KA WEA ôr pipaabaver shin wea nenge televishen shin wea ungwa redio yô, u nenge er tswam u de ishar sha tar, kua ityav man ifer yô. Shi alaghga u ngu yan ican i uange shin u ngu zungwen ku u ma or wou.

Pine ase iyol you wer:

  • Ka kwagh u Aôndo a we ishima u eren a mo kua tsombor wam nee?

  • Me zua a iwasen i nôngon a mbamzeyol av hana?

  • Bem a tsa a lu sha tar kpa?

    Bibilo na mbamlumun mba kuman ken ato sha mbampin mban.

 BIBILO TESE ÉR AÔNDO UNA VA ER AKAA A KPILIGHYOL SHA TAR

  • Ior vea kera gba angev shin vea beeyol shin vea kpe mayange ga.—Mpase 21:4

  • “Orkeer nana gba tsuwen er ashim nahan.”—Yesaia 35:6

  • “Á bugh mbaapirashe ashe.” —Yesaia 35:5

  •  A nder mbakpenev shin ku. Yohane 5:28, 29

  • Or a kera gba angev ga. —Yesaia 33:24

  • Hanma or shin tar nana lu a kwaghyan kpishi.—Pasalmi 72:16

 ZUA A IWASEN SHA KWAGH U BIBILO I TESE LA

De gbe huren kwagh u i nger ken upeeji mba karen mban wer i kpen ôron ga. Aôndo tôndo zwa ér una er akaa ne sha tar kpee je, shi Bibilo pase gbenda u una er a la kpaa.

Kpa ka cii mtsera u Bibilo i lu a mi ne ga. Bibilo pase se kwagh u se er ve a saan se iyol ken uma wase sha mimi hegen je kpaa yô. Hide gbidye kwar sha mbamzeyol ou tsô u nenge. Alaghga a lu mzeyol u inyar shin u tsombor, shin u mkpeyolga, shin ka ku u or wou u lu nan we ishimanyian ye. Bibilo ia wase u u nôngo a mbamzeyol mban, shi ia wase u u zua a mbamlumun sha mbampin, amba er mba i pin heen ne nahan:

 Er u lu ôron takerada ne yô, tese je ér u soo u fan kwagh u Bibilo i tese la. Takerada ne ua wase u. I pine mbampin sha hanma ikyumhiange, mba vea wase u u seer kaven kwagh u Bibilo yô. Ka i doo ior umiliôn imôngo u henen Bibilo vea Mbashiada mba Yehova. Se na jighjigh ser we kpa kape a doo u je la. Yô, Aôndo a wase u er u lu timen sha kwagh u Bibilo i tese la yô!