Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 8: Akôraior Shin Tar

Kwaghôron u sha 8: Akôraior Shin Tar

ALUER or nan ngu zenden van hen ape ú lu la man nan tav je er haav mbu iyou you nahan, ú hen wer nena? Or la nana lu ikyôror je! Sha shighe ugenegh la akôraior lu sha tar sha mimi je. Bibilo i̱ tese er uter vev yange lu mbatyomov mba shaav. Kpa a er nan ve kwagh a lu nahana?

Akôraior a eren ipila

Umbur, ortyom u bo Satan yange lu eren tom yughur yughur je sha u van a mzeiyol. Yange lu nôngon sha u una gema mbatyomov mba Aôndo je kpaa ve hingir mbabov. Shighe karen yô, mbatyomov mban mbagenev ve hii u keghen ato hen Satan. Ve de tom u Aôndo lu a min sha ci ve sha u ve̱ er sha la. Man ve sen shin tar ve va er ayol a inyam man awambe sha a ci ve. Ú fa ityôkyaa kpa?

Bibilo i̱ kaa er ka sha ci u ônov mba Aôndo mban yange ve nenge aa kasev mba doonashe shin tar nahan ve soo u va lun a ve. Nahan ve va shin tar ve va vôso kasev mban. Bibilo i̱ kaa er kwagh ne lu kwagh u shami ga, sha ci u Aôndo yange gba mbatyomov er ve̱ lu sha.

Er mbatyomov mban kua kasev vev mba maren ônov yô, ônov mban lu kposo. Hiihii la yô alaghga yange vea lu kposo yum ga. Kpa yange ve za hemen u vesen zan zan, shi taver ayol seer a seer, zan zan ve hingir akôraior.

Akôraior ne lu ior mbabov. Man shi er yange ve gba akôr yum shi ve lu a agee kpaa yum yô, ve vihin ior ayol. Yange ve nôngo sha u vea gema hanmaor nana̱ hingir or u bo er ve nahan.

Enoki yange kpe kera hen shighe ne, kpa or lu môm shin tar u nan lu or u dedoo yô. Iti i or ne er Noa. Yange eren hanmakwagh u Aôndo una soo er a̱ er la hanma shighe cii.

Iyange i genegh yô Aôndo kaa a Noa er shighe kuma u Una tim ior mbabov cii yô. Kpa lu u Aôndo una war Noa, tsombor na man ishôso kpishi kpaa. De se nenge er Aôndo er kwagh ne yô.

Genese 6:1-8; Yuda 6.



Mbampin

  • Mbatyomov mba Aôndo mbagenev yange ve ungwa Satan yô, lu nyi i̱ va kere?
  • Mbatyomov mbagenev undu tom ve shaala, sen shin tar ér vea va er nyi?
  • Kanyi i ne ve m-hongo u mbatyomov mba shaav yange ve hungwa shin tar ve va hingir u lun a iyol i uumace la lu shami ga?
  • Ônov mba mbatyomov mba shaav mbara mar la, ve due kposo sha nyi gbenda?
  • Er ú nenge ken foto ne nahan, ônov mba mbatyomov mba shaav mbara mar la yange mba hingir akôraior yô, maa ve gba eren nyi kwagha?
  • Enoki yange kpen kera cii yô, shi lu an ugen nan lu or u mimi sha tara, man er nan ve or ne doo Aôndo ishima?

Mbampin mbagenev

  • Ôr Genese 6:1-8.

    Genese 6:6 pase er ieren yase ia na ishima a doo Yehova ker shin ia vihi un nena? (Ps. 78:40, 41; Anz. 27:11)

  • Ôr Yuda 6.

    Mbatyomov mba shaav mba yange ve “kera wa iko sha tahav vev mbu i ver ve sha mi hiihii” sha ayange a Noa ga la ve hingir icintan hen avese nyian nena? (1 Kor. 3:5-9; 2 Pet. 2:4, 9, 10)