Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 17: Ahina a Yange Lu Kposo La

Kwaghôron u sha 17: Ahina a Yange Lu Kposo La
Isou

MBAYEVNOMSO mba uhar mba ve lu heen ne mba kposo kpishi je, shin mba ga? Ú fa ati a ve kpa? Ortato la ka Isou, man wannomso u a lu nengen sha iyôngo la ka Yakob.

Isou man Yakob yange ve lu ônov mba ahinav mbanomso mba Isaka man Rebeka. Ter ve, Isaka, yange soo Isou kpishi je, sha ci u un lu ortato u fan ikôr man shi yange a hide a kwaghyan kpishi sha er tsombor la ua ya yô. Kpa Rebeka di yô hemba soon Yakob, sha ci u un lu wanye u kumbur ga, lu or u bem.

Tertamen Aberaham lu uma heregh, man se hen tsô ser yange á saan Yakob iyol u keghen ato ungwan un ôron kwagh u Yehova kpishi. Ken masejime yô Aberaham kpe sha anyom 175, shighe ne ahina ne lu anyom 15.

Yange Isou kom anyom 40 yô á vôso kasev uhar ken tar u Kanaan. Kwagh ne vihi Isaka man Rebeka kpishi, sha ci u kasev mban ve civir Yehova ga.

Tsô iyange i genegh yô kwagh e̱r u a na ishima vihi Isou kpishi a anngô na Yakob yô. Shighe va kuma u Isaka una na wan na u iunda iveren yô. Er Isou lu vesen a Yakob yô, Isou a ver ashe je er ka un una ngohol iveren ne ye. Kpa Isou yange vande teen ian na i ngohol iveren la hen Yakob. Shi, shighe u yange i mar mbayevnomso mbara la Aôndo vande kaan er á lu Yakob una ngohol iveren shon ye. Man ka kwagh u er kpaa je ne. Isaka na wan na Yakob iveren la.

Yakob

Ken hemen, shighe u Isou va fe kwagh ne yô ishima vihi un kpishi a Yakob. Yange ishima vihi un je yô a kaa er una wua Yakob. Rebeka ongo kwagh ne yô, ishima za un iyol kpishi. Nahan á ôr nom na Isaka: ‘Á lu kwagh u vihin kpishi aluer Yakob kpa vôso môm ken kasev mba Kanaan mban yô.’

Hen shighe la Isaka yila wan na Yakob kaa a na er: ‘De eren kwase ken Kanaan ga. Kpa yem ken ya u ter u ngôu Betuel ken Haran. Za vôso môm ken ônov mbakasev mba wan na Laban.’

Yakob ungwa imo i ter na, nahan fese je man a kôr gbenda yemen hen ape anmgbianev nav ve lu ken Haran la.

Genese 25:5-11, 20-34; 26:34, 35; 27:1-46; 28:1-5; Mbaheberu 12:16, 17.



Mbampin

  • Isou man Yakob lu unô ioro, man ve lu kposo inja nena?
  • Isou man Yakob ve lu anyom a me zum u ter ve tamen u Aberaham kpe?
  • Kanyi kwagh yange Isou er ve, vihi ngô na man ter na yumu?
  • Kanyi yange i̱ na ve ishima vihi Isou a anngô na Yakob yumu?
  • Isaka yange wa wan na Yakob kwagh, kaa a na ér nyi?

Mbampin mbagenev

  • Ôr Genese 25:5-11, 20-34.

    Yehova tsengaôron kwaghôron u profeti sha ônov mba Rebeka mba nomso mba uhar mbara ér nyi? (Gen. 25:23)

    Yakob yange nenge dyako u waniunda la nena, kpa Isou di gema nenge i̱ nena? (Gen. 25:31-34)

  • Ôr Genese 26:34, 35; 27:1-46; man 28:1-5.

    Iwuese i Isou lu a mi sha akaa a ken jijingi ga la va due ken igbar nena? (Gen. 26:34, 35; 27:46)

    Yange Isaka kaa a Yakob ér a̱ er nyi ve, una zua a iveren i Aôndo? (Gen. 28:1-4)

  • Ôr Mbaheberu 12:16, 17.

    Kwagh u yange er Isou la tese ér ior mba akaa a ken jijingi a gbe ve kwagh ga yô, á lu ve nena?