Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 26: Yobu Na Jighjigh hen Aôndo

Kwaghôron u sha 26: Yobu Na Jighjigh hen Aôndo

KUNYA kôr u a oruange ne kpa? Iti na er Yobu, man kwase la ka kwase na. Ú fa kwagh u á lu ôron a Yobu kpa? ‘Venda Aôndo yô kpe kera.’ De se nenge er i hii ve i hingir u una ôr imba kwagh la nahan la, man shi er i hii ve Yobu yange ya ican yum yô.

Yobu ngu atundu iyol

Yobu lu orjighjigh u ungwan imo i Yehova. Lu ken tar u Ushi, ica ga a tar u Kanaan. Yange Yobu doo Yehova ishima kpishi, kpa orgenegh lu u nan kôr un ihom yô. Ú fa nan kpa?

Er Lu Satan Diabolo. Umbur, Satan ka ortyom u bo u a soo Yehova ga yô. Yange fatyô u bumen Adam man Ifa nahan ve hemba Yehova ato, man a hen je er una fatyô u geman hanmaor sha u nan kpaa nana̱ hemba Yehova ato yô. Kpa yange fatyô je he? Ei. Hen ase sha kwagh u ior man kasev mba nan jighjigh kpishi mba se vande henen kwagh ve la. Ka u me ú fatyô u yilan ati ave?

Yakob kua Yosev yange ve kpe kera ken Igipiti yô, Yobu lu or u hemban lun a jighjigh u nan hen Yehova shin tar cii. Yehova soo er una tese Satan er una fatyô u geman hanmaor sha u nana er kwaghbo ga, nahan a kaa er: ‘Nenge sha Yobu. Nenge er á ne jighjigh her amo yô.’

Satan nyiman kaa er: ‘A na jighjigh ka sha ci u ú ver un dedoo shi ú na un akaa a dedoo kpishi. Kpa aluer ú tôô á cii kera yô, una venda u kpee je.’

Nahan Yehova kaa er: ‘Za hemen. Tôô á kera. Er hanmakwagh u ifer u ú soo cii sha iyol i Yobu. Tsô se nenge aluer una vendam yô. Kpa wa iko sha er ú wua un ga di tsô.’

Hiihii yô, Satan ná ior ve za ii abua man urakumi mba Yobu, shi iyôngo na kpaa i wua. Nahan shi a wua ônov nav 10 mbanomso kua mbakasev ken zege hiar. U dondon yô, Satan shi na Yobu bouange ne. Yobu yange ya ican kpishi je. Ka ityôkyaa la yange kwase u Yobu kaa a na er: ‘Venda Aôndo tsô kpe kera’ ye. Kpa Yobu una er kwagh la ga. Shi, akar a aiegh atar va shi va kaa a na er yange lu eren akaabo. Kpa Yobu za hemen u kôron jighjigh na u nan heregh.

Kwagh ne na Yehova msaanyol kpishi, man ken hemen yô a na Yobu averen kpishi, er ú nenge ken foto ne nahan. A bee un angev nav. Yobu hide mar ônov 10 mba doonashe, man shi zua a ibua ngee hemba i yange vande lun a min la kwa har, iyôngo man urakumi kpaa nahan.

We ú kôr jighjigh wou u nan hen Yehova gbang gbang hanma shighe er Yobu nahan kpa? Aluer u er nahan yô, we kpaa Aôndo una nau iveren. Ú fatyô u lun uma gbem sha won shighe u á gema tar cii ua hingir u engem er sule u Eden nahan la.

Yobu 1:1-22; 2:1-13; 42:10-17.

Yobu vea tsombor na


Mbampin

  • Yobu lu nyi oro?
  • Kanyi kwagh Satan yange nôngo ér una ere, nahan kôr cio kpa?
  • Yehova yange na Satan ian ér a̱ er nyi, man lu sha ci u nyi?
  • Kanyi i̱ na ve kwase u Yobu kaa a na ér “venda Aôndo, yô, kpe kera”? (Nenge foto ne.)
  • Er ú nenge ken foto heen nahan, Yehova ver Yobu doo doo nena, man er nahan sha ci u nyi?
  • Aluer se kpa se na jighjigh er Yobu ngise na jighjigh nahan yô, ka averen a nyi se zua a mini?

Mbampin mbagenev

  • Ôr Yobu 1:1-22.

    Mbakristu vea dondo ikyav i Yobu la nyian nena? (Yobu 1:1; Fil. 2:15; 2 Pet. 3:14)

  • Ôr Yobu 2:1-13.

    Yobu nenge tôvacan u Satan la nena, kpa kwase na di gema nenge un nena? (Yobu 2:9, 10; Anz. 19:3; Mika 7:7; Mal. 3:14)

  • Ôr Yobu 42:10-17.

    Mtsera u Yobu va zua a mi la ve zua sha u Yesu kpa va zua a mi sha uma na u jighjigh la sha nyi gbenda? (Yobu 42:12; Fil. 2:9-11)

    Averen a Yobu tile sha mimi na her dông ve, va zua a mi la taver se ishima nena? (Yobu 42:10, 12; Heb. 6:10; Yak. 1:2-4, 12; 5:11)