Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Ér Nyi Jimi?

 NGEREN U SEER

Iyange i Ijirigh Kanyi?

Iyange i Ijirigh Kanyi?

UHENEN wer Iyange i ijirigh kanyi? Mbakpishiv hen ér ior vea va sha ishigh ki ikyônough ki torough ki Aôndo, una ôr hanmô ve ijir asange asange. Una na mbagenev injar i yemen sha za ember uma, kpa mbagenev yô, una ôr ve ijir a kende ve ken mtsaha u tsôron gbem. Nahan kpa Bibilo ôr kwagh u iyange ne sha gbenda ugen kposo. Mkaanem ma Aôndo tese ér ka iyange i cieryol ga, kpa ka shighe u ishimaverenkeghen man shighe u a hide a akaa cii sha mlu u a u vough u yange i gba a sha hiihii la.

Apostoli Yohane ôr kwagh u Iyange i Ijirigh la ken Mpase 20:11, 12, ér: “M nenge zegeikôn u pupuu u tor. Un u A tema sha mi la yô, tar man Sha yevese sha ishigh Nagh kera, ian kera lu sha ci ve mape ga. Tsô m nenge mbakpenev tile sha ishigh ki ikônough ki torough kira, mbavesen kua mbakiriki cii. Nahan i bugh uruamabera. I shi i bugh ruamabera ugen kpaa, ka ruamabera u uma je la. Tsô i ôr mbakpenev ijir sha akaa a i nger ken uruamabera mbara, sha aeren a ve.” Kpa, ka an nan lu Orjir u i er kwagh na heen nee?

Yehova ka Orjir u uumace uhemban cii. Kpa a gema tom u ôron ijir kpôô kpôô la a wa orgen sha ikyev. Apostoli Paulu ôr  ken Aerenakaa 17:31 ér, Aôndo “ver iyange i Una ôr tar cii ijir sha mimi, sha Or u A ver nan yô.” Orjir shon u i ver un la ka Yesu Kristu, un u i nder un shin ku la. (Yohane 5:22) Kpa, Iyange i Ijirigh la ia hii hanma shighe? Man a ôr ijir shon a tsa a kuma shighe nena?

Takerada u Mpase tese ér ia hii sha shighe u a nôngo ityav mbi Armagedon, a tim botar u Satan ne kera jimin cii la. * (Mpase 16:14, 16; 19:19–20:3) A nôngo ityav mbi Armagedon a been kera yô, a wuhe Satan kua azôv a na cii shin ihungwa i i ze kweng la zan zan anyom dubu môm. Ka hen shighe la mba 144,000 mba i lu u vea za lu mbaajiriv shi vea “tema tor a Kristu imôngo a kuma anyom dubu” la vea hemen ye. (Mpase 14:1-3; 20:1-4; Mbaromanu 8:17) Iyange i Ijirigh la ka shighe u ôron ijir torough torough ken iyange i môm tseegh ga. Ia tsa a kuma anyom dubu.

Ken anyom dubu la Yesu Kristu una “ôr mbaumav man mbakpenev ijir.” (2 Timoteu 4:1) “Mbaumav” mbara a lu “zegeikpelaior” i ia war Armagedon la. (Mpase 7:9-17) Shi Apostoli Yohane nenge a “mbakpenev tile sha ishigh ki ikônough ki torough.” Vough er Yesu vande tôndon zwa nahan, “mba ve lu shin iwar cii vea ungwa imo [i Kristu] vea due,” sha mnder u shin ku la. (Yohane 5:28, 29; Aerenakaa 24:15) Kpa ka sha nyi a ôr ior cii ijiri?

Apostoli Yohane nenge “i bugh uruamabera. . . . Tsô i ôr mbakpenev ijir sha akaa a i nger ken uruamabera mbara, sha aeren a ve.” Akaa a i nger ken uruamabera mban ka akaa a ior ve vande eren yôô? Mayange ga, a ôr ior ijir sha akaa a ve er cii ve, ve kpe la ga. Er nan ve se fe nahana? Bibilo kaa ér: “Or u nan kpe yô, i pase nan sha ikev i isholibo i tuhwa.” (Mbaromanu 6:7) Nahan ior mba a nder ve vea hingir uma mbara cii, a de ve asorabo a ve vande eren la cica cii. Nahan yô, a̱ shi nan kpa uruamabera mbara vea tile sha ityough ki atindiakaa a Aôndo una seer wan uumace ér ve kura la. A gba u mba vea war Armagedon mbara kua mba a nder ve mbara cii vea kura atindi a Aôndo, kua atindiakaa a alaghga una pase ve ken shighe u anyom dubu la cii ve  vea lu uma gbem ye. Nahan a ôr ior asange asange ijir sha kwagh u vea er ken iaven i Iyange i Ijirigh la cii.

Sha Iyange i Ijirigh la ior kpishi vea zua a ian i henen ishima i Aôndo shi eren sha mi sha kwa u hiihii. Kwagh ne tese ér a er zege tom u tesen ior kwagh sha shighe ne. Jighilii yô, ‘mba vea tema shin tar la vea hen perapera.’ (Yesaia 26:9) Kpa a lu ior cii a sar ve u dondon atindi a Aôndo ga. Yesaia 26:10 kaa ér: “Ka a zungwe iferor mhôônom kpaa, nan hen u eren perapera ga nan eren iferkwagh ken tar u mimi je, nan nengen a icivir i TER i hemban la ga.” Aferaior angara nahan a tim a sha Iyange i Ijirigh, vea kpe kpum kpum, or a kera tsa a nenge a ve ga gbem sha won.—Yesaia 65:20.

Sha mkur u Iyange i Ijirigh la, uumace mba vea war mbara cii vea hingir uumace mba lun vough. (Mpase 20:5) Nahan sha Iyange i Ijirigh la a hide a uumace cii sha mlu u vough u yange ve lu sha mi sha hiihii la. (1 Mbakorinte 15:24-28) Maa a va a ikyaren i masetyô. Hen shighe la, a sagh Satan ken uikyangen kera nahan a na un ian i karen uumace sha kwa u masetyô. (Mpase 20:3, 7-10) Mba vea gba ken imeen na ga cii, ityendezwa i í er ken Bibilo ér: “Mbaperapera vea ya dyako u tar, vea lu ken u gbem” la ia kure sha ve. (Pasalmi 37:29) Sha kpôô yô, Iyange i Jirigh ia va uumace mba jighjigh a averen kpishi je!

^ par. 6 Aluer u soo u seer fan kwagh u Armagedon yô, nenge ken takerada u i yer ér Insight on the Scriptures tihi 1 peeji 594–595, kua peeji 1037–1038 man takerada u Civir Aôndo U A Lu u Mimi Tswen La, ityough 20. Ka Mbashiada mba Yehova ve gber i ye.