Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 MPIN U SHA 10

Bibilo Ia Wasem Nena?

Bibilo Ia Wasem Nena?

ER I HII VE MPIN NE A LU HANGE HANGE YÔ

Bibilo kaa ér: “Icighanruamabera cii ka Aôndo A ne i nger ye.” (2 Timoteu 3:16) Aluer kwagh u Bibilo i er ne ka mimi yô, tese je ér Bibilo ia fatyô u tesen we kwagh u u er yô.

A LU WE NAHAN U ER NENA?

Hen sha kwagh ne: David ngu zenden tugh karen hen ijiir i a fe ga yô. Er ime i we kpishi yô, a kera nenge a akav a wasen un u fan gbenda ga, maa a va mase kaven er un tsum gbenda yô. A̱ shi nan kpa er a lu van la, a va goom hen akahar a gbenda agen shami ga.

A lu we nahan, u er nena?

HIDE HEN A ISHIMA!

Akaa nga kpishi a u fatyô u eren yô:

  1. Pine gbenda.

  2. Tsar tôôci.

  3. Gbaa yemen henen tsô wer u va za asegh sha gbenda u u fe u yô.

Ikyav tese wang ér kwagh u sha 3 ne una wase u a kuma ga.

Kwagh u sha 2 la una hemba wasen we a u hiihii la. Sha ci u u ngu a tôôci u tsaren nengen gbenda, u una wase u u fan hanma ijiir i u lu karen cii yô.

Bibilo kpa kape ia wase u je la!

Takerada u ior kpishi ve lu a mi ne ua

  • tese u er u nenge sha mbamzeyol ou yô

  • wase u u henen sha kwagh u uma wou, nahan hingir or u injaa

  • tese u kwagh u u er a uma wou ve una hemba lun we a inja yô

 ZUA A MLUMUN SHA MBAMPIN MBA VE HEMBE LUN A INJA CII LA

Ka sea hiin u fan iliam je se gba pinen akaa.

  • Ka an nan er kwavaôndo?

  • I er asan sha nyi?

Shighe a karen yô, se kôr pinen mbampin sha akaa a zan iyol a se lu nengen a mi yô.

Aluer Bibilo ta iwanger sha akaa ne cii vough vough ye?

Ior kpishi ka ve kaa ér, Bibilo ka takerada u ukwaghhir, shin Bibilo ya tsegh, shin Bibilo taver je gande u kaven. Kpa ka Bibilo jim jim i lu zayol yee? Shin ka mfe u Bibilo u ior ve senge ér mba a mi la a lu shami ga?

U tesen ikyav yô, ior ka ve hen ér Bibilo kaa ér tar ne ngu sha ikyev i Aôndo. Kpa kape i lu laa? Tar u se lu ker ne vihi gande ave! U iv a ijungwen man ican i yan, kua angev man ku, kua ibanave man uaahe. Aôndo u se doo un ishima la nahan, una er se akaa nee?

U soo u zuan a mbamlumun sha mbampin mbanaa? Aluer u fa or u Bibilo i kaa ér tar ne ngu sha ikyev i nan la yô, a kpiligh we iyol kpishi!

A̱ shi nan kpa, u nenge er kwaghwan u ken antakerada ne cii a dugh ken Bibilo yô. Mbashiada mba Yehova na jighjigh ér Bibilo ia fatyô u tesen ve kwagh u injaa u vea er yô. Sha ci u Bibilo jimin cii “ka Aôndo A ne i nger ye. [Ngi] a inja sha ityesen man sha mkôôm man sha myange” kpaa. (2 Timoteu 3:16, 17) U fatyô u tôvon fan kwagh u takerada u u tse kpishi kpa u lu a inja her nyian ne!