KANYI ú nenge a mi heenee? Een, ka mbautyaav sha anyinya a pupuu. Kpa ver ase ikav hen ape ve dugh la. Anyinya la nga yevese senen sha abeen a sha! Anyinya nga sha mimi je kpa?

Yesu ngu Tor sha

Ei, angan ka anyinya kpôô kpôô ga. Se fa kwagh ne nahan sha ci u anyinya aa fatyô u yevese sha abeen ga, shin aa fatyô? Kpa Bibilo i̱ ôr kwagh u anyinya a sha. Ú fa er i hii ve i̱ ôr kwagh la kpa?

Ka sha ci u ngise la i nôngon ityav kpishi sha anyinya. Nahan Bibilo i̱ ôr er ior henda anyinya mba senen sha sha u tesen er Aôndo ngu a ityav mbi una va nôngo a ior shin tar yô. Ú fa iti i i yilan ijiir i uitya ne kpa? Ka Armagedon. Ityav mbila ka u mbia tim hanma ifer cii shin tar kera.

Ka Yesu Una hemen gbenda sha u nôngon ityav mbi Armagedon mbila ye. Umbur, ka Yesu Yehova yange tsua sha u a lu tor u gomoti Na ye. Ka sha ci u nahan ve Yesu a cir idyer i tor ye. Man sanker la tese er una wua mbaihomov mba Aôndo cica cii. A kpiligh se iyol er Aôndo a lu va timin mbaaferev cii yôô?

Hide nenge sha Kwaghôron u sha 10 la. Kanyi ú nenge a mi keregh-e? Een, ka zege Mngerem ma deemee ma yange ma tim ior mbaaferev la. Ka an yange nan va a Mngerem ma deemee mara? Ka Yehova Aôndo. Hegen shi nenge ase sha Kwaghôron u sha 15 la. Kanyi i̱ lú zan hemen heelaa? Mba timin Sodom man Gomora sha usu u Yehova yange tindi a min la.

Bugh ase hen Kwaghôron u sha 33 la. Nenge ase kwagh u a lu eren anyinya man akekeautya a Mbaigipiti la. Ka an yange nan na sha u mngerem ma̱ hide ma̱ va kua a ve? Ka Yehova. Yange er nahan sha u kuran ior nav. Nenge ase Kwaghôron u sha 76 la. Ú nenge heela er Yehova yange de er ior nav, Mbaiserael je kpaa, i tim ve sha ci u afer a ve yô.

Nahan, sha ci u kwagh ne yô, i̱ de kpiligh se iyol e̱r Yehova una tindi mbautyaav nav mba shaav sha u ve̱ va bee a hanma inja ifer cii shin tar ga. Kpa hen ase kwagh u imba kwagh la ia va a mi yô! Bugh peeji u á dondo ne se nenge.

Mpase 16:16; 19:11-16.



Mbampin

  • Hii nan ve Bibilo i er kwagh u anyinya a shaala?
  • Mba yer ityav mbi Yehova una va nôngo a mbaaferev sha tar la ér nyi, man awashima u ityav mbi shon yô kanyi?
  • Er ú nenge ken foto ne nahan, ka an nan lu hemen ityav mbinii, hii nan ve á cir idyer i toro, man sanker na la tile sha nyi?
  • Aluer se hide se nenge ken kwaghôron u sha 10 man 15 man 33 la yô, se kaa ser hii nan ve i kpiligh se iyol er Aôndo a lu va timin aferaior nahan ga?
  • Kwaghôron u sha 33 man 76 la tese se ér aluer aferaior senge ér nga civir Aôndo je kpa una tim ve kera nena?

Mbampin mbagenev

  • Ôr Mpase 19:11-16.

    Ka nena Ruamabera a pase wang ér or u a hende nyinya i pupuu la ka Yesu Kristu? (Mpa. 1:5; 3:14; 19:11; Yes. 11:4)

    Awambe a a mishi sha riga u Yesu la tese ér á hemba ityav vindi vindi kwagh shi ga nena? (Mpa. 14:18-20; 19:13; Yes. 63:1-6

    Ka unô a̱ shi nan kpa ve lu ken akumautya á á lu dondon Yesu sha nyinya na i pupuu laa? (Mpa. 12:7; 19:14; Mat. 25:31, 32)