Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 9: Noa Gba Tso

Kwaghôron u sha 9: Noa Gba Tso
Ior mba sen Noa

NOA yange lu a kwase man ônov mbanomso utar. Ati a ônov nav lu Shem, Ham kua Yafeti. Man hanma wan na yô nan lu a kwase. Nahan iorov lu anigheni hen tsombor u Noa.

Tsô Aôndo kaa a Noa er a̱ er kwagh u cimin kpishi. A kaa a na er a gba zege tso. Tso ne yange gbanger er girgi i shin mnger nahan, kpa gema lu inja er ma zege akwati, u lun iniembe gôgônan nahan. ‘Pav un ukpo utar,’ kape Aôndo kaa la, ‘man tôndo ayou ker ukpo ukpo.’ Ayou la lu sha ci u Noa kua tsombor na, ishôso, man kwaghyan u ve cii vea lu yan la.

Aôndo shi kaa a Noa er a̱ gba tso la sha er mngerem maa nyôr ker ga yô. Aôndo kaa er: ‘M ngu tindin a zege mngerem ma deemee sha u me tim tar cii yô. Hanmaor u nan lu ken tso la ga cii yô nana kpe.’

Noa kua tsombor na yange ve na Yehova jighjigh nahan ve hii u gban. Kpa ior mbagenev yô ve gbaa sen ve tsô. Ve za hemen u eren akaabo. Or môm tsô kpaa nan na Noa jighjigh shighe u a lu ôron ve kwagh u Aôndo una va er la ga.

Tsombor u Noa ngu nyôron a ishôso ken tso

Yange i tôô shighe kpishi u gban tso la sha er a kehe yum yô. Ken masejime, anyom nga karen kpishi yô, i gba un i bee. Tsô Aôndo kaa a Noa er a̱ nyôr a ishôso ken tso. Aôndo kaa er i̱ va a ishôso i genegh sha anza a i uhar uhar, nom kua kwase. Kpa ishôso anza agenegh di yô, Aôndo kaa a Noa er a̱ va a ve utaankaruhar. Aôndo shi kaa a Noa er a̱ va a inyon anza kposo kposo. Noa er di vough er Aôndo kaa un la nahan.

Ka been kera yô, Noa man tsombor na kpaa ve nyôr ken tso la. Tsô Aôndo man wuhe hunda. Kimi yô, Noa man tsombor na ve gba keghen. Tôô ken ishima wer ú ngu ken tso la vea ve, ú ngu keghen. Mngerem ma deemee mara ma á va mimi je er Aôndo yange ôr nahan kpa?

Genese 6:9-22; 7:1-9.



Mbampin

  • Yange ior lu ken tsombor u Noa u me, man ati a ônov nav mba nomso mba utar mbara ér nyi?
  • Kanyi kwagh i cimin yange Aôndo kaa ér Noa a̱ ere, man lu sha ci u nyi?
  • Noa yange ôr ior mba ve wa ndor a na la kwagh u tso la yô, lu ve nena?
  • Aôndo yange kaa ér Noa a̱ er nyi a hanma inyam ciili?
  • Aôndo yange wuhu hunda u tso la kera cii yô, mase shin u Noa man tsombor na vea er nyi?

Mbampin mbagenev

  • Ôr Genese 6:9-22.

    Kanyi yange i̱ na ve Noa due tseer tseer ken mba ve civir Aôndo u mimi laa? (Gen. 6:9, 22)

    Yehova nengen ipila i eren nena, nahan doo u kwagh ne una na se di se eren gurgur u nyi? (Gen. 6:11, 12; Ps. 11:5)

    Zum u nongo u Yehova ú kaa ér se̱ er ma kwagh yô, se kav Noa nena? (Gen. 6:22; 1 Yoh. 5:3)

  • Ôr Genese 7:1-9.

    Er Noa lu or u ken myen je kpa Yehova tôô un ér ka orperapera nahan, kwagh la taver se ishima nyian nena? (Gen. 7:1; Anz. 10:16; Yes. 26:7)