Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 25: Tsombor la Yem ken Igipiti

Kwaghôron u sha 25: Tsombor la Yem ken Igipiti

YOSEV kera fatyô u wan ishima ga. A kaa a mbatomov nav cii er ve̱ due ken iyou la kera. Hingir tswen vea anngôôv nav yô, Yosev man hii mliam ma vaan. Tsô se fa er á kpiligh anngôôv nav iyol yô, sha ci u ve fa ityôkyaa i i hii ve á lu vaan ga. Ken masejime yô a kaa er: ‘Ka mo Yosev je ne. Terem ngu uma heregh kpa?’

Kondo anngôôv nav iyol je ve kera fatyô u ôron kwagh ga. Cier ve iyol. Kpa Yosev kaa er: ‘Nea lumun yô kporom nen ikua.’ Mba kporom yô, a kaa er: ‘Ka mo anngô wen Yosev, u yange ne tee ken Igipiti la.’

Yosev za hemen u lamen a ve bem bem: ‘Asema a de kera vihin ne sha er yange ne teem heen yum ga. Lu Aôndo jim je tindim ken Igipiti er m va war uuma mbaiorov ye. Farao verem m ngu orhemen sha tar ne cii. Nahan yô za nen hen terem fefa man za ôr nen un kwagh ne. Shi ôr nen un a̱ va tema twev heen.’

Tsô Yosev kuve anngôôv nav mbanomso mbara, shi a kôr ve ave sha mon a suse ve ijô cii. Shighe u Farao ungwa er anngôôv mba Yosev ve va yô, a kaa a Yosev er: ‘Ve̱ tôô akeke ve̱ za va a ter ve kua icombor ve cii heen. Me na ve veghertar u a hembe doon ken Igipiti cii la.’

Ka kwagh u ve e̱r je la. Heen ne ú nenge Yosev va zua vea ter na shighe u á va ken Igipiti aa tsombor na cii la.

Tsombor u Yakob hingir zegenan je. Kohol cii yô yange ve lu 70 shighe u ve mough ve yem ken Igipiti la, u ôron iyenge i Yakob man ônov nav kua ônov mba ônov nav yô. Kpa shi yange kasev vev kpaa ve lu̱, man shi alaghga yange vea lu a ikpan kpaa kpishi je. Mban cii ve za tema twev ken Igipiti. Yange i yilan ve er Mbaiserael, sha ci u Aôndo vande geman iti i Yakob hingir Iserael. Mbaiserael ve hingir uicighan mbaiorov hen Aôndo, e̱r se va nenge ken hemen nahan.

Genese 45:1-28; 46:1-27.

Yosev vea tsombor na


Mbampin

  • Yosev pase iyol na hen anngôôv nav yô, lu nyi i̱ ere?
  • Ka nyi kwagh Yosev lu pase anmgbianev nava?
  • Farao ungwa agwa u anngôôv mba Yosev yô, kaa ér nyi?
  • Zum u tsombor u Yakob mough yem ken Igipiti la, ú lu iorov ume?
  • Ken masejime yô, í va gema yilan tsombor u Yakob ér nyi, man lu sha ci u nyi?

Mbampin mbagenev

  • Ôr Genese 45:1-28.

    Kwagh u yange er Yosev la tese ér Yehova una fatyô u kôron kwagh u i er ér a̱ bula mba civir un la, una hingir kwagh u van ve a mtsera nena? (Gen. 45:5-8; Yes. 8:10; Fil. 1:12-14)

  • Ôr Genese 46:1-27.

    Yakob mough u yemen ken Igipiti yô, Yehova taver un ishima kaa a na ér nyi? (Gen. 46:1-4)