Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 3: Or man Kwase u Hiihii

Kwaghôron u sha 3: Or man Kwase u Hiihii

KANYI i kaha kposo ken foto u a lu heen ne? Een, ka ior mba ve lu ker ne. Ka or man kwase u hiihii. Ka an yange nan gba ve? Lu Aôndo. Ú fa iti na kpa? Iti na er Yehova. Man or la kua kwase la i hingir u yilan ve er Adam man Ifa.

Adam man Ifa mba ken sule u Eden

Kape yange Yehova Aôndo gba Adam je ne. A ongu vuulevu hen inya man e̱r iyol i lun vough a min, iyol i or. Man a fehe humbe ken ahenga a or la, man Adam hingir uma.

Yehova Aôndo lu aa tom sha ci u Adam. A kaa a Adam er a̱ na ishôso atô kposo kposo la cii ati. Alaghga yange Adam tôô shighe kpishi sha u nengen ishôso la sha er una tsua iti i hembandoon sha ci u hanmô ve yô. Er Adam lu nan ishôso la ati yô a hii u nengen kwagh ugenegh. Ú fa kwagh shon kpa?

Ishôso la cii hanmô lu a ikar. Yange anom a nor lu man ungô mba nor, shi anom a begha lu man ungô mba begha kpaa. Kpa Adam yô lu a or môm u nana lu ikar na ga. Nahan Yehova er Adam yav mem mem, man a tsua kuhe ken hwan na. Sha u yaren tom a hwan ne yô, Yehova gba kwase sha ci u Adam, man a hingir kwase na.

Yange saan Adam iyol hen shighe ne tsô! Man shi hen ase er yange Ifa kpaa á saan un iyol sha er i ver un ken sule u doonashe la er a̱ lu keregh yô! Hegen vea fatyô u maren ônov man lun imôngo ken msaaniyol.

Yehova yange soo er Adam man Ifa ve̱ lu uma gbem sha won. Yange soo er ve̱ gema tar cii u̱ hingir ijiir í engem vough er sule u Eden la nahan. Yange a saan Adam man Ifa iyol shighe u ve hen er vea er kwagh ne tsô! Yange man ú soo sha u we kpa eren tom u geman tar hingir sule u doonashe kpa? Kpa msaanyol u Adam man Ifa la tsa ga. De se fa ityôkyaa.

Upasalmi 83:18; Genese 1:26-31; 2:7-25.



Mbampin

  • Foto u á lu sha Kwaghôron u sha 3 ne kaha a foto u sha Kwaghôron u sha 2 la nena?
  • Lu an nan gba or u hiihii laa, man iti i or shon ér ana?
  • Aôndo na Adam nyi tom ér a̱ ere?
  • Aôndo yange er Adam gba mnyam mem mem ér nan?
  • Adam man Ifa yange ma ve tsa sha won ma kuma anyom a me nahana, man Yehova soo ér ve̱ eren nyi tomo?

Mbampin mbagenev

  • Ôr Ekesodu 6:3.

    Iti i Aôndo ér nyi, man ka hanma ian a lu sha mi un tswen sha tara? (Dan. 4:17)

  • Ôr Genese 1:26-31.

    Kanyi kwagh Aôndo mase gban sha iyange i sha ataratar i igbetar laa, man kwagh shon u mase gban ne kaha kposo a ishôso i a vande gban la cii inja nena? (Gen. 1:26)

    Kanyi kwagh Yehova ver sha ci u orumace man ishôso kpaa ciilii? (Gen. 1:30)

  • Ôr Genese 2:7-25.

    Tom u iin hanma inyam iti, ú í na Adam la lu zege tom nan je? (Gen. 2:19)

    Genese 2:24 wase se u fan ishima i Yehova sha kwagh u ivesegh man u undun ivaa man ivaa paven nena? (Mat. 19:4-6, 9)