Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 27: Tor u Bo Hemen ken Igipiti

Kwaghôron u sha 27: Tor u Bo Hemen ken Igipiti

IOR mba ve lu heen ne mba kighir ior er ve̱ er tom. Nenge or u á lu gbidyen môm ken mbatomov sha akpá la! Mbatomov mbara ka mba ken tsombor u Yakob, man mba yer ve er Mbaiserael. Man ior mba ve lu kighir ve er ve̱ er tom la ka Mbaigipiti. Mbaiserael hingir ikpan i Mbaigipiti. Hii nan ve yange kwagh er nahana?

Mbaigipiti mba nzughul a Mbaiserael

Anyom kpishi tsombor u Yakob u lu ken Igipiti ken bem. Yosev, un u yange lu or u dondon ken Farao tor la, yange nengen sha ave. Nahan cii kpaa Yosev va kpe kera. Man Farao u he, u soo Mbaiserael ga yô, tema tor ken Igipiti.

Nahan Farao u vihinkwagh ne gema Mbaiserael ve hingir ikpan. Man a ver ior mba nengen sha a ve mba yange ve vihi anza shi ve wa afer tsung yô. Yange ve kighir Mbaiserael sha u ve̱ er tom kpogholoo sha u maan agar sha ci u Farao yô. Nahan cii kpaa Mbaiserael za hemen u seer iyenge. Shighe ze deghôô yô Mbaigipiti hii u cian er Mbaiserael vea va ngee a gande nahan vea hemba ve tahav.

Mbaigipiti mba nzughul a Mbaiserael

Ú fa kwagh u yange Farao er kpa? A ôr kwagh a kasev mba kôron kasev Mbaiserael mar la a kaa er: ‘Wua nen hanma wanikundan u nomso u ve mar yô keng.’ Kpa kasev mban lu mba fankwagh, nahan ve wuan anikundanev mbara ga.

Nahan Farao wa ior nav cii tindi er: ‘Kôr nen anikundanev mba Mbaiserael mbanomso cii wua nen ve. Ka anikundanev mbakasev tseegh ne de ve ve̱ lu uma ye.’ Tindi la lu u bo kpishi je gaa? De se nenge er yange môm ken anikundanev mbara war yô.

Ekesodu 1:6-22.



Mbampin

  • Ka an nan ker akpa ken foto heenee, man nan ngu gbidyen an a mini?
  • Yosev kpen kera cii yô, lu nyi i̱ tser Mbaiseraele?
  • Kanyi i̱ na ve Mbaigipiti nyôr cian Mbaiseraelee?
  • Farao kaa a kasev mba ve kôron kasev mba ken Iserael mar la ér nyi?

Mbampin mbagenev

  • Ôr Ekesodu 1:6-22.

    Yehova yange hii u kuren ityendezwa i̱ á er a Aberaham la sha nyi gbenda? (Eks. 1:7; Gen. 12:2; Aer. 7:17)

    Kasev mba yange ve kôron kasev Mbaheberu mar mbara ve wa uma ikyo nena? (Eks. 1:17; Gen. 9:6)

    Kasev mba kôron mar mbara yange ve zua a mtsera u nyi sha jighjigh ve u nan laa? (Eks. 1:20, 21; Anz. 19:17)

    Satan yange nôngo ér una nzughul a awashima u Yehova sha kwagh u Vor u Aberaham ú i er ityendezwa sha ú la nena? (Eks. 1:22; Mat. 2:16)