Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 23: Mnyam Ma Farao

Kwaghôron u sha 23: Mnyam Ma Farao

ANYOM kar ahar, Yosev ngu ken gaadi heregh di tsô. Ortoonkwaghman la ngu a̱ umbur un ga. Tsô tugh mbu genegh yô mnyam ma kpilighyol mhar cier Farao, nahan lan un ishima u fan inja i ma. Ú nenge er a lu yaven heela kpa? Sev mbu aven pepe yô Farao yila mbakavenkwagh nav man ôr ve mnyam nam mara cii. Kpa ve fatyô u pasen un inja i mnyam nam mara ga.

Ken masejime yô ortoonkwaghman la mase umbur Yosev. A kaa a Farao er: ‘Shighe u yange m lu ken gaadi la or lu keregh u nan pasen inja i mnyam ma cier yô.’ Farao tindi er i̱ dugh Yosev ken gaadi i va a na fese je.

Farao ôr Yosev mnyam nam: ‘M nenge a abua ataankarahar a kehen, doon nengen. Tsô m nenge a abua ataankarahar a genegh vihi ashe tsung shi kande kpishi. Man á kanden tsung ne gema kôr abua a kehen la ya.

Mnyam ma cier Farao

‘Ken mnyam am ma sha uhar la m nenge a asagher aa alakema ataankarahar due sha itine môm, wa king king doo u nengen. Tsô shi m nenge aa asagher agen ataankarahar lu tsuasaa, uma kera. Man asagher a tsuasaa la gba menan asagher ataankarahar a doon la.’

Yosev kaa a Farao er: ‘Mnyam ma mhar mara ma inja i môm tsô. Abua a dedoo aa ataankarahar man asagher aa alakema aa ataankarahar la ka anyom ataankarahar je la, man abua aa kanden a ataankarahar la kua asagher a ataankarahar a tsaasaa la kpaa ka anyom agen di ataankarahar je la. Anyom nga van ataankarahar aa iyiav mbia ngee ken Igipiti cii yô. Shi anyom ataankarahar aa va a kwaghyan una ban kpishi yô.’

Nahan Yosev kaa a Farao er: ‘Tsua or u fan kwagh man ver nan nana̱ lu ityough sha u kohol kwaghyan ken anyom ataankarahar aa iyiav mbia dumbur ne. Tsô ior vea kera kpe ijen shighe u anyom ataankarahar aa ijen ia va la ga.’

Mhen la doo Farao. Man a tsua Yosev er a̱ kohol kwaghyan la, shi a̱ ombo. Yosev hingir or u hemban cii ken Igipiti, u dondon ken Farao.

Anyom nga karen anigheni, sha shighe u ijen gba la yô, Yosev nenge a ior mbagenev ve lu van. Ú fa ior mba shon kpa? Kpei, ka anngôôv nav mbavesen mbanomso mba 10 mbara! Ter ve Yakob tindi ve ken Igipiti sha ci u kwaghyan lu been ken tar ve ken Kanaan. Yosev kav anngôôv nav, kpa ve yô ve kav un ga. Ú fa ityôkyaa kpa? Ka sha ci u Yosev vese seer, shi a hua akondo agenegh kposo.

Yosev umbur er shighe u yange un lu wanye la mnyam cier un er anngôôv nav va gure un inya. Ú umbur er ú vande ôron kwagh la kpa? Nahan Yosev fatyô u kaven e̱r i lu Aôndo a tindi un ken Igipiti nahan, man shi ka sha ityôkyaa injaa kpaa. Ú hen wer Yosev yange er nena? De se nenge.

Genese 41:1-57; 42:1-8; 50:20.



Mbampin

  • Yange igen tugh ile yô, lu nyi i̱ er Farao?
  • Kanyi yange i̱ na ve ortoonkwaghman la mase va umbur Yoseve?
  • Er i tese ken foto heen nahan, ka nyi mnya yange i cier Farao kwa hara?
  • Yosev yange pase inja i mnyam mara ér ka nyi?
  • Kanyi yange i̱ na ve Yosev va hingir orvesen u hemban cii ken Igipiti, je mase dondon ken Farao tswene?
  • Anngôôv mba Yosev va ken Igipiti ér vea va er nyi, man er nan ve ve kera kav un ga?
  • Ka nyi mnya Yosev umburu, man mnyam mara wase un mase kaven nyi kwagha?

Mbampin mbagenev

  • Ôr Genese 41:1-57.

    Yosev yange gema hen Yehova nena, man Mbakristu vea dondo ikyav na la nyian nena? (Gen. 41:16, 25, 28; Mat. 5:16; 1 Pet. 2:12)

    Anyom a iyiav ngee ken Igipiti man a ijen gba tsung la tese er mlu u ken jijingi u ior mba Yehova ve lu ker nyian ne a kaha kposo a u Mbakristu Mbaaiev la nena? (Gen. 41:29, 30; Amo. 8:11, 12)

  • Ôr Genese 42:1-8 man 50:20.

    Aluer mba civir Yehova dondo gado u ior mba hen ma ijiir, nahan ve̱ gure or inya sha u nan nan icivir sha iantom i nan lu sha mi la nahan, ve er kwaghbo shinii? (Gen. 42:6)