Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 13: Aberaham—Huror u Aôndo

Kwaghôron u sha 13: Aberaham—Huror u Aôndo

MÔM ken ajiir a yange ior yem twev shighe u Mngerem ma deemee mara ma kar kera la yô lu ijiir i i yilan er Ur la. Yange hingir ijiir i vesen i lun a uya mba dedoo kimi. Kpa ior mba keregh mbara ve civir mbaaôndo mbaaiev. Kape yange ve eren ken Babel kpaa je la. Ior mba ken Ur man Babel mbara ve lu er Noa kua wan na Shem, mba yange ve za hemen u civir Yehova la ga.

Ken masejime, er mngerem ma deemee mara kar kera kuma anyom 350 yô, orjighjigh Noa maa kpe. Yange anyom kar ahar tseegh tsô man i mar or u ú nenge a na ken foto heen ne. Un lu icighanor u Aôndo. Iti na er Aberaham. lu ken gar u Ur la vea tsombor na.

Aberaham ngu kenger asan

Iyange i genegh yô Yehova kaa a Aberaham er: ‘Due ken Ur man ken ityô you kera, yem ken tar u me tese u la.’ Yange Aberaham ungwa imo i Aôndo man shi undu mbamkpeyol mba ken tar u Ur la kpa? Een, yange undu. Man lu sha ci u Aberaham ungwan imo i Aôndo hanma shighe ka nahan i va hingir u yilan un er huror u Aôndo ye.

Mbagenev ken tsombor u Aberaham kpaa yange ve dondo un shighe u á undu Ur la. Ter na Tera kpaa dondo un. Di vough er wan u anngô na Loti nahan. Man, ka keng, kwase u Aberaham Sara kpaa yange yem vea na. Shighe karen yô ve cii ve za a̱r hen ijiir i i yilan er Haran, ape yange Tera kpe la. Yange ve gba ica aa Ur.

Shighe karen yô Aberaham kua tsombor na ve undu Haran ve yem ken tar u i yilan er Kanaan la. Heela Yehova kaa er: ‘Ngun ka tar u me na ônov ough je ne.’ Aberaham lu ken Kanaan man tsaan ken utenti.

Aôndo wase Aberaham tsô a va hingir u lun a akum a iyôngo kpishi kua ilev mbigenev kpaa man ikpan uderi uderi. Kpa un vea Sara yô ve lu a ônov vev iyol ve ga.

Aberaham kom anyom 99 yô, Yehova kaa a na er: ‘M tôndozwa mer ú hingir ter u akuraior kpishi.’ Kpa a er nan kwagh a lu nahana, sha er Aberaham man Sara ve bee ayol hen shighe ne gande u maren wan yô?

Genese 11:27-32; 12:1-7; 17:1-8, 15-17; 18:9-19.



Mbampin

  • Ieren i ior mba ve lu ken gar u Ur la i̱ lu nena?
  • Ka an nan lu ken foto heen nee, i mar un hanma shighe, man lu hana?
  • Aôndo kaa a Aberaham ér a̱ er nyi?
  • Er nan ve i yila Aberaham ér ikyar u Aôndo?
  • Yange Aberaham mough hen Ur la, mough a ana?
  • Aberaham za nyôr ken tar u Kanaan yô, Aôndo kaa a na ér nyi?
  • Aberaham yange nyer anyom 99 yô, Aôndo er ityendezwa a na kaa ér nyi?

Mbampin mbagenev

  • Ôr Genese 11:27-32.

    Aberaham vea Loti ve wa inja nena? (Gen. 11:27)

    Er yange í senge ér ka Tera a kor tsombor na, ve ker gbenda yemen ken tar u Kanaan nahan kpa, er nan ve se fe ser sha kpôô yô lu Aberaham kaa ér a mough twev nee, man mough twev ér nyi? (Gen. 11:31; Aer. 7:2-4)

  • Ôr Genese 12:1-7.

    Yange Aberaham za nyer ken tar u Kanaan yô, Yehova shi seer kwagh ugen sha ikyuryan i̱ a vande yan a na la nena? (Gen. 12:7)

  • Ôr Genese 17:1-8, 15-17.

    Zum u Aberam nyôr anyom 99 yô, í gema yilan iti na ér nyi, man lu sha ci u nyi? (Gen. 17:5)

    Ka iveren i nyi Yehova yange tôndo zwa ér Sara una va zua a mi ken hemene? (Gen. 17:15, 16)

  • Ôr Genese 18:9-19.

    I kaa a uter ken Genese 18:19 ér ve̱ eren nyi? (Dut. 6:6, 7; Ef. 6:4)

    Kanyi kwagh yange i̱ er Sara i̱ i̱ ne ve se fe ser ma kwagh môm u se yer Yehova a mi je kpa ngu ga? (Gen. 18:12, 15; Ps. 44:21)