Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Ér Nyi Jimi?

NGEREN U SEER

Yesu Kristu—Ka Mesiya u I Tendezwa Ér Ngu Van La

Yesu Kristu—Ka Mesiya u I Tendezwa Ér Ngu Van La

YEHOVA Aôndo na uprofeti nav kpishi jijingi ve nger akaa ken Bibilo vighe vighe a aa wase se se kav or u nan lu Mesiya yô. Ve nger akaa sha kwagh u m-mar u un shon u i tendezwa ér una va yima uumace la, shi ve ôr kwagh u tom na man ku kpaa. Akaaôron a profeti a ken Bibilo ne cii kure sha Yesu Kristu. Akaa ne cii kure shami vough er i tsengaôron nahan. U tesen ikyav yô, de se time sha akaaôron a profeti agen a a tsenge pasen  akaa a yange er sha shighe u mmar u Mesiya man sha shighe u lu iyev la.

Profeti Yesaia tsengaôron ér Mesiya una due ken tsombor u Tor Davidi. (Yesaia 9:7) Man lu ken tsombor la je i mar Yesu ye.—Mateu 1:1, 6-17.

Mika, profeti u Aôndo ugen kpa tsengaôron ér wan la una va hingir orhemen, shi á kaa ér a mar un ken “Betelehem-efarata.”  (Mika 5:2) Sha shighe u i mar Yesu la, agar lu ken Iserael ahar a i yilan ér Betelehem yô. Gar u môm lu ken imbusutarimese, ikyua a gar u Nasareti, ugen di gema lu ikyua a Yerusalem ken Yudia. Man tsuaa la i yilan Betelehem u lu ikyua a Yerusalem la ér Eferata. Shi i va mar Yesu ken gar ne di vough er i tsengaôron ken kwaghôron u profeti la nahan!—Mateu 2:1.

Kwaghôron u profeti u ken Bibilo ugen pase ér a yila Wan u Aôndo “ken Igipiti.” Nahan shighe u Yesu lu anikyundan la i tôô un i yem a na ken Igipiti. Yange Herode kpe kera cii ve i mase hiden a na ye, nahan, kwaghôron u profeti ne kpa kure sha mi vough.—Hosea 11:1; Mateu 2:15.

I nger akaaôron a profeti sha kwagh u Mesiya la vighe vighe ken avur a ruamabera a i nger ken itinekwagh i i kaa ér, “Akaaôron a profeti” ken atôakaa a i ne sha peeji 200 la. Tôô avur a ruamabera ne kar sha a i nger ken itinekwagh i i kaa ér, “M-iv” la. Aluer u er nahan yô, kwagh ne una seer taver jighjigh u u ne wer hanma kwagh u i nger ken Mkaanem ma Aôndo cii ka u mimi la.

Er u nguren timen sha avur a ruamabera ne yô, fa wer yange i nger akaaôron a profeti a a lu ker la anyom kar uderi imôngo cii ve i mase va maren Yesu ye. Yesu kaa ér: “Ka u akaa a i nger sha a Mo ken atindiakaa a Mose man uprofeti man upasalmi á kure sha mi vough keng.” (Luka 24:44) U fatyô u nengen ken Bibilo you er hanma kwagh u i er cii a kur sha mi vough nahan!