Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

NGEREN U SEER

Inyom i 1914—Ka Inyom i Injaa ken Akaaôron a Profeti a ken Bibilo

Inyom i 1914—Ka Inyom i Injaa ken Akaaôron a Profeti a ken Bibilo

MBAHENEN Bibilo yange ve tsenganpasen ér akaa a kpilighyol aa er ken inyom i 1914. Ve ôr kwagh ne anyom kar war kuman akunduahar nahan cii ve inyom la i mase van ye. Akaa a kpilighyol shon yô, lu nyi? Man kanyi i tese ér inyom i 1914 la ka i injaa kpishi?

Er i er ken Luka 21:24 nahan, Yesu yange kaa ér: “Yerusalem kpaa atôatyev á ndyar un shin angahar zan zan shighe u atôatyev á kar kuman.” Yerusalem lu gartamen u ikyurior i Mbayuda—gar u ator a a due ken tsombor u Tor Davidi cii teman tor yô. (Pasalmi  48:1, 2) Nahan kpa, ator ne lu inja kposo a ator a akuraior agen. Gadia a teman sha “ikyônough ki torough ki TER,” nahan kwagh ne tese ér a tile sha ityough ki Aôndo jim jim. (1 Kroniku 29:23) Nahan, Yerusalem lu ikyav i mtemtor u Yehova.

Kpa, lu hanma shighe nahan ‘atôatyev hii u ndyaren’ mtemtor u Aôndo angahara? Man á ndyar mtemtor shon angahar nena? Kwagh ne yange er ken inyom i 607 C.S.W., zum u Mbababilon va ngohol gar u Yerusalem la. Hen shighe la “ikyônough ki torough ki Yehova” hingir gbilin, or kera tema sha ki ga, shi tsombor-tor u Davidi la kpa mile kera. (2 Utor 25:1-26) Lu u a “ndyar” mtemtor ne angahar gbem sha wono? Ei, gadia profeti Esekiel tsengaôron kwagh u Sedekia, tor u masetyô u tema ken Yerusalem la ér: “Sagh atsar kera, bugh idyer i tor kpaa; . . . zan zan un u i lu kwagh na jim, una kar van, u Me na un yô.” (Esekiel 21:26, 27) Or u idyer i tor la i lu kwagh u nan jim yô ka Yesu Kristu . (Luka 1:32, 33) Nahan, lu u a “ndyar” mtemtor u Yehova angahar zan zan Yesu una kar teman Tor.

 Ka hanma shighe nahan yange gba u kwagh u injaa ne una er? Yesu lu kaa ér Atôatyev aa hemen sha anshighe kpeghee tsô. Kwagh u i er ken Daniel ityough 4 la tese se er se fa shighe u hemen u Atôatyev la a kure yô. Ityough kira ôr kwagh u mnyam ma profeti ma ma cier Nebukadinesar, Tor u Babilon la. Ki kaa ér a nenge a zegekon ugen, i gber u i ta inya. U kera hide u ta tombo ga, sha ci u i tôô iyôgh man togula i kange itine na la a mi. Ortyom maa yôô wener: ‘I de ashighe a̱ kar u ataankarahar.’Daniel 4:10-16

Ashighe agen ka a ôron kwagh u ikyon ken Bibilo yô, i ôron i lu kwagh u tor. (Esekiel 17:22-24; 31:2-5) Nahan mgber u i gber kon u sha injakwagh la i te inya la tese ér a va nzughul a mtemtor u Aôndo u ator a yange hemen ken Yerusalem tile sha ityough nagh la. Nahan kpa, mpase u sha mnenge la tese ér mndyar u a ‘ndyar Yerusalem angahar’ la a lu sha anshighe kpeghee tseegh—a lu “ashighe ataankarahar.” Shighe ne una tsa a kuma nena?

Mpase 12:6, 14 tese ér ashighe atar man tiôn ka kwagh môm a “ayange dubu man deri uhar man akunduatar.” Nahan ashighe ataankarahar di a gema a lihe a hemba iyenge la kwa har, shin a lu ayange 2,520 nahan. Kpa i tim Yerusalem ayange kar 2,520 kpa Atôatyev de ‘ndyaren’ mtemtor u Aôndo angahar ga. Nahan, kwagh ne tese wang ér shighe u kwaghôron u profeti ne a tér la lihe hemba nahan. Aluer se dondo kwagh u i nger ken Numeri 14:34 man Esekiel 4:6, ape i er kwagh u “inyom i môm sha ityough ki hanma iyange” la yô, “ashighe ataankarahar” la a lu anyom 2,520.

Anyom 2,520 la hii ken Oktoba, 607 C.S.W., zum u Mbababilon tim gar u Yerusalem, shi kar a tsombor-tor u Davidi kpa kera la. Shighe ne va kure ken Oktoba, 1914. Lu ken inyom ne “shighe u atôatyev” kure ye, nahan i gema i ver Yesu Kristu tor u Tartor u Aôndo u sha la. *Pasalmi 2:1-6; Daniel 7:13, 14.

 Yesu yange tsengaôron ér akaa a kpilighyol amba er ityav man ijen man ityartenger kua ubombauangev vea dumbur sha shighe u “m-ande” na, zum u una lu Tor u tartor u sha la, man kape akaa ne er vough je la. (Mateu 24:3-8; Luka 21:11) Akaa ne cii tese wang je ér sha mimi yô lu ken inyom i 1914 la tartor u Aôndo u sha la hii hemen ye, shi a tese kpaa ér ka ken inyom shon “ayange a masejime” a tar ne hii ye.—2 Timoteu 3:1-5.

^ par. 9 Hii ken Oktoba, 607 C.S.W. la zan zan Oktoba, 1 C.S.W. la, ka anyom 606. Hii ken Oktoba, 1 C.S.W. la zan zan Oktoba, 1914 la, ka anyom 1,914, ka nahan sha ci u inyom i gbilinigh ngi hen atô ga. Aluer se tôô anyom 606 se seer sha 1,914 yô, se zua a anyom 2,520. Aluer u soo u fan er yange i tim Yerusalem ken inyom i 607 C.S.W. la seer yô, nenge ken takerada u i yer ér Insight on the Scriptures la sha itinekwagh i i kaa ér “Chronology” la. Ka Mbashiada mba Yehova ve gber ye.