Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 15: Kwase u Loti Gema Ashe Jime

Kwaghôron u sha 15: Kwase u Loti Gema Ashe Jime

LOTI man tsombor na yange ve lu ijiir i môm vea Aberaham ken tar u Kanaan. Iyange i genegh yô Aberaham kaa a Loti er: ‘Ijiir ngi heen kuma sha ci u ilev yasev cii ga. Wea lumun yô, de se pav. Aluer u yem vegher môm yô, mo di me yem vegher u genegh.’

Loti kende ashe sha nenge gburumaa u tar la cii. A nenge a vegher u tar la u lu̱ á mngerem man toho kpishi sha ci u ilev nav yô. Ngun ne lu haregh u Yordan. Nahan Loti mough aa tsombor na kua ilev nav cii yem ker. Ken masejime yô ve za tema ken gar u Sodom.

Ior mba Sodom ve lu aferaior kpishi. Kwagh ne vihi Loti ken ishima kpishi, sha ci u un lu or u dedoo. Aôndo kpaa yange ishima vihi un. Ken masejime yô, Aôndo tindi mbatyomov uhar er ve̱ za ta Loti icin er un ngu timin Sodom kua gar u Gomora u a̱ lu ikua la sha ci u afer a ve.

Mbatyomov mbara ve kaa a Loti er: ‘Mough fefa! Tôô kwase wou kua ônov ou mba kasev mba uhar mba ve lu heen ne man due nen kera!’ Loti kua tsombor na yange ve timbir u duen, man mbatyomov mbara kôr ve sha uwe ve due a ve ken akôngo a gar. Tsô môm ken mbatyomov mbara kaa er: ‘Yevese war nen! De gem nen ashe jime ga. Yevese yem nen sha uwo, sha er ne tim ga yô.’

Loti kua ônov nav mba kasev ve ungwa imo la nahan ve yevese kera ken Sodom. Ve tile ma shighe môm kpaa ga, man shi ve gema ashe jime kpaa ga. Kpa kwase u Loti hemba ato. Yange mba undu Sodom mba yemen naleghaa yô, á tile á gema ashe jime. Tsô man kwase u Loti hingir icebar. Ú fatyô u nengen a na ken foto ne kpa?

Se fatyô u henen kwagh u dedoo sha kwagh ne. Kwagh ne tese se er Aôndo waren mba ve ongo un la, kpa mba ve ongo un ga yô vea saa uuma vev.

Genese 13:5-13; 18:20-33; 19:1-29; Luka 17:28-32; 2 Peteru 2:6-8.

Loti ngu yevese duen ken Sodom kera


Mbampin

  • Kanyi yange i̱ na ve Aberaham pav ya a Loti?
  • Er nan ve Loti tsôr ér una za tema ken Sodomo?
  • Ieren i ior mba ken Sodom i̱ lu nena?
  • Mbatyomov mba shaav uhar va ta Loti icin ér nyi?
  • Kanyi yange i̱ na ve kwase u Loti hingir icebara?
  • Kwagh u yange er kwase u Loti la tese se nyi?

Mbampin mbagenev

  • Ôr Genese 13:5-13.

    Ieren i Aberaham la i̱ tese se nyi sha kwagh u sôron ayôôso a a zough se a orgen laa? (Gen. 13:8, 9; Rom. 12:10; Fil. 2:3, 4)

  • Ôr Genese 18:20-33.

    Gbenda u Yehova ngise eren kwagh a Aberaham la na se mba a vangertiôr ser Yehova man Yesu vea ôr ijir sha mimi nena? (Gen. 18:25, 26; Mat. 25:31-33)

  • Ôr Genese 19:1-29.

    Kwagh u í nger ken Bibilo heen ne tese ér Aôndo nenge ieren i nomsoor yaven a nomsoor ugen la nena? (Gen. 19:5, 13; Lev. 20:13)

    Gbenda u Loti dondo kwaghôron u Aôndo la kaha a Aberaham nena, man kwagh ne tese se nyi? (Gen. 19:15, 16, 19, 20; 22:3)

  • Ôr Luka 17:28-32.

    Kwase u Loti nengen kwagh u inyar nena, man kwagh ne ka icintan hen avese nena? (Luka 12:15; 17:31, 32; Mat. 6:19-21, 25)

  • Ôr 2  Peteru 2:6-8.

    Loti nengen mbafanaôndo ga mba ve kase un la nena, man se kav un nena? (Esek. 9:4; 1 Yoh. 2:15-17)