Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 MPIN U SHA 9

Doo u Me Na Jighjigh a Ityesen i I Kaa Ér Akaauma Cii Gba Duen Tsô Laa?

Doo u Me Na Jighjigh a Ityesen i I Kaa Ér Akaauma Cii Gba Duen Tsô Laa?

ER I HII VE MPIN NE A LU HANGE HANGE YÔ

Aluer mimi je akaauma cii gba duen iyol i a tsô yô, se mba a ityôkyaa i lun uma ga. Kpa aluer i gba a gba akaauuma cii yô, se fatyô u zuan a mbamlumun mba kuman sha mbampin mba sha kwagh u uma man mlu u ken hemen kpaa.

A LU WE NAHAN U ER NENA?

Hen sha kwagh ne: Kwagh ugen tsume Alex. A vande nan Aôndo jighjigh kera je shi a na jighjigh ér ka un a gbe akaa cii ye. Kpa ze makeranta nyian yô, tica na u a tesen un gbaa-kwaghhenen u timen sha akaauma la kaa a na ér, ka mimi, akaauuma cii gba duen tsô. Ka kwagh u mbasainsi ve tôv tsembelee ve fe yô. Alex soo ér i nenge ér un bume ga. Maa a kaa ken ishima na ér, ‘Aluer mbasainsi je kpa nenge ér ityesen ne ka i mimi yô, m ngu nyi je ve me nyiman kwagh a ve?

A lu we nahan, u gba lumun a ityesen i i kaa ér akaauma cii gba duen tsô la, sha ci u i nger i ken ityakerada inja er ka kwagh u mimi nahan yumuu?

HIDE HEN A ISHIMA!

Ashighe kpishi mba ve lumun shin ve vendan ityesen ne la ka ve fatyô u pasen er i hii ve ve lumun shin ve vende i la ga.

  • Ior mbagenev gba nan jighjigh tsô ér ka Aôndo a gbe akaa cii ye, sha ci u kape i tese ve ken ucôôci je la.

  • Mbagenev di na jighjigh a ityesen i i kaa ér akaauma cii gba duen tsô la, sha ci u kape i tese ve ken makeranta je la.

 MBAMPIN ATARATAR MBA HENEN SHA MI

Bibilo kaa ér: “Hanma ya yô, or maa un a maa, kpa u A maa akaa cii yô, ka Aôndo.” (Mbaheberu 3:4) Kwagh u Bibilo i kaa ne ka mimi kpa?

 

Aluer u ngu kaan wer akaauma cii Or gba a gba ga yô, u fa kwagh u u ôron ga. Ka vough er u ngu kaan wer iyou ne kpa yange or maa i a maa ga nahan

IOR KA VE KAA ÉR: Zegekwagh ugen yange bughur kpuugh ve sha man tar due hingir u lun ye.

1. Ka an shin ka nyi yange i na ve kwagh shon bughur imba la nahana?

2. Ka mhen u han a hembe kuman ken ato? Ka u a kaa ér akaauma cii gba duen tsô la shinii, ka u a kaa ér Or ngu u nan gbe akaa cii laa?

IOR KA VE KAA ÉR: Ka annyamev yange ve gema kure kure ve hingir uumace ye.

3. Aluer ka annyamev, er ambo nahan, yange ve gema ve hingir uumace yô, er nan ve mhen u orumace a hembe u ambo i yem zende zende yum nahana?

4. Er nan ve akaauma a a ndahar i hembe zwa mshir la je kpa iyol i a i we kpelegh kpelegh nahana?

IOR KA VE KAA ÉR: Ityesen i i kaa ér akaauma cii gba duen tsô la ka i mimi.

5. Or u nan kaa nahan la nan tôv sha kwagh shon iyol i nanaa?

6. Ka iorov ume ve gbe nan jighjigh a ityesen i i kaa ér akaauma cii gba duen tsô la, sha ci u i kaa a ve ér mbafantakerada cii lumun a i yumu?

“Aluer u ngu zenden ken ikyô maa u za nenge a iyou i doonashe tsung nahan, u kaa ken ishima you wer nyi? U kaa wer: ‘Kera, iyou ne doo! A̱ shi nan kpa yange ikyon môugh haa inya sha inja sha inja ve, i hingir iyou shon yee?’ U hen nahan ga! Sha ci u kwagh a fatyô u eren nahan ga. Tsô a er nan ve se na jighjigh ser hanma kwagh u a lu sha man u shin tar cii yange gba duen abu tsôô?”—Mkaanem ma Julia, wankwase ugen.​—Julia.

“Tôô ase wer or kaa a we ér kwagh bughur ken iyou i gberen ityakerada, maa inki tsenda sha kpekpe kua sha silin, maa hingir zege dikishenali. U na jighjigh a kwagh laa?”—Mkaanem ma Gwen, wankwase ugen.

GBA U SE NA AÔNDO JIGHJIGH SHA CI U NYi?

Bibilo taver se ishima ér se zenden sha ‘mciviraôndo wase u ken jijingi.’ (Mbaromanu 12:1) Inja na yô ér we u de gbe nan Aôndo jighjigh tsô wer

  • KENDE U KEN ISHIMA GA (Alaghga u kaa wer, a̱ shi nan kpa tahav mbu, mbu mbu hembe sha won cii yô)

  • IOR URUGH WE GA (Alaghga ga u kaa wer, m ngu hen ijiir i ior kpishi ve eren kwaghaôndo yô)

  • I KIGHIR WE GA (Alaghga u kaa wer, mbamaren av yesem ken kwaghaôndo, nahan gba u me lu ker)

Kpa lu a ityôkyaa injaa i i ne ve u ne Aôndo jighjigh yô.

“Tica ka nana pasen ken klase er iyol yase i eren tom yô, m nenge mer Aôndo ngu je ka u henen a hen ga. Hanma kwagh ken iyol i or cii ngu a tom na, zan zan je kua akaa a hemban ndahar la je kpaa, man ashighe kpishi akaa ne ka a eren tom kpa se fa ga. Sha mimi yô, iyol i orumace wa ker kpelegh kpelegh!”—Mkaanem ma Teresa, wankwase ugen.

“Ka mea nenge a iyou i taven war war, shin zegetso, shin mato yô, m pine iyol yam mer, ‘Ka an nan er kwagh ne?’ Saa uiginia mba lun a mfe tsor tsor vea var mato ye. U tesen ikyav yô, ka i gba u a wa hanma kwagh sha mi sha inja, una lu eren tom vough vough ve, a naha un ye. Man aluer mato kpa i er un a er yô, kape uumace kpa i gba ve a gba je la.”—Mkaanem ma Richard, wannomso ugen.

“Ka mea timen sha akaa a sainsi mea seer yô, m hemban nengen er ityesen i i kaa ér akaauma cii gba duen tsô la i lu i mimi ga yô. . . . M nenge mer hemba kan ican u nan jighjigh a ityesen i i kaa ér akaauma cii gba duen tsô la, a u nan jighjigh ér Or gba a gba akaa shon la.”—Mkaanem ma Anthony, wannomso ugen

MPIN U HENEN SHA MI

Er mbasainsi ve tôv sha kwagh u ityesen i i kaa ér akaauma cii gba duen tsô la anyom akundu imôngo hegen nahan kpa, mba a zua a mkav u ve cii vea gba zwa môm sha mi ga. Aluer mbasainsi mba i nengen ér ve hemba kwaghfan la kpa mba gban zwa môm sha kwagh u ityesen ne ga yô, we u huna i a lu kwaghboo?