Ú FA kwagh u hiihii u yange Noa er shighe u un kua tsombor na ve due ken tso la kpa? Yange na nagh shin iwua hen Aôndo. Ú fatyô u nengen er á lu eren kwagh ne yô hen foto u a lu heen ne. Noa yange na iwua i sha uzendeinya ne sha u sughun Aôndo sha er a war un kua tsombor na ken zege mngerem ma deemee mara yô.

Tso man ikume

Ú hen wer yange i saan Yehova iyol aa iwua shon kpa? Een, yange saan un iyol. Nahan man a tôndozwa a Noa er mayange una kera tim tar sha mngerem ma deemee ga.

Shighe kpeghee tsô man inya cii uma, man Noa kua tsombor na ve hii uma u he zum u ve due ken won u tso la. Aôndo yange ver ve doo doo man shi kaa a ve er: ‘Mar nen ônov kpishi. Seer nen a seer u ngeen iyenge zan zan ior ve̱ iv shin tar.’

Kpa ken hemen, shighe u ior vea ungwa kwagh u zege mngerem ma deemee mara yô, vea gba cian er alaghga imba mngerem ma deemee mara shi maa va shighe u genegh kpaa. Nahan Aôndo mase nan ikav sha u umbur ior ityendezwa na i mayange una kera va aa mngerem ma deemee shin tar ga la. Ú fa kwagh u yange na sha u umbur ve kpa? Lu ikume.

Noa man tsombor

Ashighe kpishi ka i nenge a ikume sha kwavaôndo shighe u ura ka ua nôô ua tôndo man iyange ia due yô. Ikume ia fatyô u lun a uimondon mba doonashe kpishi. Ú vande nengen a mi kpa? Ú nenge a i i̱ lu ken foto heen ne kpa?

Ka kwagh u Aôndo ôr je ne: ‘M tôndozwa mer mayange ior man zendeinya cii vea kera tim sha mngerem ma deemee ga. M ngu veren ikume yam sha abeen. Man shighe u ikume la i dugh yô, Me nenge a i̱ man me umbur ikuryan yam ne.’

Nahan shighe u ú nenge a ikume cii yô, kanyi i̱a umbur we? Een, ka ikuryan i Aôndo e̱r er mayange una kera tim tar sha zege mngerem ma deemee ga la.

Genese 8:18-22; 9:9-17.



Mbampin

  • Er foto ne a tese nahan, Noa dugh ken tso kera je tsô, maa vande eren nyi?
  • Yange Mngerem ma Deemee ma karen kera cii yô, Aôndo maa wa Noa man tsombor na tindi ér nyi?
  • Aôndo er ityendezwa a ve ér nyi?
  • Aluer se nenge a ikume yô, ia umbur se nyi?

Mbampin mbagenev

  • Ôr Genese 8:18-22.

    Se na Yehova “ihuma i dedoo” nyian nena? (Gen. 8:21; Heb. 13:15, 16)

    Yehova ôr kwagh u ishima i or kaa ér nyi, nahan ka sha nyi akaa i doo u se wa ikyo? (Gen. 8:21; Mat. 15:18, 19)

  • Ôr Genese 9:9-17.

    Ka ikyuryan i nyi Yehova ya a hanma kwagh u uma sha tar cica ciilii? (Gen. 9:10, 11)

    Ikyuryan i sha ikume la ia bee hanma shighe? (Gen. 9:16)