Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 10: Zege Mngerem Ma Deemee

Kwaghôron u sha 10: Zege Mngerem Ma Deemee

KEN won u tso la yô, ior lu zan hemen u eren akaa a ve vough er yange ve vanden eren keke nahan. Ve lu a̱ na jighjigh er Mngerem ma deemee maa va ga. Alaghga yange vea hemba sen hen shighe la cii. Kpa ica gba ga tsô ve de u sen.

Mngerem ma deemee yisa ior mba mciem ma gbe ve iyol yô, kua ishôso kpaa

Fese nahan man ura hii u nôôn. Ú lu duen sha kwavaôndo haan vough er shighe u ka wea haa mngerem ma shin bokoti kera nahan. Noa lu kaa vough! Kpa shighe kar hegen u orgen nana nyôr ken tso yô. Yehova wuhe hunda gesa gbang gbang.

Ica gba ga je tsô mngerem uve̱ inya cii. Mngerem mara ma hingir er uzege mba ifi nahan. Ma môugh ikyon shi ma mgbegha uzege mbaawenev, man shi ma er ayôôso kpishi je. Cier ior iyol. Ve unde ve yem sha ajiir a a hembe taven yô. Kpash, bee er yange ma ve ungwa kwaghôron u Noa nahan ma ve nyôr ken tso shighe u hunda lu ivegher heregh la yô! Kpa hegen yô shighe kar.

Mngerem mara ma gba moron seer a seer. Ayange 40 man aime kpaa 40 mngerem mara ma lu senen sha kwavaôndo. Ma tav ma a̱r sha akur a iwoogh, man fese nahan iwo i yange i hemba taven sha cii kpa i uve̱. Vough er Aôndo vande ôron la nahan, hanma or man ishôso i yange i lu ken tso ga la cii kpe. Kpa hanma or u nan lu̱ kimi yô nan war.

Noa kua ônov nav yange ve er tom u injaa sha u gban tso la. Yange mngerem mough a mi sha, man lu kuan sha zarmnger. Tsô iyange igenegh, shighe u ura la de u nôôn yô, iyange hii u tan. Yange̱ doo u nengen tsô! Lu zegeifi hanma ijiir. Man kwagh u a lu̱ u i lu nengen a min yô lu tso u lu kuan sha zarmnger la tseegh.

Tso ngu yemen sha zar mnger

Akôraior la cii kera lu ga. Ve kera lu mape sha u vihin ior ayol ga. Ve cii yange ve kpe, kua ungô vev man ior mbabov mbagenev cii. Kpa kanyi yange i e̱r uter veve?

Uter mba akôraior la yange ve lu uumace jim er se nahan ga. Lu mbatyomov mba ve va shiin sha u va lun er ior nahan shin tar yô. Nahan yange Mngerem ma deemee ma ve yô, ve kpe imôngo a ior mbagenev cii ga. Ve de̱ u yaren tom a ayol ave a inyam man awambe a ve er la, man ve hide ve hingir mbatyomov ve yem sha. Kpa yange i kera na ve ian er ve̱ lu ken tsombor u mbatyomov mba Aôndo ga. Nahan ve hingir mbatyomov mba Satan. Ken Bibilo yô i yila ve er ujijingi mbabov.

Aôndo er ahumbe ta, man mngerem ma deemee mara ma hii u hiden ijime. Iwer ngi karen itian yô tso la man sen va tema sha ityough ki woogh. Ayange shi ka̱r kpishi, man mba ken tso mbara ve fatyô u gbilin ashe ken won nengen a ityouv mbi iwoov. Mngerem mara ma gba hiden jime jime.

Tsô Noa pase annyon u il u i yer er gugôô la ken won u tso. A purugh a yem kaanaan tsô shi a hide, sha ci u a zua a ijiir i dedoo i una gba ga. A zer eren nahan gbem man hanma shighe u una hide je, á va tema sha jime tso la.

Ikyungugh

Noa yange soo er una fa aluer mngerem ma kua sha tar kera yô, nahan u dondon yô a shi a tindi ikungugh ken won u tso la. Kpa ikungugh kira kpaa ki hide sha ci u ki zua a ijiir i teman ga. Noa shi tindi ki kwa u sha uhar, man ki hide a kwa u olev sha zwa. Nahan Noa fa je er mngerem mara ma hide jime. Noa shi tindi ikungugh kira kwa u sha utar, man ken masejime yô ki zua a ijiir i ombor i lun heregh.

Nahan Aôndo ôr kwagh a Noa. A kaa er: ‘Due ken tso. We kua tsombor wou man ishôso cii aa we imôngo.’ Yange ve lu ken tso je hemba inyom i môm jimin. Nahan se fatyô u henen ser yange á saan ve cii iyol sha u lun ken won man shi lun uma tsô!

Genese 7:10-24; 8:1-17; 1 Peteru 3:19, 20.



Mbampin

  • Er nan ve yange ura ngu hiin u nôôn yô, lu u ma or nana kera fatyô u nyôron ken tso la ga?
  • Yange Yehova na ura nôô tugh man tetan zan zan ayange a me, man mngerem mara ngee kuma nena?
  • Yange mngerem ma ngur samber tseren tar cii yô, tso la maa hii u eren nyi?
  • Akôraior la yange war Mngerem ma Deemee mara kpa, man uter vev di yô, kanyi yange i̱ er ve?
  • Yange iwer ngi karen itian yô, lu nyi i̱ er tso laa?
  • Noa pase gugôô ér a̱ due ken tso a̱ za er nyi?
  • Noa er nan ve fa wener mngerem hii u uman sha tar kera?
  • Noa man tsombor na ve tsa ken tso ka peregh inyom kera yô, Aôndo maa kaa a na ér nyi?

Mbampin mbagenev

  • Ôr Genese 7:10-24.

    Yange í tìm akaauma sha tar nahan í tsegha mô je kpa? (Gen. 7:23)

    Yange tsa ayange a me ve Mngerem ma Deemee mara mase uman sha tar kera? (Gen. 7:24)

  • Ôr Genese 8:1-17.

    Genese 8:17 tese ér awashima u Yehova ngise lu a mi sha ci u tar hiihii la gema ga nena? (Gen. 1:22)

  • Ôr 1 Peteru 3:19, 20.

    Yange mbatyomov mba shaav mba hembanato mbara mba hidi mba yemen sha yô, i er ve nyi? (Yuda 6)

    Kwagh u Noa man tsombor na ne na se ishimataver ser Yehova ngu a tahav mbu yiman ior nav nena? (2 Peteru 2:9)