Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Se Nyi?

 ITYOUGH ITIANKARINYIIN

Mkurtar Zurumu?

Mkurtar Zurumu?

1. Ka sha nyi gbenda nahan se fatyô u fan kwagh u ken hemene?

I LU nahan u nenge abaver sha televishen shin u ungwa sha redio, nahan u hide u pine iyol you wer, ‘Man tar ne yô ver ishigh u zan hana’ vee? Uaahe man afer ngee sha tar nyian je ior mbagenev na jighjigh ér a̱ shi nan kpa mkurtar zurum. Mimi je mkurtar zurumu? Ma gbenda ngu u se fatyô u fan kwagh u una va er ken hemen yôô? Een. Shin er uumace vea fatyô u tsengan fan kwagh u ken hemen ga nahan kpa, Yehova Aôndo yô una fatyô. A pase se ken Bibilo er uma wase a va lu ken hemen yô, man er tar ua va lu la kpaa.—Yesaia 46:10; Yakobu 4:14.

2, 3. Lu nyi mbahenen mba Yesu soo u fana, man Yesu ôr ve nyi?

2 Ka sea ôr kwagh u mkurtar ken Bibilo yô, i lu mkur u tar u se tem sha u ne ga, kpa ka i lu mkur u iferkwagh jimin cii. Yesu yange tese ior ér Tartor u Aôndo ua hemen tar. (Luka 4:43) Yange mbahenen mba Yesu soo u fan shighe u Tartor u Aôndo ua va yô, nahan ve pine un ér: “Ka hanma shighe man akaa ne aa ere? Man ka nyi ia lu ikyav i sha mve Wou la man i mkurtara?” (Mateu 24:3) Yesu ôr ve iyange la jighilii ga, kpa gema pase ve akaa a aa er ica ia gba ga tsô maa mkurtar una va yô. Akaa a Yesu pase ve la nga eren hegen.

3 Ken ityough kin, se lu timen sha akaa a a tese ér se mba ken shighe u mkurtar a zurum yô. Kpa gba u se hii fan kwagh u ityav mbi i nôngo sha la, sha er se kav er i hii ve tar u hingir dang nahan yô.

 ITYAV GBA SHA

4, 5. (a) Lu nyi i er shighe u i ver Yesu Tor sha ica lu a gba ga laa? (b) Mpase 12:12 kaa ér lu u nyi ia er sha tar shighe u a daa Satan a gbihi shin u laa?

4 I pase se ken Ityough 8 ér yange i ver Yesu Tor sha, ken inyom i 1914 la. (Daniel 7:13, 14) Takerada u Mpase ôr se kwagh u yange za hemen yô, ér: “Ityav gba Sha, Mikael [ka Yesu je la] kua mbatyomov nav lu nôngon a darakon [Satan]. Darakon a mbatyomov nav kpaa lu nôngon.” * Kpa ityav mbira hemba Satan a mbatyomov nav, nahan i daa ve i gbihi shin tar. Yange mbatyomov mba shaav vea ember je a zua ga! Kpa ior mba shin tar di ye? Bibilo kaa ér shighe ne kwagh a tser uumace. Sha ci u nyi? Sha ci u ishima vihi Satan ker tsung, gadia a “fa er shighe na a kera vese ga yô.”—Mpase 12:7, 9, 12.

5 Diabolo ngu van a mbamzeyol sha tar kpoghuloo je. Ishima vihi un tsung sha ci u shi ica ga tsô Aôndo una tim un kera. De se time sha akaa a Yesu yange kaa ér aa er ken ayange a masejime ne yô.—Nenge Ngeren u Seer Tan Iwanger u sha 24, peeji 220.

AYANGE A MASEJIME

6, 7. Kwagh u uitya man ijen ngu nena nyiana?

6 Ityav. Yesu yange kaa ér: “Ikyurior igen ia mough ityav a ikyurior igen; tartor ugen kpaa ua mough ityav a tartor ugen.” (Mateu 24:7) Ityav hemba wuan ior sha ayange a ase ne ngeen a ior mba yange ityav wua ken ashighe a tsuaa la ica je. Mzough ugen u a tôvon sha akaa a a ze hemen sha tar yô kaa ér, hii ken inyom i 1914 la je, ityav kposo kposo wua ior hemba miliôn 100. Iyenge i ior mba ityav mbi woo ken atô u anyom  100, hii ken inyom i 1900 zan zan 2000 la, ngee hemba iyenge i ior mba yange ityav wua ken ijime, ken atô u anyom 1,900 la kwa tar. Hen ase sha ican man mnyoon u ityav mbi ve ior umiliôn imôngo a mi la!

7 Ijen. Yesu yange kaa ér: “Ijen ia gba.” (Mateu 24:7) Shin er kwaghyan a hembe ngeen ainge nahan kpa, ior kpishi mba a kwaghyan ga. Sha ci u nyi? Sha ci u mba a inyaregh ki yamen kwaghyan ga, shin yamen tsa u vea kaha iyiav ga. Ior ubiliôn imôngo mba zough a inyaregh ken iyange ki kom u vea ya kwagh a mi a gba ve shin uya ga. Mzough u Nengen sha Mkpeyol u Tar Cii kaa ér hanma inyom yô, mbayev mba kiriki ka ve kpe i kuma miliôn imôngo, sha ci u ka ve zua a kwaghyan u vea ya vea lu her gbong gbong ga.

8, 9. Ka nyi i tese ér kwagh u Yesu yange tsengaôron sha kwagh u ityartenger man angev la ngu kuren sha mini?

8 Ityartenger. Yesu yange tsengaôron ér: “Ityartenger i vesen ia lu.” (Luka 21:11) Hanma inyom yô, tar ka u tenger sha ajiir agen, u vihi akaa kpishi.  Hii ken inyom i 1900 la je, ityartenger wua ior hemba miliôn uhar. Shin er hegen i var ikyav mbi ka mbi tsenga tesen shighe u tar ua tenger hen ma ijiir ica i gba cii ve, u va mase tenger her nahan kpa, tartenger ngu di wuan ior her tsô.

9 Angev. Yesu yange tsengaôron ér “ubombauangev” vea lu. Ubombauangev vea samber fele fele, shi vea wua ior kpishi. (Luka 21:11) Shin er mbatwerev ve fe igbenda i sôron angev atô kposo kposo nahan kpa, iangev mbigenev kpishi mbi a icigh ga. Jighilii yô, kwaghtôvon ugen pase ér hanma inyom yô, iangev er houghbar man malaria kua angev mbu nyian awambe nahan, ka mbi wua ior umiliôn imôngo. Kpa ka cii la ga, ken anyom 40 a a sember karen ne, mbatwerev zua a iangev mbi hev hemba 30, man mbigen ker je yô, mbi a icigh ga.

AEREN A IOR VEA LU A MI KEN AYANGE A MASEJIME NE YÔ

10. Kwagh u i er ken 2 Timoteu 3:1-5 la ngu kuren sha mi nyian nena?

10 Bibilo ôr ken 2 Timoteu 3:1-5 ér: “Ken ayange a masejime  yô, ashighe a ican aa va.” Apostoli Paulu yange pase aeren a ior kpishi vea lu a mi ken ayange a masejime ne yô. A kaa ér ior vea hingir

  • mbawan ayol a ve ikyo tseegh

  • mba inyaregh ki doo ve ishima

  • mbahemban mbamaren vev ato

  • mba wanger inja ga

  • mba icombor ve i doo ve ishima ga

  • mbakôron ayol a ve tsaha ga

  • anomaior a bo

  • mba iember i iyolough i hembe doon ve a Aôndo yô

  • mba sha ashe yô, ve lu mbacivir Aôndo kpa ve ongo imo na ga yô

11. Pasalmi 92:7 kaa ér ka nyi ia va er mbaerenafere?

11 Ior kpishi hen ijiir you mba a aeren nee? Ior kpishi sha tar mba nahan. Kpa ica a gba ga tsô Aôndo una er kwagh sha kwagh ve. A tôndo zwa ér: ‘Zum u mbaaferev vea lu menden er toho  nahan, man mbaerenafer kpaa á kpe ve iyol yô, a lu sha u á tim ve kera gbem tsô.’—Pasalmi 92:7.

AKAA A DEDOO A A LU EREN KEN AYANGE A MASEJIME NE YÔ

12, 13. Ka nyi Yehova a tese se ken ayange a masejime nee?

12 Bibilo tsengaôron ér ken ayange a masejime ne, ior vea ya ican kpishi, shi akaa a nan ior ishimavihin aa de ishar. Kpa Bibilo shi kaa ér akaa a dedoo kpa aa lu eren.

“Loho u Dedoo u tartor ne yô, á ôr u á tser tar.” —Mateu 24:14

13 Ior vea zua a mfe u Bibilo. Profeti Daniel yange nger kwagh sha kwagh u ayange a masejime ne ér: ‘Mfe u mimi una seer.’ (Daniel 12:4) Aôndo una wase ior nav vea kav Bibilo a hemba ave a tse. Hii ken inyom i 1914 la je, kape Yehova a lu wasen ve je la. U tesen ikyav yô, a pase se er iti na i lu kwagh u vesen yô, kua kwagh u a we ishima u eren sha ci u tar la kpaa. Shi a pase se mimi sha kwagh u nagh ku ipaan, man kwagh u ka a er or zum u nan kpe la, kua kwagh u mnder u shin ku. Shi se fa ser ka Tartor u Aôndo tseegh ua fatyô u been a mbamzeyol asev ye. Shi se fa kwagh u se er ve a saan se iyol yô, man kwagh u se er ve a doo Aôndo a vese la kpaa. Kpa ka nyi ior mba Aôndo ve lu eren a mfe u ve zough a mi nee? Kwaghôron u profeti ugen una na mlumun sha mpin ne.—Nenge Ngeren u Seer Tan Iwanger u sha 21, peeji 216 man u sha 25, peeji 221.

14. Ka han i lu pasen loho u dedoo u Tartor laa, man ka unô ve lu pasen u?

14 A er tom u pasen kwagh a tser tar. Zum u Yesu lu ôron kwagh u ayange a masejime la, a kaa ér: “Loho u Dedoo u tartor ne yô, á ôr u á tser tar.” (Mateu 24:3, 14) Mba pasen loho u dedoo u Tartor ne ken ityar i hemban 230, ken ijô i hemban 700. Mbashiada mba  Yehova mba ve dugh ken “hanma ikyurior man hanma nongo” la mba wasen ior u fan kwagh u a lu Tartor la, man kwagh u ua va er sha ci u uumace la kpaa. (Mpase 7:9) Man mba eren kwagh ne gbilin. Shin er ior kpishi ve ker ve ihyom shi ve tôvon ve a ican nahan kpa, kwaghmôm una fatyô u yangen ve tom u pasen kwagh ga, er Yesu tsengaôron nahan.—Luka 21:17.

KA NYI I DOO U U ERE?

15. (a) U na jighjigh wer se mba ken ayange a masejimee, man ka sha ci u nyi? (b) Ka nyi ia er mba ve ongo imo i Yehova laa, man mba ve ongo un ga la di ye?

15 U na jighjigh wer se mba ken ayange a masejimee? Akaaôron a profeti a sha kwagh u ayange a masejime a i er ken Bibilo la kpishi nga kuren sha mi nyian. Ica a kera gba ga tsô Yehova una kaa ér i de u pasen loho u dedoo, maa “mkur” una va. (Mateu 24:14) Mkur ka nyi? Mkur ka Armagedon, shighe u Aôndo una va kar a hanma iferkwagh cii kera la. Hen shighe la, Yehova una tindi Yesu man mbatyomov nav mba ageegh vea va tim nyityô or u nan vende u ungwan imo i Aôndo man Wan na cii. (2 Mbatesalonika 1:6-9) Shighe la una been yô, Satan vea azôv a na vea kera tsugh ior ga. Nahan mba ve soo u ungwan imo i Aôndo shi ve lumun u dondon Tartor na la vea nenge er uityendezwa mba Aôndo cii vea lu kuren sha mi vough yô.—Mpase 20:1-3; 21:3-5.

16. Er i shi kpuaa u mkur una va ne, ka nyi i gbe u u ere?

16 Shi kpuaa tsô tar u Satan a hemen u ne ua kar kera. Sha nahan yô, doo u hanma wase nana pine iyol i nan ér, ‘Ka nyi i gbe u me ere?’ Yehova soo ér we u hen Bibilo sha afatyô wou cii. Nahan gba u u ver ishima sha kwagh u u lu henen ne tsembelee. (Yohane 17:3) Mbashiada mba Yehova mba eren mbamkombo ken hanma kasua sha u wasen  ior ve fa Bibilo. Nôngo zaan mbamkombo mbara hanma shighe cii. (Ôr Mbaheberu 10:24, 25.) Aluer u nenge wer gba u u sôr uma wou yô, ishima i de nyian we ga. U er nahan yô, u hemba yan ijende a Yehova taveraa.—Yakobu 4:8.

17. Mkur una va bur a bur ior kpishi sha ci u nyi?

17 Apostoli Paulu yange pase ér mtim u mbaaferev una va shighe u ior kpishi vea ver ishima ga yô, “er ormbaiv ka nan va tugh nahan.” (1 Mbatesalonika 5:2) Yesu yange tsengaôron ér ior kpishi vea wa ikyo sha akav a a lu tesen ér se mba ken ayange a masejime la ga. A kaa ér: “Er lu sha ayange a Noa nahan, kape mve u Wan u or [shin mlu u ayange a masejime] kpaa una lu la. Gadia er sha ayange a mngerem ma deemee lu a va ga la ve lu yan akaa, man akaa, eren kasev, nan kasev ken unoo zan zan ar sha iyange i Noa kar nyôr ken tso la, kpa ve fa ga zan zan mngerem ma deemee va, va kuwa a ve cii la yô, kape m-ande u Wan u or kpaa una lu la.”—Mateu 24:37-39.

18. Yesu yange ta se icin ér nyi?

18 Yesu yange ta se icin ér ‘kwaghyan man ihyundugh ki msôr man akaa a nyian ishima a uma ne’ a de danen se asema ga. A kaa ér mkur una va abur abur er “kwaghhônon nahan.” Shi a kaa ér una va sha “mba ve tem sha won cii.” Maa shi a kaa ér: “Nahan kuran nen shi eren nen msen hanma shighe cii [shin, eren nen msen sha mimi], sha er né kuma u waren akaa a á va er la cii, man né tile sha ishigh ki Wan u or yô.” (Luka 21:34-36) Gba hange hange u se ungwa icintan i Yesu ne sha ci u nyi? Sha ci u mba sôôn timin tar u Satan ne. Ka ior mba Yehova man Yesu ve lumun ve la tseegh vea war mkurtar, vea lu uma ken tar u he la gbem sha won ye.—Yohane 3:16; 2 Peteru 3:13.

^ par. 4 Mikael ka iti i Yesu Kristu igen. Wea soo u seer fan yô, nenge Ngeren u Seer Tan Iwanger u sha 23, peeji 220.