Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 14: Aôndo Kar Jighjigh u Nan u Aberaham

Kwaghôron u sha 14: Aôndo Kar Jighjigh u Nan u Aberaham

Ú NENGE kwagh u Aberaham a lu eren heen ne kpa? Ngu a ihô, man ka inja er a soo u wuan wan na nahan. Á er nan je ve una soo u eren imba kwagh la nahana? Hiihii yô, de se nenge er yange i hii ve Aberaham man Sara ve zua a wan ve yô.

Aberaham ngu nan nagh sha Isaka

Umbur, Aôndo yange tôndozwa a ve er vea zua a wan. Kpa kwagh la lu e̱r ka mnyamciem nahan, sha ci u Aberaham kua Sara ve bee iyol gande. Nahan cii kpaa, Aberaham yange na jighjigh er Aôndo una fatyô u eren kwagh u a lu inja er ka mnyamciem yô. Nahan kanyi yange i ere?

Er Aôndo tôndozwa kera yô, inyom jimin i kar. Tsô, Aberaham kom anyom 100 man Sara di kom anyom 90 yô, ve mar wanikundan u nomso i ii un iti er Isaka. Aôndo er sha ityendezwa na vough!

Kpa Isaka vesen kera yô, Yehova kar jighjigh u Aberaham. A yila er: ‘Aberaham!’ Man Aberaham rumun er: ‘Een m ngun heen ne!’ Tsô Aôndo kaa er: ‘Tôô wan wou, wan wou u môm môm la, Isaka, man yem sha uwo u me tese u yô. Heregh la za sôngo wan wou man na nagh ku nanden a mi.’

Mkaanem mara yange maa na Aberaham ijungwen tsô, sha ci u Aberaham soo wan na kpishi je. Man shi umbur, Aôndo vande tôndon zwa er ônov mba Aberaham vea lu ken tar u Kanaan. Kpa á er nan ve kwagh á er nahana aluer Isaka kpe yôô? Aberaham yange kav ga, kpa á ungwa imo i Aôndo.

Yange za aren sha uwo la yô, Aberaham kange Isaka man penda un sha atse a a ta la. Tsô a dugh ihô sha u una sôngo wan na yô. Kpa hen shighe la je ortyom u Aôndo yila un er: ‘Aberaham! Aberaham!’ Man Aberaham rumun: ‘Een m ngun heen ne!’

‘De vihin wanakiriki la iyol ga shi de eren un ma kwagh kpaa ga,’ Aôndo kaa nahan. ‘Hegen M fa ú ngu a jighjigh u nan ken amo, sha er ú nyumum wan wou ga, wan wou u môm môm la ga yô.’

Yange Aberaham lu a zege jighjigh u nan hen Aôndo tsô! Yange na jighjigh er ma kwagh hemba Yehova ga, man shi Yehova una fatyô u nderen Isaka shin mbakpenev. Kpa lu awashima u Aôndo mimi sha u Aberaham a̱ sôngo Isaka ga. Nahan Aôndo er nom iyôngo za wever akor ken ageva ikua, man a kaa a Aberaham er a̱ na nagh a mi i de luun wan na ga.

Genese 21:1-7; 22:1-18.



Mbampin

  • Aôndo yange tôndo zwa a Aberaham ér nyi, man Aôndo kure ityendezwa na la nahan vough nena?
  • Er í tese ken foto ne nahan, Aôndo kar jighjigh u nan u Aberaham nena?
  • Er Aberaham fa ityôkyaa i̱ Aôndo kaa ér a̱ er kwagh ne ga nahan je kpa, orti er nyi?
  • Yange Aberaham tee ihyô ér una sôngo wan na yô, maa nyi i ere?
  • Jighjigh u Aberaham na Aôndo la taver nan je?
  • Kanyi Aôndo gema na Aberaham ér a̱ na naagh a mini, man a na un nena?

Mbampin mbagenev

  • Ôr Genese 21:1-7.

    Er nan ve yange Aberaham tsôngo wan na u nomso la sha iyange i sha anigheni laa? (Gen. 17:10-12; 21:4)

  • Ôr Genese 22:1-18.

    Isaka tese ér un ongo imo i ter na Aberaham nena, man ieren na ne i̱ lu ikyav i zege kwagh u una va er ken hemen nena? (Gen. 22:7-9; 1 Kor. 5:7; Fil. 2:8, 9)