Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Bibilo Tese Se Nyi?

 ITYOUGH PUENIGHENI

Doo u Me Tsegha Uma Wam sha Ci u Aôndo shi Me Er Batisemaa?

Doo u Me Tsegha Uma Wam sha Ci u Aôndo shi Me Er Batisemaa?

1. Er u hen takerada ne tsembelee hegen yô, ka nyi alaghga u pine iyol youwe?

TAKERADA u u lu henen ne wase u u fa akaa a mimi kpishi a Bibilo i tese yô, er ityendezwa i Aôndo a er sha kwagh u uma u tsôron la nahan, kua mlu u mbakpenev man ishimaverenkeghen i mnder u shin ku la. (Orpasenkwagh 9:5; Luka 23:43; Yohane 5:28, 29; Mpase 21:3, 4) Alaghga u hii u zan mbamkombo mba Mbashiada mba Yehova shi u na jighjigh wer mba civir  Aôndo sha mimi. (Yohane 13:35) Alaghga u hii u lun vea Yehova kôôsôô, shi u tsua wer u civir un. Nahan alaghga u pine iyol you wer, ‘Ka nyi me er hegen sha er me civir Aôndo?’

2. Lu nyi i na ve Oretiopia ugen soo ér i er un batisema?

2 Oretiopia ugen u lu uma sha ayange a Yesu la kpa yange pine iyol na imba mpin la. Shighe u i nder Yesu shin ku kera la, orhenen u Yesu u i yilan un ér Filibu la za pase or shon kwagh. Filibu wase or la kav er Yesu a lu Mesiya yô. Oretiopia la fe nahan yô, ishima tsuwe un ker, maa fese je kaa ér: “Mngerem kpaa man, man ka nyi je i yange u eren mo batisema?”—Aerenakaa 8:26-36.

3. (a) Yesu yange kaa a mbadondon un ér ve er nyi? (b) Gba u a er or batisema nena?

3 Bibilo tese wang ér aluer u soo u civir Yehova yô, doo u u er batisema keng keng. Yesu yange kaa a mbadondon un ér: ‘Gema nen akuraior cii a̱ hingir mbahenen, eren nen ve batisema.’ (Mateu 28:19) Shi Yesu iyol na kpa yange ver se ikyav sha kwagh ne sha batisema u i er un la. Yange i mir un shin mnger, i mishi un a mishi mngerem sha ityou ga. (Mateu 3:16) Ka a eren Orkristu batisema nyian yô, i gba u a mir nan shin mnger.

4. Aluer i er u batisema yô, kwagh la una tese mbagenev nyi?

4 Aluer i er u batisema yô, kwagh la una tese mbagenev ér mimi je u soo u lun ijende i Aôndo shi u soo u civir un. (Pasalmi 40:7, 8) Nahan alaghga u pine iyol you wer, ‘Ka nyi me er ve a erem batisema?’

MFE MAN JIGHJIGH U NAN

5. (a) Ka nyi i gbe u u hii eren cii man a er u batisema? (b) Mbamkombo mba Mbakristu mba a inja sha ci u nyi?

5 Cii man i er u batisema yô, saa u fa Yehova man Yesu. U ngu vanden eren kwagh ne sha u henen Bibilo.  (Ôr Yohane 17:3.) Kpa u henen Bibilo tseegh la kuma ga. Bibilo kaa ér gba kpee u u ‘iv a mfe u vough u fan’ ishima i Yehova la. (Mbakolose 1:9) Mbamkombo mba Mbashiada mba Yehova vea wase u u seer lun a Yehova kôôsôô. Ka ityôkyaa i vesen i môm i i ne ve i gbe u u zaan mbamkombo mbara hanma shighe je la.—Mbaheberu 10:24, 25.

Saa u hen Bibilo cii man a er u batisema ye

6. Gba u u fa Bibilo a kighir nan ve a er u batisema?

6 Nahan kpa, Yehova ver ishima ér saa we u fa hanma kwagh ken Bibilo cii man a er u batisema ga. Yange ver ishima ér saa Oretiopia la a fa hanma kwagh man a er un batisema ga. (Aerenakaa 8:30, 31) Ka u se za hemen u henen kwagh u Aôndo gbem sha won. (Orpasenkwagh 3:11) Kpa a gba u u fa atesen a Bibilo a i gbe u or a hii fan la, cii man a er u batisema ye.—Mbaheberu 5:12.

7. Bibilo i u lu henen ne wase u nena?

7 Bibilo kaa ér: “Á fatyô u doon Aôndo ishima ga, saa sha jighjigh u nan.” (Mbaheberu 11:6) Sha nahan yô, saa u lu a jighjigh u nan ve a er u batisema ye. Bibilo kaa a vese ér ior mbagenev ken gar u Korinte u tsuaa la yange ve ungwa kwagh u mbadondon mba Yesu lu tesen la, nahan “ve na jighjigh, i er ve batisema.” (Aerenakaa 18:8) We kpa Bibilo i u lu henen ne wase u u nan jighjigh a uityendezwa mba Aôndo kua tahav mbu nagh ku Yesu, mbu mbua fatyô u yiman se sha ikyev i isholibo man ku la.—Yosua 23:14; Aerenakaa 4:12; 2 Timoteu 3:16, 17.

ÔR MBAGENEV AKAA A MIMI A BIBILO I TESE LA

8. Ka nyi ia na ve u soo u ôron mbagenev kwagh u u lu henen laa?

8 Aluer u ngu henen Bibilo seer shi u ngu nengen er i lu wasen we ken uma wou yô, jighjigh u nan wou una  lu hemban taver cii. Nahan u soo u ôron mbagenev kwagh u u lu henen la. (Yeremia 20:9; 2 Mbakorinte 4:13) Kpa ka unô u ôr ve?

Jighjigh wou u nan a mgbegha u u ôron mbagenev akaa a u ne jighjigh a mi la

9, 10. (a) Ka unô nahan u fatyô u hiin pasen ve kwagh u u hen laa? (b) Aluer u soo u duen kwaghpasen vea tiônnongo yô, ka nyi i gbe u u ere?

9 Alaghga a sar u u ôron tsombor wou, shin azende a ou gayô mbawanndor a we shin mba yaren tom ijiir i môm a we kwagh u u lu henen la. Ka kwagh u dedoo, kpa eren kwagh ne ken bem man sha dooshima. Shighe a karen yô, u hii u duen kwaghpasen vea tiônnongo. A kuman we u eren kwagh ne yô, u fatyô u lamen a Orshiada shin Kwaseshiada u nan lu tesen we Bibilo la, kaan a nan wer u soo u duen kwaghpasen vea tiônnongo. Aluer nan nenge ér u wa iyol kuma u u er kwagh ne shi u ngu dondon atindi a Bibilo ken uma wou yô, naná za a we ne za nenge a mbatamen uhar hen tiônnongo wen la.

10 Mbatamen mbara vea er nena? Vea lam a we sha u nengen wea fa atesen a Bibilo a ka i gba u or a hii fan la, shi wea lu dondon ityesen i Bibilo ken uma wou ayange ayange, shi mimi je wea soo u lun Orshiada u Yehova yô. Umbur wer mbatamen mba nengen sha hanma or ken tiônnongo cii, kua we kpaa, nahan de cian u lamen a ve ga. (Aerenakaa 20:28; 1 Peteru 5:2, 3) Mtem ne una karen kera yô, mbatamen vea pase u aluer ka u u hii u duen kwaghpasen vea tiônnongo yô.

11. Er nan ve i gbe hange hange u u sôr uma wou cii man u hii u duen kwaghpasen vea tiônnongoo?

11 Alaghga mbatamen vea pase u ér gba u u seer sôron uma wou cii man u hii u duen kwaghpasen vea tiônnongo ye. Gba hange hange u u sôr akaa la ken uma  wou sha ci u nyi? Sha ci u ka sea ôron ior kwagh u Aôndo yô, se tile sha ityough ki Yehova, nahan i gba u se eren kwagh ken uma wase sha gbenda u van un a icivir.—1 Mbakorinte 6:9, 10; Mbagalatia 5:19-21.

ZAMBER SHI GEMA ISHIMA

12. Gba u ior cii vea zamber a Aôndo sha ci u nyi?

12 Shi kwagh ugen kpa ngu u i gbe u u er cii man a er u batisema yô. Apostoli Peteru yange kaa ér: ‘Zamber nen man gema nen ishima, sha u i̱ ese asorabo a en kera.’ (Aerenakaa 3:19) U zamber la inja na ér nyi? Inja na yô, ka u vaan afanyô sha ma kwaghbo u u er yô. U tesen ikyav yô, yange wea eren idya shin ijimba ken uma wou yô, hegen gba u u zamber. Man aluer yange wea nôngo sha afatyô wou cii wea lu eren kwagh u vough ken uma wou je kpa, gba u u zamber, sha ci u se cii se er isholibo, nahan gba u se zamber a Aôndo ser a de se isholibo.—Mbaromanu 3:23; 5:1.

13. Ka i ‘gema ishima’ nena?

13 U vaan afanyô sha kwaghbo u u er la tseegh kumaa? Ei. Apostoli Peteru kaa ér shi gba u u ‘gema ishima.’ Inja na yô, gba u u venda hanma inja i dang i yange u eren cii, u gema eren kwagh u vough. U tesen ikyav yô, tôô wer u ngu zan zende hen ijiir i u lu a vande zan ga yô. U ze dôghôô yô, u za mase kaven er u tee gbenda u shami ga yô. Nahan u er nena? Ka keng u er zooloo, u tile, shi u kôr u gema u tôô gbenda u shami. Kape Bibilo i u lu henen ne kpa alaghga ia wase u u nenge wer gba u u gema anza shin akaa agen ken uma wou je la. Kegh iyol u ‘geman ishima,’ ka u sôron akaa a i gbe kpee u u sôr ken uma wou je la, nahan hii u eren kwagh u vough.

 TSEGHA IYOL YOU

U tôndo zwa a Yehova wer u civir unu?

14. U tsegha iyol you sha ci u Aôndo nena?

14 Kwagh ugen u hange hange u i gbe u u er ve a er u batisema yô, ka u tseghan iyol you sha ci u Yehova. Ka u tsegha iyol you sha ci u Yehova sha u eren msen hen a na, tôndon zwa a na wer u civir un tseegh, shi u hemban eren ishima na a hanma kwagh ugen cii. —Duteronomi 6:15.

15, 16. Ka nyi ka i na ve or tsegha iyol i nan sha ci u Aôndo?

15 Aluer u tôndo zwa a Yehova wer u civir un tseegh ken uma wou cii yô, ka vough er u tôndo zwa a or u doon we ishima wer u lu vea nan sha ayange a uma wou cii nahan. Tôô ase wer nomsoor ngu sôôr kwase. Er nan lu fan kwase la seer la, kwase la nana lu hemban doo nan ishima, je yô a sar nan u vôson kwase shon. Shin er beer a lu sha kwagh u nan tsough u eren ne ga nahan kpa, nan kegh iyol u lun vea kwase la ken ayange a uma u nan cii sha ci u kwase la doo nan ishima.

16 Er u lu henen kwagh u Yehova ne, una seer doon we ishima, nahan u soo u civir un sha afatyô wou cii. Kwagh ne una mgbegha u, u er msen u tôndo zwa u civir un. Bibilo kaa ér hanma or u i sar nan u dondon Yesu cii yô, “nana̱ nyiman iyol i nan.” (Marku 8:34) Inja i kwagh ne ér nyi? Inja na yô, i hemba gban we ishima u eren kwagh u Yehova a soo la a hanma kwagh ugen ken uma wou cii. Kwagh u Yehova a soo ér we u er la hemba ngun we a inja a asaren a ou man akaa a u tsough u eren la.—Ôr 1 Peteru 4:2.

DE CIE WER U KANSHIO GA

17. Er nan ve ior mbagenev ka ve tsegha ayol a ve sha ci u Yehova ga?

17 Ior mbagenev ka ve tsegha ayol a ve sha ci u Yehova  ga sha ci u ka ve cian ér vea va kanshio u civir Aôndo er ve tende zwa a na la. Ka ve soo ér vea er kwagh u van Yehova ahenge ga, shin alaghga ka ve hen ér aluer ve tsegha iyol ve sha ci na ga yô, Yehova una kera na ve ibo sha ma kwagh u ve er ga.

18. Ka nyi ia wase u u de u cian wer u va er kwagh u van Yehova ahenge?

18 Aluer Yehova doo u ishima yô, kwagh la una wase u u kera yem u cian wer u va er kwagh u van un ahenge ga. Er a doo u ishima yô, u nôngo sha afatyô wou cii u er kwagh u u tende zwa a na la. (Orpasenkwagh 5:4; Mbakolose 1:10) U kera nenge wer u eren ishima i Yehova la ka kwagh u taver kpishi ga. Apostoli Yohane yange nger ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.”—1 Yohane 5:3.

19. Gba u u cia u tseghan iyol you sha ci u Yehova ga sha ci u nyi?

19 Saa u lu vough shin u lu a isholibo iyol shio ve u tsegha iyol you sha ci u Yehova ga. Yehova veren ishima ér se er kwagh u a gande se agee ga. (Pasalmi 103:14) Una wase u u er kwagh u vough. (Yesaia 41:10) Suur sha Yehova a ishima you cii, nahan “Una kôôm igbenda you.”—Anzaakaa 3:5, 6.

PASE JIGHJIGH U NAN WOU SHA U ZUAN A MYOM

20. U tseghan iyol you sha ci u Aôndo yô, ka nyi ia dondoo?

20 U nenge wer shighe kuma u u tsegha iyol you sha ci u Yehova? U tseghan iyol you sha ci u Yehova yô, tese ér u wa iyol u eren kwagh u a dondo ne ve. A gba u a er u batisema.

21, 22. U er nan ve u “pase” jighjigh u nan wou ken igbaraa?

21 Pase ortamen u wasen mzough u mbatamen tom u hen tiônnongo wou la a fa er u tsegh iyol you sha  ci u Yehova shi u soo wer i er u batisema yô. Nahan una kaa mbatamen mbagenev vea hide a nenge vea we sha atesen a Bibilo a ka i gba u or a hii fan la. Aluer ve kaa ér, u wa iyol kuma yô, vea kaa a we ér a fatyô u eren we batisema sha mkohol u ningir shin mkohol u vesen u Mbashiada mba Yehova u ne va za la. Ne zaan mkohol  yô, a na kwaghôron u una pase kwagh u a lu batisema yô. Maa ornankwaghôron la nana pine mba ve we iyol i eren batisema la mbampin uhar mba taver ga. U naan mlumun sha mbampin mba shon yô, u “pase” jighjigh u nan wou ken igbar ve.—Mbaromanu 10:10.

22 Maa a er u batisema. A mir u shin mnger. Batisema  u u er la una tese hanma or ér u tsegha iyol you sha ci u Yehova shi u hingir Orshiada u Yehova.

IKYAV I BATISEMA WOU

23. Inja i u eren batisema “ken iti i Ter man Wan man Icighan Jijingi” la ér nyi?

23 Yesu yange kaa ér a er mbahenen nav batisema “ken iti i Ter man Wan man Icighan Jijingi.” (Ôr Mateu 28:19.) Inja i kwagh ne ér nyi? Inja na yô, u lumun wer Yehova a̱ hemen we, shi u fa tom u Yesu a eren sha u kuren awashima u Aôndo, man er Aôndo a eren tom a icighan jijingi na sha u eren ishima na yô.—Pasalmi 83:18; Mateu 28:18; Mbagalatia 5:22, 23; 2 Peteru 1:21.

Aluer u er batisema yô, u ngu tesen wer u soo u eren ishima i Yehova

24, 25. (a) Batisema ka ikyav i tesen nyi? (b) Ka nyi se lu timen sha mi ken ityough ki masetyô kiraa?

24 Batisema ka ikyav i tesen kwagh ugen u a lu hange hange yô. Aluer i mir u shin mnger yô, kwagh la ngu tesen ér u hingir kpenegh sha aeren a ou a tse la, shin u de a. U duen shin mnger yô, u hide u hii uma u he, u hingir u eren ishima i Aôndo. Tese ér hii hen shighe la je, ka u u za hemen u civir Yehova gbem sha won. Umbur wer u tsegha iyol you ka sha ci u uumace shin ma mzough shin ma tom ga. Kpa ka Yehova u tsegh iyol you sha ci na ye.

25 Iyoltseghan you ia wase u u lun vea Yehova kôôsôô. (Pasalmi 25:14) Kpa kwagh ne tese ér aluer or er batisema tseegh tsô maa a yima nan ga. Apostoli Paulu yange nger ér: “Eren nen tom sha myom wen a mciem man ikyarikyase iyol.” (Mbafilipi 2:12) Batisema ka mhii di tsô. Kpa u er nan ve u za hemen u lun vea Aôndo kôôsôô? Ityough ki masetyô ki takerada ne kia na mlumun sha mpin la.