inja er ku a angev mbu bov mbu i yer er imande la nahan. U seer yô Yehova na Mose tahav sha u a̱ er ivande i sha utar yô. Ken masejime yô a kaa er: ‘U eren uivande mban yô Mbaiserael vea na jighjigh er M tindiu.’

Kwagh ne been kera yô Mose mough yem ken ya za kaa a Yetero er: ‘Wea lumun yô de m hide m yem ken ape anmgbianev av ve lu ken Igipiti la sha er me za nenge er ve lu yô.’ Nahan Yetero kaa a Mose er a̱ za dedoo, man Mose mough kôr gbenda la u hiden ken Igipiti.

Ekesodu 3:1-22; 4:1-20.



Mbampin

  • Uwo u ú lu ken foto heen ne mba yer ú iti ér nyi?
  • Pase kwagh u kpilighyol u Mose za a iyôngo na sha uwo ve, nenge a mi la.
  • Yange imo ôr kwagh ken ageva u usu kaa ér nyi, man imo la lu í ana?
  • Aôndo yange kaa a Mose ér ka un una za hemen ior nav una due a ve ken Igipiti kera ye, nahan Mose gema kaa ér nyi?
  • Aôndo yange kaa ér aluer vea pine Mose or u nan tindi un yô, a̱ kaa ér nyi?
  • Mose una er nyi ve, una tese ér mimi je ka Aôndo a tindi unu?

Mbampin mbagenev

  • Ôr Ekesodu 3:1-22.

    Kwagh u er Mose la taver se ishima ér aluer ka se inja er se yina sha ma tom u i we se je kpa, Yehova una suur se nena? (Eks. 3:11, 13; 2 Kor. 3:5, 6)

  • Ôr Ekesodu 4:1-20.

    Kanyi mgem i̱ va ken Mose ken anyom 40 a á tsa ken Midian laa, nahan mba í lu saren ve u ma i ver ve sha aan a tom ken tiônnongo la vea zua a ityesen i nyi sha kwagh nee? (Eks. 2:11, 12; 4:10, 13; Mika 6:8; 1 Tim. 3:1, 6, 10)

    Aluer Yehova tsaha se sha ikyev i nongo na je kpa, ikyav i Mose la i̱ na se vangertiôr ér nyi? (Eks. 4:12-14; Ps. 103:14; Heb. 12:4-11)