Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Se Nyi?

 ITYOUGH PUE KAR INYIIN

Tsombor Wou Ua Fatyô u Lun ken Msaanyol

Tsombor Wou Ua Fatyô u Lun ken Msaanyol

1, 2. Ka nyi Yehova a soo sha ci u tsomboro?

KA YEHOVA AÔNDO yange zua ivese i hiihii sha tar ye. Bibilo kaa ér Aôndo yange gba kwase u hiihii la “va a mi hen or.” Yange saan Adam iyol je kaa ér: “Ngun yô, ka kuhe u ikyuhe yam, ka inyam i inyam yam je.” (Genese 2:22, 23) Kwagh ne tese ér, Yehova soo ér i saan nom man kwase iyol ken ivese ve.

2 Kwagh er vihi yô, ior kpishi mba a zua a msaanyol hen icombor ve ga. Nahan kpa, Bibilo ngi a akaawan kpishi a aa wase hanmaor hen tsombor nana lu ken msaanyol shi tsombor cii ua lu ken mzough yô.—Luka 11:28.

KWAGH U AÔNDO A SOO ÉR NOOV VE EREN YÔ

3, 4. (a) Doo u nom nana eren a kwase u nan nena? (b) Er nan ve i gbe u nom man kwase vea deen ayol a ve kwaghbo?

3 Bibilo kaa ér doo u nom u fan kwagh nana eren kwagh a kwase u nan sha dooshima man sha icivir. Ôr Mbaefese 5:25-29. Doo u nom nana eren kwagh a kwase u nan sha dooshima hanma shighe cii. Gba u nana kuran nan shi nana nengen sha a nan shi nana palegh u eren kwagh u vihin nan.

4 Kpa shighe u kwase a er kwagh u shami ga yô, doo u nom nana er nena? Bibilo wa noov kwagh ér: ‘Kasev enev ve za hemen u doon ne ishima, shi de yuwen nen ve ga.’ (Mbakolose 3:19) Noov, umbur nen ner ne kpa ashighe agen ka ne er kwagh u shami ga. Aluer ne soo ner Aôndo a deen ne kwaghbo yô, ne kpa gba u ne deen kasev enev  kwaghbo. (Mateu 6:12, 14, 15) Nom man kwase ka vea deen ayol a ve kwaghbo yô, kwagh la a na ivese ve i doo.

5. Er nan i gbe u nom nana eren kwagh a kwase u nan sha iciviri?

5 Yehova soo ér nom nana eren kwagh a kwase u nan sha icivir. Gba u nom nana hen sha mbamgbe mba kwase u nan tsembelee. Beer ngu sha kwagh ne ga. Aluer nom nan ngu eren a kwase u nan sha inja ga yô, Yehova una ungwa msen u nan ga. (1 Peteru 3:7) Ka or u Yehova a doo nan ishima la nan gbe un kwagh ye. A hemba soon nomso a kasev ga.

6. Kwagh u i kaa ér nom man kwase mba “iyôgh i môm” la inja na ér nyi?

6 Yesu kaa ér nom man kwase ‘kera mba uhar ga, kpa ka iyôgh i môm je.’ (Mateu 19:6) Mba eren kwagh a ayol a ve sha mimi, shi ma shighe môm kpa vea er idya ga. (Anzaakaa 5:15-21; Mbaheberu 13:4) Nom shin kwase nana de tangen iyol shighe u i sar ikyar u nan u yaven a nan la ga. (1 Mbakorinte 7:3-5) Doo u nom nana umbur ér, ‘mayange ma or nana kôr iyol i nan ihyom ga kpa nan koson i shi nan kor i kpaa.’ Nahan doo u nana soo kwase u nan shi nana waan nan ikyo. Kwase ka nan hemba soon ér nom u nan a eren a nan kundu kundu shi a tesen nan dooshima.—Mbaefese 5:29.

KWAGH U AÔNDO A SOO ÉR KASEV VE EREN YÔ

7. Er nan ve i gbe u hanma tsombor cii ua lu a or u hemen u?

7 Hanma tsombor cii ka u lu a orhemen u, u nana tesen mba hen tsombor la akaa a aa wase ve u lun ken mzough yô. Bibilo pase ken takerada u 1 Mbakorinte 11:3 ér: “Ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo.”

8. Kwase nana na nom u nan icivir nena?

8 Orya u nan eren kwagh u shami hanma shighe cii je  kpa nan ngu ga. Kpa kwase ka nana lumun a kwagh u nom u nan a tsough u eren la shi nana sue nan yô, tsombor la cii u hemba zuan a mtsera. (1 Peteru 3:1-6) Bibilo kaa ér: ‘Kwase a̱ cia nom u nan.’ (Mbaefese 5:33) Aluer nom ngu eren kwaghaôndo u kwase na a eren la ga di ye? Doo u kwase la nana za hemen u nan nom u nan la icivir. Bibilo kaa ér: “Ne kasev di kpaa ungwan nen amo a noov enev sha er aluer mbagenev ken ve, vea lu mbawan kwaghôron u Aôndo ikyo ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.” (1 Peteru 3:1, 2) Aluer kwase ngu tesen inja i dedoo yô, kwagh la una wase nom u nan u kaven kwaghaôndo u kwase la, shi nan nan icivir kpaa.

9. (a) Doo u kwase nana er nena shighe u nan gbe anyiman sha kwagh vea nom u nan laa? (b) I wa kasev kwagh ken Titu 2:4, 5 ér nyi?

9 Doo u kwase nana er nena shighe u nan gbe anyiman sha kwagh vea nom u nan laa? Kwase la nana ôr kwagh u a lu nan ken ishima la sha icivir. Ikyav i tesen yô, Sara  yange ôr kwagh ugen u doo Aberaham ga yô, kpa Yehova kaa a Aberaham ér: “Ungwa imo na.” (Genese 21:9-12) Nom u nan lu Orkristu yô, taver u nana er kwagh u a hendan a Ruamabera yô, nahan gba u kwase u nan nana suen nan sha kwagh u nan tsough la. (Aerenakaa 5:29; Mbaefese 5:24) Kwase u injaa ka nan nengen sha tsombor u nan doo doo. (Ôr Titu 2:4, 5.) Nom u nan man mbayev mba nan vea nengen er nan lu eren tom sha ci ve kpoghuloo yô, vea hemba soon nan shi vea hemba nan nan icivir.—Anzaakaa 31:10, 28.

Sara ver kasev ikyav i dedoo nena?

10. Bibilo ôr kwagh u ya u paven man ivaa i paven ér nyi?

10 Ashighe agen ka i ngôôr ga je maa nom nan pav a kwase u nan shin kwase a due hen nom, shin ve pav ivaa. Nahan kpa, Bibilo kaa ér, “kwase nana̱ de dugh hen nom u nan kera ga” shi “nom kpaa, nana̱ de paven a kwase u nan ga.” (1 Mbakorinte 7:10, 11) Ashighe agen uzayol mba vihin tsung ka ve na yô, i gba u kwase nana due hen nom shin nom nana undu nan, kpa gba u se hen sha kwagh ne tseembelee ve se er nahan ye. Man gema ivaa i paven di ye? Bibilo tese ér ka shighe u nom shin kwase nan er idya tseegh, vea fatyô u paven ivaa ye.—Mateu 19:9.

KWAGH U AÔNDO A SOO ÉR MBAMAREN VE EREN YÔ

Yesu ver hanmaor hen tsombor ikyav i dedoo

11. Ka nyi mbayev ve hembe soon ér mbamaren ve eren a ve?

11 Mbamaren, nôngon nen u lun vea ônov enev hanma shighe cii. Ônov enev hemba soon ér ne luun vea ve hanma shighe; ve soo ér ne tesen ve kwagh u Yehova.—Duteronomi 6:4-9.

12. Ka nyi i gbe u mbamaren vea er sha u kuran ônov veve?

12 Tar u Satan ne ngu vihin gban a gba kera, shi ior mbagenev ka ve soo u vihin mbayev asev shin yaven a ve je kpaa. Ka i taver mbamaren mbagenev u lamen vea  ônov vev sha kwagh ne. Kpa gba u mbamaren vea ta ônov vev icin sha kwagh u ambaaior la shi vea tese ve er vea palegh ambaaior la yô. Mbamaren, gba u ne kuran ônov enev. *1 Peteru 5:8.

13. Gba u mbamaren vea tese ônov vev nena?

13 Ka tom u mbamaren u tesen ônov vev inja i dedoo. U tese ônov ou nena? Gba u u tsaase ônov ou, kpa doo u u eren tswam a ve shi u nanden a ve ga. (Yeremia 30: 11) Nahan mayange de tsahan ônov ou sha  ishimavihin ga. Mkaanem ou ma de luun er ka “mkuma u sanker” nahan ga, sha er u na ve ishimavihin ga yô. (Anzaakaa 12:18) Tese ônov ou ve fa er i hii ve i gbe u vea lu mba ungwan kwagh yô.—Mbaefese 6:4; Mbaheberu 12: 9-11; nenge Ngeren u Seer Tan Iwanger u sha 30, peeji 223..

KWAGH U AÔNDO A SOO ÉR MBAYEV VE EREN YÔ

14, 15. Er nan ve i gbe u mbayev vea ungwan imo i mbamaren veve?

14 Yesu yange ungwan imo i Ter na hanma shighe cii, yange a̱ lu sha shighe u i taver u eren nahan je kpaa. (Luka 22:42; Yohane 8:28, 29) Yehova soo ér ônov kpa ve ungwan imo i uter vev.—Mbaefese 6:1-3.

15 Mbayev, aluer taver ne ashighe agen u ungwan imo i mbamaren enev kpa, umbur nen ner, aluer ne mba ungwan kwaghwan yô, a saan Yehova man mbamaren enev iyol a ven. *Anzaakaa 1:8; 6:20; 23:22-25.

Ka nyi ia wase agumaior u tilen sha mimi shighe u i lu meen ve ér ve er kwagh u vihin Aôndo?

16. (a) Satan ka a mee agumaior ér a er kwaghbo nena? (b) Er nan ve i gbe hange hange u se kôr ijende a ior mba Yehova a doo ve ishima?

16 Satan una fatyô u nyôron ken azende a ou shin agumaior agen ér a mee u we u er kwaghbo. A fa je ér a taver we kpishi u vendan mkighir la. Ikyav i tesen yô, wan u Yakob u kwase, Dina, yange lu a azende a Yehova doo a ishima ga yô. Kwagh ne yange va un a zayol kpishi kua tsombor na kpaa. (Genese 34:1, 2) Aluer Yehova doo azende ou ishima ga yô, vea mee u ér we u er kwagh u Yehova a soo ga yô, man a lu kwagh u una fatyô u van we man tsombor wou kua Aôndo a ishimavihin yô. (Anzaakaa 17: 21, 25) Ka kwagh u a ne ve i doo u u ya ijende a ior mba Yehova a doo ve ishima je la.—1 Mbakorinte 15:33.

TSOMBOR WOU UA FATYÔ U LUN KEN MSAANYOL

17. Ka nyi i gbe u hanmaor hen tsombor nana erenee?

17 Ior mba hen tsombor ka vea dondon akaawan a Aôndo yô, ve palegh uzayol kpishi. Nahan wea lu nom yô, kwase wou a doo u ishima shi eren kwagh a na sha dooshima kpaa. Wea lu kwase yô, naan nomou icivir shi eren kwagh u a kaa ér we u er yô, shi dondo ikyav i kwase u i er kwagh na ken Anzaakaa 31:10-31 la. Wea lu ormaren yô, tese ônov ou ve soo Aôndo. (Anzaakaa 22:6) Wea lu ter yô, tese tsombor wou “dedoo.” (1 Timoteu 3:4, 5; 5:8) Mbayev, ungwan nen imo i mbamaren enev. (Mbakolose 3:20) Umbur nen ner hanmaor hen tsombor nana fatyô u eren kwagh ashighe agen shami ga, nahan hiden nen a iyol ijime shi naan nen anyi a yan. Ka mimi, Bibilo ngi a akaawan a Yehova a soo ér hanmaor hen tsombor nana eren yô.

^ par. 12 Seer fan kwagh u ú er ve u kura mbayev ou la ken ityough 32 ki takerada u Hen Kwagh sha Ikyev i Ortesen Uhemban La. Ka Mbashiada mba Yehova ve gber u ye.

^ par. 15 Zum u mbamaren ve kaa ér mbayev ve er kwagh u a hendan a atindi a Aôndo yô, gba u mbayev vea ungwa imo ve ga.—Aerenakaa 5:29.