Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Ér Nyi Jimi?

Ngeren U Seer

Inja i Iti i Aôndo, man Er i Doo u a Teren Í Yô

Inja i Iti i Aôndo, man Er i Doo u a Teren Í Yô

Í GEMA mkaanem ma ken Pasalmi 83:18 la ken Bibilo you ér nyi? Í gema ivur la ken Bibilo i í yer ér New World Translation of the Holy Scriptures la ér: “Sha er ve̱ fa er We, u i yer iti You er Yehova la, i lu We tseegh U lu Uhembansha sha tar cii yô.” Kape í gem ivur ne ken mbamgem mba Bibilo mbagenev kpishi kpaa je la. Nahan kpa, mbamgem mba Bibilo mbagenev kpishi dugh iti i Yehova la kera, ajiir a ma i nger ér Yehova la í gema i nger atiatom her ér “Ter” shin “Utsôron.” Kpa, gba u ma i gem ivur ne nena? Ka ititom ma i nger her shinii ka iti i Yehova?

Iti i Aôndo sha asangaabaacaa a ken zwa Heberu

Ivur la ôr kwagh u iti. Ken zwa Heberu ú í hii ngeren Bibilo ker la yô, í nger iti i i dugh tseer tseer ne hen ivur shon. Yange i yilan iti la sha asangaabaacaa a ken zwa Heberu, ka asangaabaacaa shon je ne, יהוה (YHWH). Mbá yer iti ne ken zwa Tiv ér “Yehova.” Iti ne ngi ken ivur Bibilo i môm tseeghlee? Ei. I nger iti ne ken Ruamabera u hiihii u ken zwa Heberu la kuma kwa 7,000 nahan!

Iti i Aôndo ngi hange hange nan je? Time ase sha msen u ikyav u Yesu Kristu tese la. Á hii msen la ér: “Ter wase u Sha, i̱ tsegha iti You.” (Mateu 6:9) Shighe karen yô, Yesu shi va er msen hen Aôndo ér: “Tere, na iti You icivir.” Imo due sha hen Aôndo kaa ér: “M vande civir i, Me shi Me civir i kpaa.” (Yohane 12:28) Kwagh ne tese wang ér iti i Aôndo ngi a inja kpishi je. Kpa, er nan ve mbageman Bibilo mbagen ve dugh iti ne ken mbamgem vev kera, ve gem ve nger atiatomo?

Atôakaa a vesen nga je kuma er ahar nahan. Ityôkyaa i hiihii yô, mbagenev kpishi senge ér i̱ de ngeren iti la ga sha ci u í fa er yange i yilan í ken zwa Heberu jighilii ga yum. Zwa Heberu u ngise i ngeren la lu a asangaabaacaa a duen a ikyenge ga. Nahan, or môm hegen nan fa er ior mba sha ayange a i ngeren Bibilo la yilan asangaabaacaa a YHWH ne ken zwa Heberu jighilii ga. Nahan kpa doo u kwagh ne una yange se u yilan iti i Aôndo shinii? Sha ashighe a i ngeren Bibilo la, alaghga í yilan iti i Yesu ér Yeshua shin Yehoshua, nahan kpa or môm tsô fa er í yilan í jighilii ga.  Kpa nyian ne, ior mba yer iti i Yesu tar sha won cii kposo kposo, mba yer í er ve ongo i yer ken zwa ve la. Ior de u yilan í sha ci u ve fa er yange i yilan í sha derianyom u hiihii la ga yum ga. U tesen ikyav yô, aluer ú za ken tar u ityôtyev yô, alaghga ior mba ken tar la vea yila iti you vough er i yer í ken zwa wou nahan ga. Nahan, a̱ fa er ngise i yilan iti i Aôndo ga je kpa, ngula tseegh ka ityôkyaa i den u yilan iti i Aôndo ga.

Ityôkyaa i sha uhar yô, ka sha ci u aeren a ityôô a Mbayuda a ngise la. Mbagenev kpishi yange ve na jighjigh ér doo u mayange je yilan iti i Aôndo ga. A̱ shi nan kpa ve na jighjigh nahan sha ci u ve kav tindi u i we ken Bibilo sha kwagh u teren iti i Aôndo la tsembelee ga. Tindi shon kaa ér: “De teren iti i TER Aôndo wou dang ga; gadia or u nan teren iti i TER dang dang yô, Una na nan ishô mayange ga.”—Ekesodu 20:7.

Kwagh u Tindi ne yange tswer yô, lu u teren iti i Aôndo dang dang. Tindi ne yange tswer u teren iti i Aôndo sha icivir kpaa? Mayange ga cii. Ior mba ve nger Bibilo i ken zwa Heberu (“Ikuryan i Tse”) la lu ior mba jighjigh mba ve kuran Tindi u Aôndo na Mbaiserael mba ngise la. Nahan kpa, ve teren iti i Aôndo hanma shighe cii. U tesen ikyav yô, yange ve ter í ken atsam a ve kpishi, man ikpelaior i civir Aôndo waan a genger genger je. Yehova Aôndo iyol na kpa na zwa ér mbacivir un ve teren iti na. Man mbacivir un mba jighjigh eren nahan vough. (Yoel 2:32; Aerenakaa 2:21) Nahan Mbakristu nyian kpaa mba teren iti i Aôndo sha icivir vough er Yesu kpa eren nahan.—Yohane 17:26.

Mbageman Bibilo mbagenev kpishi er kwaghbo u vesen. Ve dugh iti i Aôndo ken Ubibilo mba ve gem la ve gema ve nger atiatom. Ve na yô, ka inja er Aôndo ngu ica hiinii shin ngu uma ga kuaa nahan. Kpa, Bibilo taver se ishima ér se ya ikyar a na kôôsôô. Hen ase sha kwagh u ijende you i ishima shima. Aluer ú fa iti i nan ga nahan mlu wou vea nan una taver nena? Aôndo kpaa aluer i pase ior iti na í Yehova la ga nahan, a er nan ve vea sôsom a na? Heela tseegh ga, aluer ior mbá teren iti i Aôndo ga yô, vea fa inja i vesen i iti na la ga. Inja i iti i Aôndo ér nyi?

Aôndo iyol na pase Mose, ortom na u jighjigh la inja i iti na. Mose yange pine Aôndo iti na, nahan Yehova kaa a na ér: “M NGU ER M LUUN YÔ.” (Ekesodu 3:14) Mgem u Bibilo i Rothaham la gema asember ne ér: “Me Lu kwagh u m soo mer me lu la cii.” Nahan  Yehova una fatyô u hingir nyityôkwagh i á soo cii sha u kuren mbaawashima nav.

Tôô ase wer ú ngu a tahav mbu ú kôr cio u geman hingir nyityôkwagh i ú soo cii. Nahan kanyi i doon ú er sha ci u azende a ou we? Aluer angev kôr mô ve tsung yô, ú hingir ortwer u fan twer tsema tsema, ú sôr nan mbu. Aluer mô ugen ngu ken ibanave yô, ú hingir ornyar, ú due a nan ken ibanave la kera. Kpa sha mimi yô, ú ngu a tahav mbu eren akaa ne ga. Se cii se yina agee. Kpa, aluer ú za hemen u timen ken Bibilo yô, a kpiligh we iyol er Yehova ngu a hingir nyityôkwagh i a soo cii sha u kuren mbaawashima nav nahan. Shi doo un u kuran mba a doo ve ishima la sha agee a na. (2 Kroniku 16:9) Mba ve fe iti i Yehova ga yô, ve fa aeren a Yehova a dedoo ne ga.

Sha kpôô yô, gba u iti i Yehova la ia lu ken Bibilo. U fan inja i iti i Yehova shi teren í gbar gbar ken mcivir wase la ka kwagh u vesen u una wase se u seer kporom hen Ter wase u sha, Yehova yô. *

^ par. 12 Wea soo u fan kwagh u iti i Aôndo man inja i iti la seer, shi fan atôakaa a a ne ve i doo u se teren í ken mcivir wase yô, nenge ken antakerada u i yer ér The Divine Name That Will Endure Forever la. Ka Mbashiada mba Yehova ve gber ú ye.