Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 7: Or u Lun A Ishimataver

Kwaghôron u sha 7: Or u Lun A Ishimataver
Enoki

ER IYENGE i ior hii u ngeen sha tar yô, ve kpishi ve eren akaa a ifer er Kain nahan. Kpa or môm lu inja kposo. Mba yer or ne iti er Enoki. Enoki lu or u taver ishima. Ior mba yange ve kase un ken hanma vegher cii ve eren akaa a ifer kpishi, kpa Enoki yô za hemen u civir Aôndo.

Ú fa er i hii ve ior mba sha ayange la ve eren akaa a ifer kpishi yum nahan kpa? Ka shami, hen yôô, Ka an yange nan na Adam man Ifa ve hemba Aôndo ato man shi ve ya ityamegh ki kon u Aôndo kaa er ve̱ de ye ga laa? Een, yange lu ortyom u bo. Bibilo i yila un er Satan. Man ngu nôngon sha u una gema hanmaor cii nana̱ hingir or u bo yô.

Gbendanumun man iwoor

Iyange i genegh yô Yehova Aôndo na Enoki ôr ior kwagh u ve soo u ungwan ga yô. Yange lu kwagh ne: ‘Iyange i genegh Aôndo una tim ior mbabov kera cica cii.’ Alaghga yange asema vihi ior mbara u ungwan kwagh ne. Alaghga je yô yange ve nôngo sha u wuan Enoki je kpaa. Nahan gba u Enoki una lu á ishima i taver tsung sha er una fatyô u ôron ior kwagh u Aôndo wa ishima sha u una va er yô.

Aôndo yange de er Enoki a̱ lu uma gbem hen atô u ior mbabov mbara ga. Enoki tsa kuma di anyom 365 tseegh tsô. Er nan se kaa ser “anyom 365 tseegh” le? Ka sha ci u ior mba sha ayange la yange ve hemba taver ayol a mba hegen shi ve hemban tsan sha won. Nenge ase, wan u Enoki u nomso Metusela yange tsa je kuma anyom 969!

Ior mba eren akaabo

Ka shami, er Enoki kpe kera yô, ior mbara man ve vihi ve yem a yem hemen. Bibilo i kaa er ‘hanma mhen ve cii yange lu u bo hanma shighe cii,’ man shi ‘tar cii iv a ipila.’

Ú fa ityôkyaa i môm i yange i na ve mzeiyol ngee yum sha ayange la kpa? Ka sha ci u yange Satan zua a gbenda u he u nan ior sha u ve̱ er akaabo yô. Ka kwagh u se hen shami hegen je ne.

Genese 5:21-24, 27; 6:5; Mbaheberu 11:5; Yuda 14, 15.



Mbampin

  • Enoki lu kposo sha nyi gbenda?
  • Er nan ve ior mba sha ayange a Enoki la ve eren akaabo kpishi yum nahana?
  • Ka nyi akaabo nahan yange ior erene? (Nenge ken foto ne.)
  • Er nan ve yange gba u Enoki una taver ishima kpeele?
  • Ior mba sha ayange la yange ve tsa sha won í kuma anyom a me nahana, kpa Enoki yô, gema tsa anyom a me?
  • Enoki yange kpe kera cii yô, lu nyi i̱ ere?

Mbampin mbagenev

  • Ôr Genese 5:21-24, 27.

    Mlu u Enoki vea Yehova yange lu nena? (Gen. 5:24)

    Sha kwagh u Bibilo i̱ er yô, ka an yange nan hemba tsan sha won ciilii, man or shon yange nan tsa anyom a me cii ve nan mase kpene? (Gen. 5:27)

  • Ôr Genese 6:5.

    Enoki yange kpen kera cii yô, tar maa mase vihin nan je, man mlu u sha ayange la kaha a u nyian kpa? (2 Tim. 3:13)

  • Ôr Mbaheberu 11:5.

    Ka nyi ieren i Enoki yange i̱ “doo Aôndo ishima” yumu, man lu nyi i̱ va kere? (Gen. 5:22)

  • Ôr Yuda 14, 15.

    Mbakristu vea taan ior icin sha mve u ityav mbi Armagedon mbila yô, vea dondo ishimataver i Enoki la nena? (2 Tim. 4:2; Heb. 13:6)