Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 6: Wan u Dedoo, man u Bo

Kwaghôron u sha 6: Wan u Dedoo, man u Bo

KENGER ase Kain man Abel hegen yôô. Ve cii ve vese hegen. Kain hingir orsule. Kahan ishamakaa kua atam a ikon man ikyayue.

Kain man Abel mba nan Aôndo nagh

Abel hingir or u koson ilev. Doo un u koson anyôngom kpishi. Ve vese ve hingir iyôngo i kehen, nahan shighe kpeghee tsô man Abel hingir u lun a ikumuile i iyôngo i una nengen sha mi yô.

Iyange i genegh yô Kain vea Abel ve va a nagh ku nan Aôndo. Kain va a kwaghyan ken iyiav mbi yange sunda yô. Man Abel di gema va a iyôngo na i hemban cii la. Doo Yehova a Abel man nagh nagh. Kpa doo un a Kain kua nagh nagh ga. Ú fa ityôkyaa kpa?

Ka sha ci u nagh ku Abel ku hemba doon a ku Kain tseegh tsô ga. Ka sha ci u Abel ka or u dedoo. Yehova doo un ishima kua anmgbian na. Kpa Kain ka iferor; anmgbian na doo un ishima ga.

Nahan Aôndo kaa a Kain er a̱ sôr igbenda na. Kpa Kain ungwa ga. Ishima vihi un kpishi sha ci u Aôndo hemba soon Abel. Nahan Kain kaa a Abel er, ‘De se za ken toho.’ Nahan, mba za lun keregh ve tseegh yô, Kain gbidye anmgbian na Abel ityumbukon. Er a gbidye un ityumbukon la taver yum yô maa a wua un. Lu kwagh u vihin kpishi Kain er ye gaa?

Kain wua Abel, ngu yevese

Shin er yange Abel kpe nahan kpaa, Aôndo ngu umbur un heregh. Abel yange lu or u dedoo, man Yehova hungur a imba or la ga. Nahan iyange i genegh yô Yehova Aôndo una hide a uma u Abel heregh. Hen shighe la Abel una kera kpe mayange ga. Una fatyô u lun uma shin tar heen gbem sha won. A doo u fan ior er Abel nahan gaa?

Kpa saan Aôndo iyol a ior mba ve lu er Kain nahan ga. Nahan er yange Kain wua anngô na kera yô, Aôndo tsaha un sha u paven un a tsombor na yemen a na ca. Er Kain yem sha u za lun ken vegher tar u genegh yô, a tôô anngô na u kwase u genegh á yem a mi, man á za hingir kwase na.

Shighe ze yô Kain vea kwase na ve hii u maren ônov. Ônov mbanomso man mbakasev mba Adam kua Ifa mbagenev er kasev kua noov, ve kpaa ve mar ônov. Shighe ze deghôô yô ior hingir u lun sha tar kpishi. De se hen kwagh u mbagenev ken a ve.

Genese 4:2-26; 1 Yohane 3:11, 12; Yohane 11:25.



Mbampin

  • Kanyi tom yange Kain man Abel ve erene?
  • Ka nyi iyua yange Kain man Abel ve va a mi sha ishigh ki Yehova?
  • Er nan ve Yehova yange lumun iyua i Abel la, kpa gema venda i Kain laa?
  • Kain ka nyi imba oro, man Yehova kôôm un nena?
  • Kain za dugh tswen vea anngô na ken toho yô, maa a er nyi?
  • Pase kwagh u yange Kain wua anngô na ve, er un la.

Mbampin mbagenev

  • Ôr Genese 4:2-26.

    Yehova yange pase ian i bo i Kain tile sha mi la nena? (Gen. 4:7)

    Kain yange tese kwagh u lu un ken ishima jim la nena? (Gen. 4:9)

    Yehova nenge awambe a orshôô a haan inya la nena? (Gen. 4:10; Yes. 26:21)

  • Ôr 1 Yohane 3:11, 12.

    Kanyi yange i̱ na ve ishima vihi Kain ker tsung nu, man kwagh ne hingir icintan hen avese nyian nena? (Gen. 4:4, 5; Anz. 14:30; 28:22)

    Bibilo tese ér aluer hanma or hen tsombor wase nan soo kwagh u Yehova ga je kpa, se fatyô u zan hemen a perapera wase her nena? (Ps. 27:10; Mat. 10:21, 22)

  • Ôr Yohane 11:25.

    Yehova tôndo zwa ér mba ve kpe sha ci u perapera cii una er a ve nena? (Yoh. 5:24)