Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 29: Ityôkyaa I Yange Mose Yevese Yô

Kwaghôron u sha 29: Ityôkyaa I Yange Mose Yevese Yô

NENGE er Mose a lu yevese duen ken Igipiti kera yô. Ú nenge ior mba ve lu zendan un la kpa? Ú fa er i hii ve ve soo u wuan Mose kpa? De se nenge aluer se fatyô u fan yô.

Mose ngu yevese duen ken Igipiti kera

Mose yange vese hen ya u Farao, orhemen u Igipiti. A hingir or u lun a mfe tsung shi lun a tahav kpaa. Mose yange fa dedoo je er un ngu Origipiti ga, kpa fa er mbamaren nav kpôô kpôô lu Mbaiserael mba ve lu ikpan la yô.

Iyange igen, shighe u a lu anyom 40 la, Mose mough sha u una za nenge er ior nav ve lu yô. Yange lu kwagh u kpiligh un iyol sha u nengen e̱r i lu eren ve ican yô. A nenge Origipiti nan lu gbidyen Oriserael u yange lu kpan yô. Mose kenger keen man keen, fe ér or ngu nengen ga yô, á gbidye Origipiti la, man Origipiti la kpe. Tsô Mose yer ikyom i or la shin waalawa.

Kper nan yô Mose shi mough sha u una za nenge er ior nav ve lu yô. Yange hen er una wase ve sha er vea kera lu ikpan ga yô. Kpa a nenge Mbaiserael iorov uhar ve lu nôngon num, nahan Mose kaa a u môm u iboogh la er: ‘Ka nyi u gbidi anngôwe?’

Or la gema kaa er: ‘Ka an nan verugh orhemen man orjir sha a vese? Ú soo wer u wuam vough er yange u wua Origipiti la nahanaa?’

Tsô mciem gba Mose iyol. A fa je er ior fa kwagh u yange un er a Origipiti la. Farao je kpa ungwa kwagh sha mi, man a tindi ior er ve̱ wua Mose. Kape i hii ve Mose due yevese ken Igipiti kera je la.

Mose undun Igipiti yô, a yem ca je ken tar u Midian. Keela la a za zua a tsombor u Yetero, man a vôso môm ken ônov nav mba kasev u i yilan er Shipora la. Mose hingir orkuranilev man nengen sha iyôngo i Yetero. A tsa ken tar u Midian anyom 40. A lu anyom 80 hen shighe ne. Tsô iyange igenegh, shighe u Mose lu nengen sha iyôngo i Yetero yô, kwagh u kpilighyol er u a gema uma u Mose jimin cii yô.

Ekesodu 2:11-25; Aerenakaa 7:22-29.



Mbampin

  • Mose vese hana, kpa gema fa nyi sha kwagh u mbamaren nava?
  • Yange Mose kom anyom 40 yô, maa er nyi?
  • Mose yange kaa a Oriserael u lu nôngon num a anngô na la ér nyi, ngula di gema na un mlumun ér nyi?
  • Kanyi yange i̱ na ve Mose yevese undu Igipiti?
  • Mose yange yevese yem hana, gema za kohol an hen ijiir shono?
  • Anyom 40 a Mose yevese undu Igipiti la cii, lu eren nyi?

Mbampin mbagenev

  • Ôr Ekesodu 2:11-25.

    Er i tese Mose kwaghfan u Mbaigipiti cica cii nahan kpa, or ti tese ér un ta ikyaa a Yehova man ior nav nena? (Eks. 2:11, 12; Heb. 11:24)

  • Ôr Aerenakaa 7:22-29.

    Iniôngon i Mose nôngo ér una yima Iserael una due a na ken uikyangen sha ikyev i Mbaigipiti kera sha tahav nav la tese se nyi? (Aer. 7:23-25; 1 Pet. 5:6, 10)